Uunga siunnersuummut tusarniaaneq: Inatsisartut inatsisaat nr. xx ulloq xx. xxx 2016 uumassusillit sananeqaataasigut kingornuttagaasunik isumalluutit tamatumunngalu atatillugu suliniutit

 

Siunnersummi siunertaavoq, uumassusillit sananeqaataasigut kingornuttagaasunik isumalluutinik katersisarnerup iluaquteqartarnerullu, Kalaallit Nunaanni namminermi aammali isumalluutinik taamaattunik nunatsinneersunik nunatta avataani iluaquteqartarnerup siuarsarneqarnissaa, tamakkununnga anngussinnaanerup aqunneqarnissaa, iluanaarutinillu qanoq agguaassisoqartarnissaata maleruagassiuunnissaa. Ingerlaqqittumillu siunertaavoq isumannaassallugu Namminersorlutik Oqartussaat nalilinnit tamakkunannga naleqarnerulersitsisarnertigut pissarsiassanik ilisimasanillu naammaginartumik pissarsisarnissaat, tamatumani aamma aningaasarsiornikkut aningaasarsiornerullu avataani iluaqutissanik isumalluutinit uumassusilinnit sananeqaatinit kingornuttagaasunit Kalaallit Nunaanneersunit pissarsiassaqarnissaq. Kiisalu aamma siunnersummi siunertaasut ilagaat uumassusillit sananeqaataasigut kingornuttagaasunik isumalluutit Kalaallit Nunaanneersut ilisimaneqarnerulernissaat.  

 

Uumassusillit assigiinngisitaarnerat pillugu nunarsuarmiut isumaqatigiissutaanni aamma Nagoyami isumaqatigiissummut ilassummi qularnaarneqarput nuna pisuussutit pineqartut pinngorfigisaat pisinnaatitaaffeqartoq, naleqartitanit uumassusillit sananeqaataasigut kingornuttagaasunik isumalluutiniit naammaginartumik pissarseqataasarnissamut, isumaqatigiissummilu aamma siuarsarneqarpoq uumassusillit sananeqaataasigut kingornuttagaasunik isumalluutinut tunngasumik ilisimasat katersorneqartarnissaat, tamanullu paasissutissiissutigineqartarnissaat. Siunnersuut aalajangersakkanik imaqarpoq siunertaqartunik isumannaarneqassasoq inuiaqatigiit kalaallit aningaasarsiornikkut allatigullu uumassusillit sananeqaataasigut kingornuttagaasunik isumalluutinit iluaquteqarnerni iluaqutissarsiassaqarnissaannik, kiisalu aalajangersagaqarluni isumannaarisunik ilisimasat katersorneqartut ilisimatusaatigineqartarnissaannik, tamanullu paasissutissiissutigineqartar-nissaannik.

 

Siunnersuummut taaguut uumassusillit sananeqaataasigut kingornuttagaasunik isumalluutit atorneqartussatut toqqarneqarsimavoq. Tamannalu pissuteqarpoq inatsisip oqaasertaasa nunarsuarmiut uumassusillit assigiinngisitaarnerat pillugu isumaqatigiissutaanni aamma Nagoyami isumaqatigiissummi oqaasertaasunut naapertuuttumik aaqqissuukkumaneqarneranik, taakkunani aamma uumassusillit sananeqaataasigut kingornuttagaasunik isumalluutit qitiutillugit sammineqarmata, taakkuummata ilisimatusarnikkut aningaasarsiornikkullu naleqarsinnaasut.     

 

Oqaaseqaatissaqaraanni taakkua nassiunneqassapput uunga ISIIN@nanoq.gl aamma cabd@nanoq.gl kingusinnerpaamik ulloq 26. 01. 2015 nal. 12.00

Sammisaq:

Inuussutissarsiorneq

Tusarniaanerup suunera:

Inatsisartut inatsisaat

Naalakkersuisoqarfik:

Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik

Saqqummiunneqarfia:

22 decembari 16:35:00

Tusarniaanermi piffissaliussaq:

26 januari 12:00:00

Tusarniaanermi akissutit uunga nassiuteqquneqarput:

isiin@nanoq.gl