Timersorneq timigissarnerlu pillugit inatsimmut tunngatillugu tusarniaaneq

Timersorneq timigissarnerlu pillugu Inatsisartut inatsisissaattut siunnersuutip tusarni-utigineqartoq ilanngunneqarpoq, taanna Inatsisartut upernaakkut 2016-mi (UPA 2016) suliarisassanngorlugu nassiunneqassamaarluni.

Kulturikkut sunngiffimmilu sammisassaqartitsineq pillugu inatsisartut peqqussutaannik atuuttumik (Ip nr. 10, 21. maj 2002-meersoq) nutarterinermut atatillugu siunnersuut suliarineqarpoq.  Tassunga atatillugu naleqquttutut isigineqarpoq timersornermut timigissarnermullu tunngasut immikkut inatsimmi immikkoortinneqarpata.

Timersornermut tunngasut annertuutigut nukittorsarnissaat siunnersuummi anguniagaavoq.  Tassa imaappoq timersorneq timigissarnerlu.  

Siunnersuummi pingaarnertigut siunnerfigineqarpoq timersornermut tunngasut pisortat akisussaaffigisaattut erseqqinnerusumik inissisimalernissaat annertunerusumik pingaaruteqalernissaat, tassunga ilanngullugit pisortani oqartussat timersornermilu kat-tuffiit immikkoortumi akisussaaffii erseqqinnerulersillugit.

Siunnersuummi immikkoortup atuuffiusup killilernera peqatigisaanillu pingaarnertut siu-nertat aalajangersarneqarlutik.  Tassannga takuneqarsinnaavoq inatsisip annertuumik aamma siunertarigaa peqqinnissakkut inuuniarnikkullu siunertanut iluaqusiinissaq.  Timersorneq timigissarnerlu taamaattumik namminermi pingaartutut aamma allatigut inuiaqatigiinnut annertuumik pingaaruteqartunik siunertap anguneqarnissaanut sakkutut isigineqassapput.

Siunnersuummi immikkoortut pingaarnerit marluk isiginiarneqarput.  Siullermik timersor-nerup tapersersorneqarnera, tassunga ilanngullugit unammilluni timersorneq aamma timigissarneq.  Aappaatut nakorsaatit pissassaatitut atorneqartarnerinik aamma unam-minernik siumoortumik isumaqatigiissuteqarnernik pitsaaliuineq akiuinerlu.

Siunnersuut taamaalilluni timersornerup timigissarnerullu nunami tamarmi tapersersorneqarnissaanut aamma timersornermik timigissarnermillu neqeroorutit kikkunnut tamanut ammasuunissai pillugit pisortat akisussaanerat pillugit maleruagassanik imaqarpoq.

Siunnersuut aamma nakorsaatit pissassaatitut atorneqartarnerinik aamma unamminernik siumoortumik isumaqatigiissuteqarnernik pitsaaliuineq akiuiniarnerlu pillugit maleruagassanik imaqarpoq.  Tassaniipput siullermik pisortani oqartussat timersornermilu kattuffiit akisussaaffii pisussaaffiilu pillugit maleruagassat, tassunga ilanngullugit taakkununnga tunngasunik tapiissuteqarnissamut piumasaqaatit.  Aappaatut nakorsaatit pissassaatitut atorneqartarnerinik aamma unamminernik siumoortumik isumaqatigiissuteqarnernik pitsaaliuinermut akiuinermullu tunngasunik suliassanik isumaginnittussanik aaqqissuussinerit pillugit maleruagassat.  Tassunga atatillugu ataatsimiititaliamik attaviitsumik pilersitsisoqassasoq siunnersuutigineqarpoq, ”Nakorsaatit Pissassaatitut Atorneqartarnerinut Kalaallit Nunaanni Akiuisut”, timersornermi timigissarnermilu nakorsaatit pissassaatitut atorneqartarnerinut akiuiniarnerup siunnerfeqarneranik, pitsanngortitsinissamik suliniutinilllu ataqatigiissaarisussamik siunertaqartoq, tassunga ilanngullugit pitsaaliuineq akiuinerlu.  Aammattaaq naammagittaaliortarfimmik pilersitsisoqassasoq siunnersuutigineqarpoq, ”Kalaallit Nunaanni Nakorsaatit Pissassaatitut Atorneqartarnerannik Akiuiniarnermut Ataatsimiititaliaq”, nakorsaatit pissassaatitut atorneqartarnerinik akiuinermi maleruagassanik unioqqutitsinermut tunngasuni Nakorsaatit Pissassaatitut Atorneqartarnerinut Kalaallit Nunaanni Akiuisut aalajangiinerannik naammagittaalliuutinik suliaqartussaq.

Siunnersuutip tunuliaqutaa, taassuma siunertaa imarisaalu pillugit siunnersuummut tunngasunik nassuiaatinut aamma innersuussisoqarpoq.

Oqaaseqaataasinnaasut Ilinniartitaanermut, Kultureqarnermut, Ilinniartitaanermut Ilageeqarnermullu Naalakkersuisoqarfimmit kingusinnerpaamik ulloq 20. januar 2016-mi tiguneqareersimassapput.

Oqaaseqaatit naalakkersuisoqarfiup pisortatigoortumik e-mailianut nassiunneqassapput:

ikiin@nanoq.gl , imaluunniit naalakkersuisoqarfiup allakkatigut najugaqafianut: Ilinniarti-taanermut, Kultureqarnermut, Ilinniartitaanermut Ilageeqarnermullu Naalakkersuisoqarfik, Postboks 1029, 3900 Nuuk.

Inussiarnersumik inuulluaqqusillunga

Claus Kleemann

Immikkoortortami pisortaq

E-mail: clkl@nanoq.gl

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

12 januari 10:08:00

Tusarniaanermi piffissaliussaq:

20 januari 00:00:00

Tusarniaanermi akissutit uunga nassiuteqquneqarput:

ikiin@nanoq.gl