Danmarkimi efterskolimiinnermut tapiissuteqartarneq pillugu Namminersorlutik Oqartussat nalunaarutissaannut siunnersuut pillugu

Matumuuna nassiunneqarpoq Namminersorlutik Oqartussat nalunaarutissaannut siunnersuut, Danmarkimi efterskolernermut tapiissuteqartarneq pillugu, suliassaqarfimmi tassani nalunaarummut maanna atuuttuusumut taartaasussaq, Danmarkimi efterskolimiinnermut tapiissuteqartarneq pillugu Namminersorlutik Oqartussat nalunaarutaannut nr. 22, 23. december 2013-imeersumut.

Nalunaarummik allannguinermi uani pingaarnertut siunnerfiuvoq pissusissamisoortinneqarmat aningaasartuutit meeqqat efterskolernissaannut atorneqartussat assigiinnissaat, meeraq Kalaallit Nunaanni imaluunniit Danmarkimi efterskolertinneqarpat. Tamatumalu saniatigut allannguinerit annikinnerusut allat aamma suliarineqarput, nalunaarummik nutarterinermut atatillugu.  

Nalunaarummi nutaami allannguutit pingaarnerit:

  • Immikkut tapiissuteqartarnerup aamma nalinginnaasumik tapiissuteqartarnerup immikkoorneri atorunnaarput. Kalaallit atuartut tamarmik siumut sammisumik Danmarkimi efterskolernissamut qinnuteqarsinnaalerput, tapiissutissallu tunniunneqartassallutik angajoqqaatut oqartussaassuseqartut isertitaannik tunngaveqartumik. Aningaasanut inatsimmi annertussutsinik aalajangersaasoqartassaaq, tapiissutissat annertussusissaannut aalajangiisuusussanik. Aalajangersagaq minnerpaamik nammineq sapaatip akunneranut 300 kr.inik akiliuteqartarnissaq atorunnaarpoq, ammaanneqarlunilu periarfissaq, annikitsunik isertitaqartartuni angajoqqaatut oqartussaassuseqartut akiliutissaasa tamakkiisumik tapiissutitsigut matussuserneqartalernissaat.
  • Aningaasaliissutissat immikkoortitanut killiligaajunnaarput, aningaasanulli inatsimmi annertussusissanik aalajangersakkat naapertorlugit qinnuteqartunut tamanut piumasaqaatinik naammassinnittunut tapiissuteqartoqarsinnaalissalluni.
  • Qinnuteqarnissaq sioqqullugu ukiuni marlunni kingullerni isertitat akileraarutaasussat aallaavigineqartarunnaarput. Periaatsimik nutaajungaatsiartumik atuisoqalerpoq, piffissap ingerlanerani pisortat ingerlatsiviini arlaqarnerusuni atorneqalertussaasumik. Tassani pineqarput akileraarutaasussatut isertitat ilanngaatitaqanngitsut, Naalakkersuisoqarfiup pissarsiarisinnaasai angajoqqaatut oqartussaassuseqartut imaluunniit inoqutigiit illoqatigiittut cpr-normui atorlugit.   
  • Qinnuteqarnermut akileraarutaasussat isertitat pillugit paasissutissat ilanngunneqartarunnaassapput, Naalakkersuisoqarfiup siunissami nammineq isertitanut tunngasumik paasissutissat taakkua pisariaqartut pissarsiarisinnaammagit.
  • Naalakkersuisut tapiissutinik akilerneqarsimasunik utertitsilluni akiliisoqarnissaanik piumasaqarsinnaanerat annertusineqarpoq, ilaatigut ilanngunneqarmat efterskolernissamik aallartitsinnginnermi angalanerup inniminnerneqarsimallunilu akilerneqareerfigisai, ilinniartullu efterskolimiinnerata ima sivikitsiginera pissutigalugu oqartoqarsinnaappat ilinniakkamik aallartitsisimanngitsoq, taamaatinnerlu naammattumik tunngavilersorneqarsinnaanngitsoq.  
  • Qinnuteqarnissamut piffissaliineq peerneqarpoq. Efterskolernissamut ingerlaavartumik qinnuteqartoqarsinnaavoq, maanna isertitanik tunngaveqartunik qinnuteqartunut tamanut tapiissuteqartoqarsinnaalermat, piumasaqaatinik naammassinnittunut. Taamaattoq suli piffissaliisoqarpoq Naalakkersuisoqarfiup Danmarkimut angalanissamik isumaginnittussaanerani. Piffissaliussaq tassani 15. marts-iuvoq.
  • Angajoqqaatut oqartussaassuseqartut Danmarkimut utimullu angalanerannut tapiissuteqartoqartassaaq, ilinniartup napparsimarulunnerani imaluunniit toqunerani.
  • Ilinniartup atuarfianiit oqaaseqaateqartoqarnissaanik piumasaqaat peerneqarpoq, oqaaseqaat atorneqarneq ajormat.
  • Kuisinnermut allagartaq, najukkamut uppernarsaat aamma karakterinut uppernarsaat tamatigut ilanngullugit nassiunneqartussaapput.

Oqaaseqaataasinnaasut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut tunniuneqareersimassapput kingusinnerpaamik ulloq 11.11 2016. Oqaaseqaatit nassiuteqqunneqarput Naalakkersuisoqarfiup pisortatigoortumik mail-adressianut: IKIIN@nanoq.gl imaluunniit Naalakkersuisoqarfiup allakkanut adressianut: Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik, Postboks 1029, 3900 Nuuk.

Inussiarnersumik inuulluaqqusillunga

Helle Mellemgaard Sørensen

Inatsisileritooq, IKIIN

Sammisaq:

Ilinniartitaaneq

Tusarniaanerup suunera:

Nalunaarummut siunnersuut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

10 oktobari 08:59:00

Tusarniaanermi piffissaliussaq:

11 novembari 00:00:00

Tusarniaanermi akissutit uunga nassiuteqquneqarput:

ikiin@nanoq.gl