Tusarniaaneq Siunnersuummut uunga tunngasoq: Kalaallit Nunaanni Nunat Aqqinik Aalajangiisartut pillugit Inatsisartut inatsisaat

Kalaallit Nunaanni Nunat Aqqinik Aalajangiisartut pillugit Inatsisartut inatsisissaattut siunnersuutip tusarniutigineqartoq ilanngunneqarpoq, taanna Inatsisartunit 2017-imi upernaakkut (UPA 2017) suliarisassanngorlugu nassiunneqarumaarpoq.

Siunnersuut annertunerusumik siunnersuutip piffissami 2016-imi 20. majimiit 24. junip tungaanut tusarniaassutigineqartup aalajangersagartaanik ingerlatitseqqiineruvoq.

Siunnersuummut tassunga atatillugu ataasiakkaanik allannguisoqarsimavoq.

Massakkut erseqqissaatigineqarpoq, Nunat Aqqinik Aalajangiisartut Namminersorlutik Oqartussat ataani immikkoortortaqarfiusoq.

Tamatuma saniatigut nunat aqqinik aalajangiisartut katitigaanerat pillugu aalajangersagaq allanngortinneqarpoq. Massakkut aalajangersarneqarpoq, nunat aqqinik aalajangiisartut ilaasortai 5 tamarmik Naalakkersuisunit toqqarneqartassasut suliffeqarfinnit soqutigisaqatigiinnillu siunnersuummi inassuteqarsinnaatitaasutut taaneqartunit innersuussuteqarneq malillugu. Innersuussisinnaatitaasut nutaat siunnersuutigineqaqqaartumut sanilliullugu tassaapput Ilisimatusarfik aamma Asiaq.

Erseqqissaatigineqarpoq, nunat aqqinik aalajangiisartunut ilaasortat tamarmik susassaqarfiit taakku iluanni tamarmiullutik sinniisoqarfigisassaanni minnerpaamik ataaseq piginnaasaqarfigissagaat.

Aamma nunat aqqinik aalajangiisartunut ilaasortaajunnaarsitsinissamut piginnaatitsineq massakkut taamaallaat Naalakkersuisuniippoq. 

Aamma siunnersuummut nassuiaatini erseqqissaatigineqarpoq, Naalakkersuisut periarfissaqartut nunat aqqinik aalajangiisartut qinnuigissallugit suliaq suliareqqinneqassasoq, tamatumunnga piviusorsiortumik tunngavissaqartoqarpat.

Siunnersuummut tunuliaqutaasoq, siunertaasoq aamma imarisai pillugit siunnersuummut nassuiaatit innersuussutigineqarput.

Siunnersuummut oqaaseqaataasinnaasut Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfimmit kingusinnerpaamik ulloq 20. januar 2017-imi tiguneqareersimassapput.

Oqaaseqaatit naalakkersuisoqarfiup pisortatigoortumik e-mailianut nassiunneqassapput:

ikiin@nanoq.gl, imaluunniit naalakkersuisoqarfiup allakkatigut najugaqarfianut: Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfik, Postboks 1029, 3900 Nuuk.

Sammisaq:

Kulturi

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

15 decembari 14:15:00

Tusarniaanermi piffissaliussaq:

20 januari 23:30:00

Tusarniaanermi akissutit uunga nassiuteqquneqarput:

ikiin@nanoq.gl