Tusarniaaneq, ”uunga siunnersuut pillugu: Allagaateqarfeqarneq pillugu Inatsisartut inatsisaanni allanngortitsinissaq pillugu Inatsisartut inatsisissaattut siunnersuut”

(erseqqissaaneq toqqortaatit elektroniskiusut pillugit, malittarisassat ataatsimut katersat originaliusut allagaateqarfimmi ataatsimoortitat aamma toqqortaatinik atortitsisarnermi atugassarititaasut)

Ilanngullugu nassiunneqarpoq siunnersuut: Allagaateqarfeqarneq pillugu Inatsisartut inatsisissaanni allanngortitsinissaq pillugu Inatsisartut inatsisissaattut siunnersuut, Inatsisartut 2018-imi upernaakkut ataatsimiinneranni saqqummiunniarneqartoq. (UPA 2018).

Allannguutissatut siunnersuummi erseqqissaasoqarpoq allagaatit toqqortassat elektroniskiusut pineqarmata, toqqortaatigineqartussat aaqqissuussinermi, allagaatinut elektroniskiusunut toqqorsivinnut nuunneqarsinnaasunngorlugit.

Ilanngullugulu aamma aalajangersakkamik ilanngussisoqarpoq Naalakkersuisut aalajangersinnaasut Inatsisartut inatsisaat, Inatsisartut peqqussutaat, Namminersornerullutik Oqartussat aamma Namminersorlutik Oqartussat nalunaarutaat kiisalu kommunini ileqqoreqqusat atsiukkat originaliusut immikkut aalajangikkami toqqorsivimmi toqqortarineqarsinnaasut.

Tamatuma saniatigut ”Kalaallit Nunaanni Kommunit Kattuffiat, KANUKOKA” peerneqarpoq allagaateqarfeqarneq pillugu inatsimmit, taarserneqarlunilu ”kommuninit”.

Siunnersuummi aamma ilaavoq ilassut, Nunatta Katersugaasiviata Allagaateqarfiatalu allagaatinik toqqortanik ingerlatsivinnut allanut atortitsinerminut atatillugu piumasaqaatinik atugassarititaasunik aalajangersaasinnaalersoq.

Allannguutissatut siunnersuutaasut kingunerisaannik siunnersuutaapput pineqaatissiissuteqarsinnaanermut aalajangersakkani allannguutit iluarsiinerit.

Siunnersuutip tunuliaqutai, aamma siunnersuutip siunertaa imarisaalu pillugit siunnersuummut oqaaseqaatit innersuunneqassapput.

Siunnersuummut oqaaseqaataasinnaasut Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfimmut tunniunneqareersimassapput kingusinnerpaamik ulloq 11. december 2017.
Oqaaseqaatit Naalakkersuisoqarfiup pisortatigoortumik e-mail adressianut uunga nassiunneqassapput:

ikiin@nanoq.gl, imaluunniit Naalakkersuisoqarfiup pisortatigoortumik allakkanut adressianut uunga: Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfik Postboks 1029, 3900 Nuuk.

Sammisaq:

Digitalinngortitsineq

Tusarniaanerup suunera:

Inatsisartut inatsisaat

Saqqummiunneqarfia:

06 novembari 11:11:00

Tusarniaanermi piffissaliussaq:

11 decembari 23:30:00

Tusarniaanermi akissutit uunga nassiuteqquneqarput:

ikiin@nanoq.gl