Inuusut toqusullu pillugit nalunaaruteqartarneq, ilisisarneq iliveqarfiillu pillugit Inatsisartut inatsisissaattut siunnersuut pillugu tusarniaaneq

Inuusut toqusullu pillugit nalunaaruteqartarneq, ilisisarneq iliveqarfiillu pillugit Inatsisartut inatsisissaattut siunnersuut tusarniutigalugu matumuuna nassiunneqarpoq.

Qinnuivigaassi siunnersuummut oqaaseqaatit Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfimmut kingusinnerpaamik ulloq 12. januar 2016 nassiuteqqullugit.

 

Siunnersuutip qulliunerusumik tunuliaqutaa

Iliveqarfiit pillugit Inatsisartut peqqussutaatigut nr. 6, 17. oktober 1990-imeersukkut (Iliveqarfiit pillugit peqqussut) iliveqarfinnik pilersitsisarneq, ilivernik iliveqarfinnillu atorunnaarsitsisarneq aamma iliveqarfimmi ilineqarsinnaatitaaneq pillugit malittarisassanik aalajangersagaqarpoq. Peqqussutitoqqap ukiuni 25-ni atuutereernerata kingorna nutarternissaa inuiaqatigiinni ineriartorneq eqqarsaatigalugu pissusissamisoortutut isigineqarpoq.

 

Inunngortunik toqusunillu nalunaaruteqartarneq pillugu aamma ilisisarneq toqusullu timaannik ikuallaasarneq pillugu tassunga peqatigitillugu malittarisassiornissaq tassunga atatillugu naleqquttutut isigineqarpoq.

 

Inatsisissatut siunnersuut taamaasilluni inunngortunik toqusunillu nalunaaruteqartarneq, ilisisarnernik toqusullu timaannik ikuallaasarneq, ilineqarsinnaatitaaneq, qummuattanik ilisisarneq arsanillu siaruarterisarneq, iliveqarfinnik pilersitsisarneq, inoqarfiunngitsuni iliveqarfiit, ilivernik iliveqarfinnillu atorunnaarsitsisarneq, iliverni eqqaassutissanik nalunaarsuisarneq, nakkutilliineq pineqaatissiisarnerlu pillugit malittarisassanik imaqarpoq naggasiullugulu piffissaq atuutilersitsivik aamma ikaarsaariarneq pillugu aalajangersakkat allaqqapput

Siunnersuummi immikkoortut pingaarnerit

Inunngortunik toqusunillu nalunaaruteqartarneq

Siunnersuutip akuersissutigineqarnerani inunngortunik toqusunillu nalunaaruteqartarneq pillugu nutaatut malittarisassiortoqarpoq. Nalunaaruteqartussaatitaaneq, sumut nalunaaruteqartoqartassanersoq, kikkut nalunaaruteqartassanersut kiisalu taakkununnga piffissarititat pillugit malittarisassat allaqqapput.

 

Ilisisarneq toqusullu timaannik ikuallaasarneq

Ilisisarneq toqusullu timaannik ikuallaasarneq pillugit aalajangersakkanik siunnersuummi nutaatut aalajangersaasoqarpoq. Siunnersuummi taamaalilluni aalajangersarneqarpoq toqusut timaat ilineqartassasut ikuallanneqarlutilluunniit. Tamassuma saniatigut allaqqavoq ilisinerit iliveqarfinni iliveqarfittulluunniit akuerisaasuni allani pisassasut aammalu sumiiffimmi toquffiusumi palasi atuagarsualerisoq ilisisarnermi oqartussaasuusoq. Ilisisoqarnissaa imaluunniit toqusup timaata ikuallanneqarnissaa ilisisarnermi oqartussamut qinnuiginnissutigineqarsinnaavoq. Tassunga peqatigitillugu  kikkut qinnuinnissinnaanersut qinnuiviginninnerillu pillugit maalaaruteqartoqarpat qanoq iliortoqartassanersoq killilersorneqarput.

 

Ilineqarsinnaatitaaneq, qummuattanik ilisisinnaatitaaneq arsanillu siaruaasinnaatitaaneq

Aalajangersakkat malittarisassanik atuuttunik ilaatigut ingerlatitseqqiinerupput innuttaasullu pisinnaatitaaffii killilersorneqarlutik. Taamaalilluni kikkulluunniit Kalaallit Nunaanni aalajangersimasumik najugaqartut imaluunniit Kalaallit Nunaanniikkallartut ilineqarsinnaatitaapput. Tassungali peqatigitillugu inuit Kalaallit Nunaannut immikkut atassuteqartut allat Kalaallit Nunaanni ilineqarnissaat akuerineqarsinnaavoq. Tamassuma sanitigut aalajangersarneqarpoq inuit Kalaallit Nunaanni Ilagiit iliveqarfiisa avataanni ilineqarnissaannik Biskoppi akuersisinnaavoq aammalu arsat allatut ileqqorissaarluni iliorneqarnissaannik akuersinissamut Biskoppi periarfissaqarpoq.

 

Iliveqarfinnik atuutilersitsineq

Aalajangersakkat mallittarisassanik atuuttunik ilaatigut ingerlatitseqqiinerupput taamaalillunilu kommunit ilagiillu akornanni akisussaaffiit pisinnaatitaaffiillu agguarneqarnerat ingerlatiinnarneqarluni. Tamanna naleqqunnerpaatut isigineqarpoq, tassa kommunit teknikkikut allaffissornermilu ilagiit, tassunga ilanngullugit ilagiit sinniisaasa, piginngisaannik isumalluuteqarmata. Kisiannili kommunini, peqqinnissaqarfinni ilagiinnilu oqartussat qanimut suli suleqatigiissapput.

 

Inoqarfiunngitsuni iliveqarfiit

Siunnersuummi erseqqissarneqarpoq inoqarfiunngitsuni iliveqarfiit iliveqarfittut nalunaaqutserneqassasut. Tamassuma saniatigut aalajangersarneqarpoq ilagiit sinniisaat pinnatik provsti nakkutilliisuussasoq, taamaalilluni iliveqarfinni taamaattuni qinnuteqartoqareerneratigut ilisisoqarnissaanik provsti aamma akuersisartuulluni.

 

Ilivernik iliveqarfinnillu atorunnaarsitsineq

Iliveqarfiit pillugit peqqussummi malittarisassanik ilaatigut ingerlatitseqqiisoqarpoq. Erseqqissarneqarpoq piffissaq eqqissisimatitsivik tassaasoq piffissaq ilerrit ataasiakkaat attorneqarfigisussaanngisaat, ilagiillu sinniisaasa inassuteqarnerisigut piffissamik eqqissisimatitsivissamik sivisunerusumik Biskoppi aalajangiisinnaasoq.

 

Iliverni eqqaassutissanik nalunaarsuineq

Iliverni eqqaassutissanik nalunaarsuisarneq pillugu malittarisassat ilanngunneqarnissaat pissusissamisoortutut isigineqarpoq, tassa taamatut nalunaarsuisarneq eqqumiitsuliornermi, kulturikkut oqaluttuarisaanermi allallu pissutigalugit pingaaruteqartutut isigineqarnerat. Nalunaarusiortarnerup inatsisitigut sunniutai aamma aalajangersarneqarput, tassa iliverni eqqaassutissat nalunaarsorneqarnikut iliveqarfimmit peerneqassanngimmata.

 

Nakkutilliineq pineqaatissiisarneq aamma piffissaq atuutilersitsivik

Biskoppip aalajangiineri Naalakkersuisunut maalaarutigineqarsinnaanerannut periarfissap aalajangersarnissaa pissusissamisoortutut isigineqarpoq, aammalu inatsimmi aalajangersakkanik aalajangersimasunik unioqqutitsinermi akiliisitsisoqarsinnaanera aalajangersarneqarluni.

 

Siunnersuummi naggasiullugu aalajangersarneqarpoq toqusut timaannik ikuallaasarneq pillugu aalajangersakkat, Avatangiisinik illersuineq pillugu inatsit naapertorlugu taamatut akuerisaasunik Kalaallit Nunaanni toqusut timaannik ikuallaasarfimmik ataatsimik arlalinnilluunniit pilersitsisoqarsimatinnagu Kalaallit Nunaanni toqusut timaannik ikuallaasarneq eqqarsaatigalugu atuutinngitsut.

 

Inussiarnersumik inuulluaqqusilluta

 

Lena B.M. Petersen

Inatsisileritooq/IKIIN

Tlf. 345742

 

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

09 decembari 09:20:00

Tusarniaanermi piffissaliussaq:

12 januari 00:00:00

Tusarniaanermi akissutit uunga nassiuteqquneqarput:

ikiin@nanoq.gl