Uunga siunnersuut: Inatsisartut inatsisaat nr. xx af xx. xxxx 201x-imeersoq Pisortanit Allakkat Digitaliusut

Nuna tamakkerlugu digitalinngortitsinermut periusissiap, 2014-imiit 2017-ip tungaanoortup, ilaatut Kalaallit Nunaanni Namminersorlutik Oqartussat maannamut digitali atorlugu allakkatigut aaqqiissummik, NemPostimik, pilersitsivoq, innuttaasut piumassusertik tunngavigalugu atorsinnaasaannik. Allakkatigut aaqqiissut NemPosti, innuttaasut pisortat oqartussaqarfiinik attaveqaqateqarneranni digitalimik allagarsisarfik isumannaatsoq atorlugu nassitsisinnaanermik neqeroorutaavoq. Aammali pisortat oqartussaqarfiinik attaveqaqatiginnissutit tamakkerlugit digitali atorlugu toqqorsimatinnissaannik neqeroorutaalluni.

Pisortatigoortumik nalunaarutinik aamma allakkianik nassitsisut maannamut taamaallaat killilimmik NemPostimik atuisinnaapput. Nalunaarutit aamma allakkiat innuttaasumut iluaqusiinngitsumik aalajangiinermik imallit innuttaasumut apuussimanerat qulakkeerneqarsinnaanngilaq, maannamut tamatumunnga tunngatillugu erseqqissumik inatsisitigut tunngavissaqanngimmat.

Siunnersuut aqqutigalugu qulakkeerneqassaaq inatsisitigut erseqqilluinnartumik tunngavissalimmik pisortatigoortumik nassitsisut digitalimik aaqqiissut Pisortanit Allakkat Digitaliusut atorsinnaagaat. Aammali innuttaasut aamma inatsisit naapertorlugit ingerlatsiviit, digitalimik allakkatigut aaqqiissut atorlugu pisortanut nalunaarutinik aamma allakkianik nassitsisut nalunaarutit apuuttutut naatsorsuutigissagaat qulakkeerumallugu.

Allakkatigut aaqqiissut tunngaviusumik pinngitsoorani ilanngunnissamik aallaaveqarpoq. Pinngitsoorani ilanngunnissamut pingaarnertut tunngavik tassaavoq periarfissallit allagarsiassatik digitali atorlugu tigusassagaat.

Siunnersuummili aamma pisussaatinneqannginnissamik periarfissaqassasoq innersuussutigineqarpoq.

Pisussaatinneqannginnissamut malittarisassanik erseqqinnerusunik Naalakkersuisut nalunaarutikkut aalajangersaassapput.

Pisussaatinneqannginnissamut aalajangersakkat ilusilersorneqarnerat atuutilersitsinerup nalaani pissutsit aallaavigalugit pissaaq, taamaalillunilu it’eqarnikkut piareersimassuseq isiginiarneqassalluni. Tamatuma kingorna pisussaatinneqannginnissamut aalajangersakkat naleqqussarneqassapput, Kalaallit Nunaanni it’eqarnikkut piareersimassutsip ineriartornera ilutigalugu.

Allakkatigut aaqqiissummut pinngitsoorani ilanngunnissamut aalajangersakkanik atuutilersitsinissamik Naalakkersuisut pisinnaatitsinissamik periarfissamik atuinissaat pitinnagu

inatsit inunnut aamma inatsisit naapertorlugit ingerlatsivinnut piumassutsimik ilanngunnissamut periarfissaassaaq.

Sammisaq:

Digitalinngortitsineq

Tusarniaanerup suunera:

Inatsisartut inatsisaat

Tusarniaanermi piffissaliussaq:

30 decembari 23:59:00

Tusarniaanermi akissutit uunga nassiuteqquneqarput:

digitalisering@nanoq.gl