Atornerluineq pillugu Inatsisartut inatsisissaattut siunnersuummut tusarniaaneq

Ilanngullugu nassiunneqarpoq tusarniaassutigineqartussaq: Atornerluineq pillugu Inatsisartut inatsisissaattut siunnersuut. Inatsisissatut siunnersuut Inatsisartut 2017-imi upernaakkut ataatsimiinnissaanni saqqummiunneqarnissaa naatsorsuutigineqarpoq.

Peqqissutsimut Naalakkersuisoqarfiup qinnuigissavaasi inatsisissatut siunnersuutip tusarniaassutigineqarneranut akissuteqassagussi tamanna piaarnerpaamik nassiuteqqullugu kingusinnerpaamillu ulloq 10. decembari 2016 nal. 12:00.

Tusarniaanermi akissuteqaatit Peqqissutsimut Naalakkersuisoqarfimmut nassiuteqquneqarput uunga pn@nanoq.gl aamma uunga mast@nanoq.gl.

Inatsisissatut siunnersuutip siunertaa 

Inatsisissatut siunnersuutip siunertaraa atornerluinermut katsorsaasarnerup malittarisassaliuunneqarnissaa. Inatsisissatut siunnersuutip aammattaaq siunertaraa atornerluinermut killiliussat aaqqissuussat aalajangersaavigineqarnissaat.

Siornatigut inatsisissatut siunnersuusiortoqarsimanngilaq ataatsimut atornerluinermut katsorsartinnermik malittarisassiuussisumik.

Inatsisissatut siunnersuut imaqarpoq innersuussisarnermut maleruaqqusanut aalajangersakkanik, kommuninik aamma peqqinnissaqarfimmi oqartussaasunik suleqateqarneq pillugu aamma katsorsartinnerup kingunerinik nalunaarsuinermut piumasaqaammik.

Atornerluinermut ilisimasanik qitiusoqarfiliornissaq, Allorfimmik, nutaaliorneruvoq. Allorfiup atornerluinermut iliuuserineqartut ataatsimoortillugit ataqatigiissaartassavai aamma atornerluinermut tunngasunik ineriartortitsinermut atatillugu nutaaliussalluni. Inatsisissatut siunnersuutip nassuiarpai Allorfiup suliassai aamma suliassat najukkani Allorfinnut, kommunini tamani pilersinneqartussani, suliassanngortinneqartunik.

Allorfik aaqqissuussaanermi Peqqissutsimut Naalakkersuisoqarfimmut atavoq aqunneqassallunilu siulersuisunit aamma qitiusoqarfimmi pisortamit.


Inussiarnersumik inuulluaqqusillunga

Mary Stisen
Inatsisitigut siunnersorti Peqqissutsimut Naalakkersuisoqarfik

Sammisaq:

Peqqinnissaq

Tusarniaanerup suunera:

Inatsisartut inatsisaat

Naalakkersuisoqarfik:

Peqqissutsimut Naalakkersuisoqarfik

Saqqummiunneqarfia:

04 novembari 19:02:00

Tusarniaanermi piffissaliussaq:

10 decembari 12:00:00

Tusarniaanermi akissutit uunga nassiuteqquneqarput:

pn@nanoq.gl aamma mast@nanoq.gl