Sumiiffimmi Kalaallit Nunaanni Tunup kujataata imartaaniittumi, misissueqqaarnissamut akuersissummi 2012/41-imi pineqartunut ilaasumi, 2D-inik sajuppillatsitsisarluni misissuinermit paasissutissanik katersinissamut tunngatillugu avatangiisinik nalilersuinerup (VVM) tusarniaassutigineqarnera.

Aallaqqaasiut:

Kalaallit Nunaanni sinerissap avataani ikummatissanik misissuineq taamaallaat misissueqqaarnissamut akuersissut, ikummatissiassanik misissuinissamut aamma qalluinissamut kisermaassisussaatitaalluni akuersissut imalluunniit ilisimatusarnikkut misissuinissamut akuersissut naapertorlugu ingerlanneqarsinnaavoq.

Akuersissummik peqarnissap saniatigut pisinnaatitsissummik pigisaqartoq sinerissap avataani misissuinermik ingerlatassanik suliaqarsinnaanissamut akuersissuteqarnermik aalajangersimasumik piniaqqaassaaq. Sinerissap avataani misissuinermik ingerlatassanik suliaqarnissamut akuersissuteqarnissamut, pisinnaatitsissummik pigisaqartup aatsitassanut ikummatissanullu inatsimmi aammalu inatsisini allani atuuttuni aalajangersakkat, akuersissummi atugassarititaasut, malittarisassani Namminersorlutik Oqartussanit aalajangersagaasuni aalajangersakkat aammalu atugassarititaasut akuersissuteqarnermut allakkiami ilaatinneqartut naammassisimassagai piumasaqaataavoq.

Ingerlatassamik suliaqarnissamut akuersissuteqarnissaq pillugu qinnuteqaammik tunniussinissaq sioqqullugu, qinnuteqartoq suliassamut nassuiaammik, pinngortitami avatangiisinilu avatangiisitigut sunniinerit qanoq pakkersimaarneqarnissaannik eqqarsaataasunik saqqummiussiviusumik imaqartumik nassiussissaaq. Suliassap nassuiarneqarnera aallaavigalugu Pinngortitaleriffik (GN) aamma Nationalt Center for Miljø og Energi (DCE) nalilersuissapput, ingerlatassatut qinnuteqaatigineqartoq avatangiisinut annertuumik sunniisinnaassanersoq, taakkuinnaat isigalugit imaluunniit inuit ingerlataannut allanut pilersaarutaasunut ingerlanneqartunulluunniit ataqatigiissillugit.

Ingerlatassaq aatsitassanut ikummatissanullu inatsimmi pineqartunut ilaasoq avatangiisini annertuumik sunniisinnaasutut ilimagineqarpat, ingerlatassamut pilersaarutip akuersissuteqarfigineqarnera, avatangiisinut sunniutaasussanik nalilersuineq (VVM), tuluttut taaneqartartoq Environmental Impact Assessment - EIA, suliarineqareerpat aammalu VVM-imut nassuiaatip tamanut ammasumik tusarniaassutigineqareernerata kingorna Naalakkersuisunit akuersissuteqarfigineqareerpat, aatsaat pisinnaassaaq. Naalakkersuisut VVM-imut nassuiaammik akuersereersimatinnagit, ingerlatassanik suliaqarnissamut akuersissutit aamma akuersissuteqarnerit tunniunneqarsinnaanngillat.

Tusarniaanerup ingerlanera naammassippat, suliassap Naalakkersuisunut aalajangiiffigisassanngorlugu saqqummiunneqarnissaa sioqqullugu, Pinngortitaleriffik (GN) aamma Nationalt Center for Miljø og Energi (DCE) VVM-imut nassuiaammut aamma qinnuteqarnermut najoqqutassanik allanik ilaatigut tusarniaanermut akissuteqaatit tunngavigalugit inaarutaasumik nalilersuissapput. Avatangiisinut iliuusissani qinnuteqaammut najoqqutassani allaaserineqartuni, avatangiisinut aarlerinaataasut ataatsimoortut sapinngisamik annertunerpaamik annikillisinneqarnissaat ilungersuutigineqarsimasariaqarpoq.

Suliassamut nassuiaat:

TGS-NOPEC Geophysical Company ASA misissueqqaarnissamut akuersissummut nr. 2012/41-imut pisinnaatitsissummik pigisaqartuusutut Kalaallit Nunaanni Tunup kujataata avataani imaani sumiiffimmi (SEG15) 2D-imik sajuppillatsitsisarluni misissuinermit paasissutissanik 1.000 linjekilometerit tikillugit katersinissap akuersissuteqarfigineqarnissaa qinnuteqaatigaa. Qinnuteqartoq naliliivoq paasissutissanik nalunaarsukkanik katersineq qaammatit sisamat angullugit (2015-imi 5. julimiit 31. oktobarimut) sivisussuseqarsinnaassasoq.

Misissuinerit siunnersuutigineqartut sumiiffiit matoqqatinneqartut, imaani uumasut miluumasut illersorneqarnissaat eqqarsaatigalugu sajuppillatsitsisarluni ingerlataqarnissamik inerteqquteqarfiusut, avataanni inissisimassapput. Sumiiffiit imaani uumasunut miluumasunut illersuiffiusussat VVM-imut nassuiaammi annertuumik sammineqarput.

SEG15 angallammik sajuppillatsitsisartussamik aammalu angallatinik tapersersortaasussanik marluk angullugit amerlassusilinnik ingerlanneqassasoq pilersaarutigineqarpoq.

Oqaaseqaateqarnissamut tusarniaanermut killiliussaq

2D-inik sajuppillatsitsisarluni misissuinermit paasissutissanik nalunaarsukkanik katersinissamik qinnuteqaatigineqartumut VVM-imut nassuiaammut missingiummut nassiunneqartumut oqaaseqaatit Pinngortitamut, Avatangiisinut Inatsisinillu Atuutsitsinermut Naalakkersuisoqarfimmut (apn@nanoq.gl) kingusinnerpaamik ulloq 22. Juunip kl. 16.00 nassiuteqquneqarput.

Tusarniaalluni ataatsimiititsineq Nuummi ingerlanneqassaaq ulloq 25. Maajip kl. 12.00 – 16.00 Katuami.

Tusarniaanermut allakkiaq danskisooq tusarniaanermut nittartakkap danskisoortaani nassaarineqarsinnaavoq.

Tusarniaanermut allakkiat

Sammisaq:

Avatangiisit

Tusarniaanerup suunera:

Avatangiisinik nalilersuinerit

Saqqummiunneqarfia:

27 apriili 14:00:00

Tusarniaanermi piffissaliussaq:

22 juni 16:00:00

Tusarniaanermi akissutit uunga nassiuteqquneqarput:

apn@nanoq.gl