Meeqqanik ikiorsiisarneq pillugu Inatsisartut inatsisissaannut siunnersuut pillugu ilassutaasumik tusarniaaneq

Matumuuna Ilaqutariinnermut, Naligiissitaanermut, Isumaginninnermut Inatsiseqarnermullu Naalakkersuisoqarfiup meeqqanik ikiorsiisarneq pillugu Inatsisartut inatsisissaattut siunnersuut nr. xx, xx.xx.2016-imeersoq aappassaaneertumik tusarniaassutigalugu nassiuppaa.

Siunnersuummik siullermeertumik ilassutaasumik tuarniaanermi akissutitut tiguneqartuni arlalinni siunnersuummik isummersornissamut, sukumiinerusunillu tusarniaanermut akissutinik suliaqarnissamut piffissamik annertunerusumik pisariaqartitsisoqarneranik oqariartuuteqarneq tamatumunnga tunngaviuvoq.

Taamaammat meeqqanik ikiorsiisarneq pillugu Inatsisartut inatsisissaattut siunnersuut nr. xx, xx.xx 2016-imeersoq piffissami 9. december 2016-imit 13. januar 2017-ip tungaanut nutaamik ilassutaasumik tusarniaassutigalugu nassiunneqarpoq. Peqatigisaanillu siunnersuut Namminersorlutik Oqartussat tusarniaanermut nittartagaatigut ilassutaasumik tusarniutigalugu tamanut saqqummiunneqarpoq.

Tusarniaanermut akissuteqarnissamut killiliussaq: Tallimanngorneq ulloq 13. januar 2017

Tusarniaanermut akissutit e-mailikkut iniian@nanoq.gl allakkatigulluunniit Isumaginninnermut, Ilaqutariinnut, Naligiissitaanermut Inatsisinillu atortitsinermut Naalakkersuisoqarfik, Postboks 260, 3900 Nuuk nassiunneqassapput.

 Aappassaanik ilassutitut tusarniaanermut tunngavilersuut:

Inatsisissatut siunnersuut piffissami 26. maj 2016-imit 30. juni 2016-imut sapaatit akunnerini tallimani tusarniaassutigineqaqqaarpoq.

Piffissap tusarniaaffiusup naanerani tusarniaanermut akissutini siunnersuut assigiinngitsutigut pitsanngorsarneqarnissaa kaammattuutigineqarpoq, tassunga ilanngullugu taassuma ilusaa imarisaanullu tunngasut. Taamaammat taakku eqqarsaatigalugit allannguutit arlallit suliarineqarput. Ingammillu kommunimi ingerlatsiviit iliuuseqarnissamut pisussaaffiinut sivikippallaamik piffissaliisoqarneranik isornartorsiuinerit tusaaniarneqarput, taamaalillunilu piffissaliussat sivitsorneqarlutik.

Tamatuma kingorna tusarniaanermi akissuteqartut tusarniaanermut akissutaaqqaartunut akissutitut tiguneqartut siunnersuummut ilanngussuunneqarnerat pillugu ilassutaasumik tusarniaanermut akissuteqarnissamut periarfissinniarlugit, siunnersuut piffissami 19. augustimit 9. september 2016-imut sapaatit akunnerini pingasuni ilassutaasumik tusarniaassutigineqarpoq.

Siunnersuummik ilassutaasumik tusarniaanermut akissutini arlalinni siunnersuummut isummersornissamut, tusarniaanermullu akissutinik suliarinninnissamut piffissamik annertunerusumik pisariaqartitsineq oqaatigineqarpoq.

Tamatuma saniatigut siunnersuummi § 37, imm. 7, nr. 7-imi piginnaatitsisuummik aalajangersakkamik attavigisanut inissiisarnernut erseqqinnerusumik malittarisassiorsinnaanermut periarfissiisoqarpoq. Taassumalu saniatigut siunnersuut allanngortinneqanngilaq.

Taamaammat meeqqanik ikiorsiisarneq pillugu Inatsisartut inatsisissaattut siunnersuut nr. xx, xx.xx 2016-imeersoq piffissami 9. december 2016-imit 13. januar 2017-ip tungaanut nutaamik ilassutaasumik tusarniaassutigalugu nassiunneqarpoq.

Siunnersuut aallaqqaammut 2016-imi Inatsisartut ukiaanerani ataatsimiinneranni siullermeerneqartussanngorlugu, aappassaaneerlugulu pingajussaaneerlugulu suliarinissaa Inatsisartut 2017-imi upernaakkut ataatsimiinnerani pinissaa naatsorsuutigalugu saqqummiunneqartussatut nalunaarutigineqarpoq.

Tusarniaanermut akissummik suliaqarnissamut piffissaqarnerunissamik kissaateqarneq patsisigalugu, siunnersuut 2016-imi Inatsisartut ukiaanerani ataatsimiinnerani suliarineqarnissaa tunuartinneqarpoq. Siunnersuut 2017-imi Inatsisartut upernaakkut ataatsimiinneranni suliarineqartussatut ilanngunneqarnissaa naatsorsuutigineqarpoq.

Kommunit inatsisip atuutilertinneqarnerani kingornalu suliat ingerlanneqarnerani pingaarutilimmik akuunissaannik kissaateqarneq aallaavigalugu, inatsit naapertorlugu nalunaarutit inatsimmullu ilitsersuutit iliuuseqarnissamut sammisuunissaat kommunimilu ingerlatsiviit pisariaqartitaannut sammitinneqarnissaat qulakkeerniarlugu, 2017-imi upernaakkut kommunini ingerlatsivinnit peqataatitsilluni sulinermut atatillugu isumasioqatigiinnissat marluk ingerlanneqarnissaat pilersaarutigineqarpoq.

Tusarniaaqqaarnermi ilassutitullu tusarniaanermi, tusarniaanermut allakkiat ilanngullugit nassiunneqarput, taakkunanilu tusarniaanermut akissutit tamakkiisut naqinneqarput, taamattaarlu kaammattuutit suut tamakkiisumik ilaannakortumilluunniit siunnersuummut ilanngunneqarsimanerat paasissutissiissutigineqarluni.

Siunnersuut pillugu:

Ilaatigut akisussaaffimmik sulianillu agguataarinerit ersarinnerulersinniarlugit, suliamik ingerlatsinerup meeqqallu pisinnaatitaaffiisa patajaallisarnissaat siunnersuutip siunertaraa. Sivisunerusumik ulloq unnuarlu paaqqinniffinniititsinerit pinngitsoortinniarneqassasut, kommunillu angajoqqaarsianut inissiinernik aaqqissuussineri atorneqarnerussasut siunnersuummi kaammattuutigineqarput. Siunnersuut suliniuteqajaarnissamik pinaveersaartitsinermillu aallussivoq, tamannalu ungasinnerusoq isigalugu meeqqat ikinnerusut angerlarsimaffiup avataanut inissinneqartarnissaannut ilaqutariillu nukittunerulernissaannut ikorfartuisuussaaq. Siunnersuutip ingerlatsinermi oqartussaasut kommunillu akornanni meeqqanut, inuusuttunut angajoqqaanngortussanullu amerlanerusunik pitsaanerusunillu ikiorsiisarnermut periarfissiissaaq.

Inatsisitigut tunngavinnut maanna atuuttunut sanilliullugu allannguutit pingaarnerit tassaapput:

  • Malinnaalluarnerunissaq siunertaralugu nuna tamakkerlugu nalunaarutiginninnernut atortorissaaruteqalernissaq
  • Naammagittaalliorsinnaanermut pisinnaatitaaffimmik pitsanngorsaaneq - meeqqat sulianut namminermut tunngasunut naammagittaalliorsinnaanermut pisinnaatitaaffeqalissapput
  • Inissisimanermik akisussaaffimmillu agguataarinninneq ersarinnerulersinneqassaaq - kina, suna, qanoq qaqugulu?
  • Nalunaarutiginninnernik suliani iliuuseqarnissamut pisussaaffeqarneq, taakkununngalu piffissaliussat
  • Meeqqanik inissinneqarsimasunik angerlartitsineq piffissaqarluarluni assigiimmillu pilersaarusiorneqartassaaq
  • Ulloq unnuarlu paaqqinniffiit Naalakkersuisunit akuerineqartassapput ingerlatsinissamullu isumaqatigiissusiorfigineqartassallutik
  • Angajoqqaarsiat kommunimit angajoqqaarsiaasinnaanermut paaqqinninnissamullu akuersissutinik peqartassapput
  • Suliniuteqareernermi malinnaatitsisarneq annertuumik pitsanngortinneqassaaq
Inatsisissatut siunnersuummi suliniuteqareernermi malinnaatitsisarneq, angajoqqaanngortussani siusissumik pinaveersaartitsisumik suliniuteqajaarneq  isumaginninnermullu tunngasunik misissuinernik patajaallisaavoq. Ataatsimut isigalugu siunnersuutikkut meeqqanut inuusuttunullu inissinneqartussatut aarlerinartorsiortunut, meeqqanullu inuusuttunullu inissinneqareersunut suliniarnerup pitsaassusaa qaffassarneqassaaq. Inatsisissatut siunnersuut aqqutigalugu pinaveersaartitsinermik suliaqarnerit annertusineqarnerisigut ikiorsiissutinillu pissarsisinnaanerup pitsaanerulerneratigut inissiisarnerit ikilinissaannut peqataaqataasussatut naatsorsuutigineqarpoq.

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

14 decembari 15:36:00

Tusarniaanermi piffissaliussaq:

13 januari 23:30:00

Tusarniaanermi akissutit uunga nassiuteqquneqarput:

iniian@nanoq.gl