Tunup kujatani imartami, misissueqqaarnissamut akuersissummut 2012/41-mut ilaasumi 2D atorlugu sajuppillatsitsisarluni paasissutissanik katersuinissamut avatangiisinik naliliinerup (VVM) tamanut ammasumik tusarniaassutigineqarnera.

TGS-NOPEC ulloq 25. september 2014 Aatsitassanut Ikummatissanullu Aqutsisoqarfimmut nalunaaruteqarpoq ingerlatseqatigiiffiup ukioq manna ingerlatassatut pilersaarutiminik piviusunngortitsinissaq taamaatikkaa. TGS-NOPEC-mit nalunaaruteqarneq tunngavigalugu ingerlateqatigiiffiup sajuppillatsitsisarluni paasissutissanik katersinissaanut akuersissuteqarnissamut suleriaatsimi pilersaarutigineqartut tamarmik unitsinneqarput, ilanngullugu ingerlatseqatigiiffiup VVM-mut nassuiaataata akuersissuteqarfigineqarnissaa.

Allaatigiuk:

TGS-NOPEC Geophysical Company ASA, misissueqqaarnissamut akuersissummut nr. 2012/41-mut pisinnaatitaaffimmik pigisaqartutut, sumiiffimmi pineqartumi 2D atorlugu sajuppillatsitsisarluni paasissutissanik katersuinissamut akuersissummik qinnuteqarpoq. Paasissutissanik katersuinissami qinnuteqarfiusumi sineriak 5.000 km-it missaannik isorartussuseqarpoq. Qinnuteqartup naliliinera malillugu paasissutissanik katersuinissaq qaammatit tallimat tikillugit sivisussuseqarnissaa naatsorsuutigineqarpoq.

2D atorlugu sajuppillatsitsisarluni paasissutissanik katersuinissamut qinnuteqaatigineqartumut VVM-imut nassuiaammut missingiuummut nassiunneqartumut oqaaseqaatit Aatsitassaqarnermut Aqutsisoqarfimmut (mlsa@nanoq.gl) nassiuteqquneqarput, kingusinnerpaamik ataasinngornermi ulloq 18. august 2014, kalaallit nalunaaqutaat malillugu nal. 12.00.
Tusarniaanermi allagaatit kalaallisuut allagaatinut kalaallisuunut iserfissiami nassaarineqarsinnaapput.

Tusarniaanermi najoqqutassat tassaapput:
• Imaqarniliaq teknikkimut tunngasuunngitsoq (Tuluttut)
• Imaqarniliaq teknikkimut tunngasuunngitsoq (Kalaallisut)
• Imaqarniliaq teknikkimut tunngasuunngitsoq ( Danskisut)
• 2D atorlugu sajuppillatsitsisarluni paasissutissanik katersineq, Tunup kujataa (Tuluttut)

Tunuliaqutassatut allagaatit teknikkimut tunngasut ilaat tuluttut suliaapput, TGS-NOPEC-ip 2014-imi sajuppillatsitsisarluni paasissutissanik katersineranut immikkut attuumassuteqartuullutik, taakku webadresseni ukunani takuneqarsinnaapput:

SEG 2013 Noise modelling: http://www.tgs.com/media/investor-webcast/External-links/NIRAS%202013%20(SE%20Greenland%20noise%20modelling).pdf

SEG 2014 Noise Modelling (‘appendix to SEG 2013 report): http://www.tgs.com/media/investor-webcast/External-links/NIRAS%202014%20(appendix%20to%20SE%20Greenland%202013%20noise%20modelling).pdf

Kalaallit Nunaata avataani imartami kulbrintinik ujarlerneq taamaallaat misissueqqaarnissamut akuersissut, kulbrintinik ujarlernissamut atuinissamullu kisermaassisinnaatitaanissamut akuersissut imaluunniit ilisimatusarnikkut misissuinissamut akuersissut naapertorlugit ingerlanneqarsinnaavoq.

Pisinnaatitaaffimmik pigisaqartoq akuersissummik pigisaqarnermi saniatigut nunap avataata imartaani ujarlernissamut akuersissummik aalajangersimasumik pissarsiniartussaavoq. Nunap avataata imartaani ujarlernissamut akuersissuteqarnissamut pisinnaatitaaffimmik pigisaqartup aatsitassanut inatsimmi inatsisinilu allani aalajangersakkanik, akuersissummi piumasaqaatinik, maleruagassani Namminersorlutik Oqartussanit suliarineqartuni aalajangersakkanik aamma piumasaqaatinik, akuersissutitut allakkiamut ilaatinneqartunik naammassinnissimanissaa piumasaqaataavoq.

Suliassamik ingerlatsinissamut akuersissummik qinnuteqaatip tunniunneqarnissaa sioqqullugu qinnuteqartoq suliassamut nassuiaammik, suliassat avatangiisinut tunngassuteqartut aamma pinngortitamut avatangiisinullu sunniutissat killilersornissaat qanoq eqqarsaatigineqarnersut pillugit saqqummiussiviusumik nassiussissaaq. Suliassamut nassuiaat tunngavigalugu, suliassatut qinnuteqaatigineqartoq immikkut imaluunniit suliassat inunnit isumagineqartussatut pilersaarutigineqartut ingerlasulluunniit allat peqatigalugit avatangiisinut annertuumik sunniuteqassanersoq Pinngortitaleriffik (GN) aamma Avatangiisinut Nukissiuuteqarnermullu Ilisimatusarfik (DCE) naliliissapput.

Suliassaq aatsitassanut inatsimmut ilaasoq avatangiisinut annertuumik sunniuteqartussatut isumaqarfigineqarpat, suliassamut pilersaarut aatsaat akuerineqarsinnaavoq, avatangiisinut sunniutissanut naliliineq (VVM), tuluttut Environmental Impact Assessment - ”EIA”-mik taaneqartoq naammassereerpat, aammalu VVM-imut nassuiaat tamanut ammasumik tusarniaassutigineqareerluni Naalakkersuisunit akuersissutigineqareerpat. Akuersissutinik tunisisoqarsinnaanngilaq aammalu akuersisoqarsinnaanngilaq suliniutit ingerlannissaannut Naalakkersuisup VVM-nalunaarusiaq akueritinnagu.

Suliassap VVM-imik suliaqarnissamut pisussaaffiliisup suliarineqarnerani, sapaatit akunnerini arfineq pingasuni tamanut ammasumik tusarniaanissaq siunertaralugu qinnuteqartup uku Aatsitassanut Aqutsisoqarfimmut nassiutissavai:

• VVM ilivitsoq (tuluttut kalaallisullu), suliniuteqarnermi avatangiisinik naliliinernik attuumassutilinnik tunngaveqartoq, sajuppillatsitsisarluni misissuinissatut eqqarsaatigineqartumi nipip siaruartarnissaanut najoqqutassamik ilaqartinneqartoq

• VVM-imut nassuiaammut tuluttut, danskisut kalaallisullu imaqarniliaq teknikkimut tunngassuteqanngitsoq

Piffissaq tusarniaaffiusoq naappat suliap aalajangiiffigisassatut Naalakkersuisunut saqqummiunneqarnissaa sioqqullugu, GN-ip aamma DCE-p VVM-imut nassuiaat, aammalu qinnuteqarnermut najoqqutassiat allat, ilaatigut tusarniaanermi akissuteqaatit tiguneqartut tunngavigalugit inaarutaasumik naliliiffigissavaat. Avatangiisinut iliuusissani, qinnuteqarnermut najoqqutassani saqqummiunneqartuni, avatangiisinut ataatsimut ulorianartorsiortitsisinnaasut annertunerpaamik annikillisarneqarnissaat anguniarneqartariaqarpoq.

Sammisaq:

Aatsitassat

Tusarniaanerup suunera:

Avatangiisinik nalilersuinerit

Siunertaq:

2D atorlugu sajuppillatsitsisarluni paasissutissanik katersinissap 2012/41-p akuerineqarnissaa

Saqqummiunneqarfia:

23 maaji 10:00:00

Tusarniaanermi piffissaliussaq:

18 aggusti 12:00:00

Tusarniaanermi akissutit uunga nassiuteqquneqarput:

mlsa@nanoq.gl