Pillugu: Folkehøjskolit pillugit Inatsisartut inatsisaata allanngortinnera pillugu Inatsisartut inatsisaattut siunnersuutip tusarniaassutiginera

Ilanngullugu tusarniaassutitut nassiunneqarpoq Folkehøjskolit pillugit Inatsisartut inatsisaata nr. 24, 18. november 2010-meersup allanngortinnissaa pillugu Inatsisartut inatsisissaattut siunnersuut.

Siunnersuutip pingaarnertut siunertaraa Kalaallit Nunaanni ilinniarfiit inissaannik atorluaanissap qularnaarnissaa, Kalaallit Nunaanni folkehøjskolit pitsaanerusumik atorneqarnissaasa qularnaarnerisigut. Siunnersuut suliarineqarpoq folkehøjskolit siunissami inissisimanissaat pillugu folkehøjskolinik oqaloqateqarnerit tunuliaqutaralugit, tamatumunnga ilanngullugit inatsisitigut aningaasaqarnikkullu pissutsit. 

Allannguutini ilaatigut pineqarpoq, ilinniartitsissutinik assassoriaanerusunik ilinniartitsinissap salliutinnerusinnaaneranut periarfissiinissaq, soorlu sullivinni ingerlatsinerit ilinniartitsinermi salliuinerusumik inissinnerisigut aamma pineqarpoq ilinniartunik meeqqat atuarfianni inaarutaasumik misilitsitsisinnaalernissaq. Aammattaaq siunnersuutip siunertaraa inissamik atuilluarnerunissaq ilutigisaanillu Namminersorlutik Oqartussat aningaasaliissutaasa ingerlassallu imminnut ataqatigiinnerulernissaasa qularnaarnissaat, tunngaviusumik tapiissuteqartitsillunilu sapaatip-akunneri ilinniartoqarfiusut aallaavigalugit taxamateri malillugu tapiissuteqartarnikkut. Aammattaaq siunnersuutip nassatarissavaa taxameteri malillugu tapiiffigineqartartut iluanni, ilinniartut ilinniarnerminnut akiliuteqartarnerisa atorunnaarsinneqarnerat, taamatuttaaq kommunit ilinniartut akiliutaannut akuutinneqartarnerat atorunnaarsinneqassaaq. Ilutigisaanik erseqqissarneqarpoq folkehøjskolit ingerlatsisut allat isumaqatigiissuteqarfigisinnarlugit ilinniartitsinernik allanik – højskolernerunngitsunik – neqeroorsinnaasut, taamatullu aamma ilinniartunut højskolertunut aningaasaliissutit immikkut ittut inatsisitigut tunngavissinnissaat siunnersuutaalluni.

Siunnersuutip folkehøjskolit ilinniartitsinermik nalinginnaasumik peroriartuutaasumik pingaarnertut ingerlatsisarnerat allanngortissanngilaa. 

Siunnersuutip tunuliaqutaanut, siunertaanut imarisaanullu erseqqinnerusumik paasissutissanut tunngatillugu siunnersuummut oqaaseqaatit innersuunneqarput.

Oqaaseqaataajunnartut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiutereeqquneqarput kingusinnerpaamik 24. januar 2017 tiguneqartussanngorlugit. Oqaaseqaatit naalakkersuisoqarfiup pisortatigoortumik emailianut nassiuteqquneqarput: ikiin@nanoq.gl, imaluunniit allakkatigut uunga: 

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik, Postbox 1029, 3900 Nuuk. 

Inussiarnersumik inuulluaqqusilluta

Marcus Dalro
Inatsisilerinermi immikkut siunnersorti
Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik

 

Sammisaq:

Ilinniartitaanermut Ilisimatusarnermullu

Tusarniaanerup suunera:

Inatsisartut inatsisaat

Saqqummiunneqarfia:

22 decembari 13:15:00

Tusarniaanermi piffissaliussaq:

24 januari 00:00:00

Tusarniaanermi akissutit uunga nassiuteqquneqarput:

ikiin@nanoq.gl