Tusarniaaneq Siunnersuummut uunga tunngasoq: Kalaallit Nunaanni Oqaasiliortut pillugit Inatsisartut inatsisaat

Kalaallit Nunaanni Oqaasiliortut pillugu Inatsisartut inatsisissaattut siunnersuutip tusarniutigineqartoq ilanngunneqarpoq, taanna Inatsisartunit 2017-imi upernaakkut (UPA 2017) suliarisassanngorlugu nassiunneqarumaarpoq.

Siunnersuut annertunerusumik siunnersuutip piffissami 2016-imi 20. maajimiit 24. juunip tungaanut tusarniaassutigineqartup aalajangersagartaanik ingerlatitseqqiineruvoq.

Siunnersuummut tassunga atatillugu ataasiakkaanik allannguisoqarsimavoq.

Tusarniaanermi akissuteqaatit siunnersuummi ataasiakkaanik allannguilaarnissamik tunngavissiipput soorluttaaq nassuiaatini erseqqissaasoqarlunilu ilanngussisoqarpoq.

Oqaasiliortut suliassaqarfiat annertusineqarpoq kalaallisut taaguusersuutinik oqaaser­siaasunik akuersisartunngorlugit, siunnersuummi § 2, imm. nr 2. naapertorlugu. Aala­jangersakkami nr. 3-mi suliassaqarfinni taaguusersuutinik akuersisarnermut ilagitillugu suliassaq taanna Oqaasiliortut suliassaannut pingaarnermut ilaanngilaq, tassa kalaallit oqaasiisa ineriartornerannik malittarinninnissamut. Erseqqissar­neqar­por­taaq sulinermi oqariartaatsit suliaqarfinnilu aalajangersimasuni oqaasilioriaatsit ator­ne­qarnerat pisortat ingerlatsiviinut pisussaaffiusoq.

Siunnersuummi § 2-mi, imm. 3-mi oqaasertaliorneri aammattaaq allanngortinneqarput taamaasilluni oqaaseq  ”akuersisartoq” oqaatsimut ”inassuteqaat”-imik taarserneqarluni aammalu erseqqissarneqarluni oqaatsinik erseqqissaanerit akuersisarnerillu Oqaasili­ortunit isumagineqartartut.

Aamma massakkut erseqqissaatigineqarpoq Oqaasiliortut Namminersorlutik Oqartussat ataani immikkoortortaqarfiusoq.

Tamatuma saniatigut oqaasiliortut katitigaanerat pillugu aalajangersagaq allanngortinneqarpoq. Massakkut aalajangersarneqarpoq, oqaasiliortut ilaasortai 5 tamarmik Naalakkersuisunit toqqarneqartassasut suliffeqarfinnit soqutigisaqatigiinnillu siunnersuummi inassuteqarsinnaatitaasutut taaneqartunit innersuussuteqarneq malillugu. Innersuussisinnaatitaasut nutaat siunnersuutigineqaqqaartumut sanilliullugu tassaapput Nunatta Atuagaateqarfia, Tusagassiortut Peqatigiiffiat aamma suliatigut kattuffik ataaseq, oqalutsit nutserisullu ilaallutik.

Erseqqissaatigineqarpoq oqaasiliortunut ilaasortat tamarmik susassaqarfiit taakku iluanni oqaasiliortut tamarmiullutik sinniisoqarfigisassaanni minnerpaamik ataaseq piginnaasaqarfigissagaat. Aammattaaq siunnersuummi § 6 imm. 4-mut ilan­ngus­siso­qar­poq, tassa aalajangersarneqarami Oqaasiliortunut ilaasortat ilaat min­ner­paamik ataaseq oqalutsit nutserisullu suliassaannik piginnaasaqassasoq.

Aamma oqaasiliortunut ilaasortaajunnaarsitsinissamut piginnaatitsineq massakkut taamaallaat Naalakkersuisuniippoq. 

Aamma siunnersuummut nassuiaatini erseqqissaatigineqarpoq, Naalakkersuisut periarfissaqartut oqaasiliortut qinnuigissallugit suliaq suliareqqinneqassasoq, tamatumunnga piviusorsiortumik tunngavissaqartoqarpat.

Siunnersuummut tunuliaqutaasoq, siunertaasoq aamma imarisai pillugit siunner­suum­mut nassuiaatit innersuussutigineqarput.

Oqaaseqaataasinnaasut Ilinniartitaanermut, Kultureqarnermut, Ilinniartitaanermut Ila­gee­­qar­nermullu Naalakkersuisoqarfimmit kingusinnerpaamik ulloq 20. januar 2017-mi tiguneqareersimassapput.

Oqaaseqaatit naalakkersuisoqarfiup pisortatigoortumik e-mailianut nassiunneqassapput:

ikiin@nanoq.gl, imaluunniit naalakkersuisoqarfiup allakkatigut najugaqarfianut: Ilinniartitaanermut, Ilisimatusarnermut, Kultureqarnermut, Ilageeqarnermullu Naalakkersuisoqarfik, Postboks 1029, 3900 Nuuk.

Sammisaq:

Kulturi

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

15 decembari 14:23:00

Tusarniaanermi piffissaliussaq:

20 januari 23:30:00

Tusarniaanermi akissutit uunga nassiuteqquneqarput:

ikiin@nanoq.gl