Tunup avannaarsuani imartami, misissueqqaarnissamut akuersissummut 2014/13-imut ilaasumi 2D atorlugu sajuppillatsitsisarluni paasissutissanik katersuinissamut avatangiisinik naliliinerup (VVM) tamanut ammasumik tusarniaassutigineqarnera.

Naalakkersuisut 26. august 2014-imi avatangiisinut sunniutinik naliliinermut nassuiaat (VVM-imut nassuiaat) TGS-NOPEC Geophysical Company ASA-meersoq (TGS) akueraat.

VVM-imut nassuiaat misissueqqaarnermi suliassanut, Tunup avannaarsuata imartaani 7.000 km-inik isorartussusilimmi sajuppillatsitsisarluni misissuinermi paasissutissanik katersinissaq siunertaralugu 2D atorlugu sajuppillatsitsisarluni misissuinernermut tunngasuuvoq.

VVM-imut nassuiaammut missiliuut 2014-imi maajip ulluisa 23-anniit 18-annut Naalakkersuisut nittartagaat aqqutigalugu tusarniaassutigineqarpoq. Piffissap tusarniaaffiusup naareernerani TGS tusarniaanermi akissuteqaatinut tiguneqartunut oqaaseqaateqarpoq.

VVM-imut nassuiaat inaarutaasoq, tusarniaanermi akissutinut tiguneqartunut ilisarititsissummik ilaqartinneqartoq quppernermi uani takuneqarsinnaavoq.

VVM-imut nassuiaat sumiiffimmi, TGS-ip sajuppillatsitsisarluni misissuinermi paasissutissanik katersuiffissatut siunnersuutigisaani pissutsinut atuuttunut ataatsimut takussutissiorfiuvoq.

Suliassani eqqumaffigineqarnerpaaq tassaavoq sajuppillatsitsisarluni paasissutissanik katersinermi qamutilinnit silaannaq atorlugu seqqortitsisarnermit immap ataani nipiliornissaq. Imaani uumasut miluumasut nipiliornerillu tusaaniarnerannut pissusilersornerinullu sunniutissaat immikkut eqqumaffigineqarput.

Ingerlatseqatigiiffiup DCE-mit aamma GN-imit avatangiisinik pitsaanerusumik innarlitsaaliuinissamut siunnersuut pillugu oqaaseqaatit pingaarnerit malissimammagit, sajuppillatsitsisarluni misissuinissap avatangiisinut sunniutissai naammattumik nassuiarneqarsimasut DCE aamma Pinngortitaleriffik ataatsimut naliliipput, kisiannili sajuppillatsitsisarluni qaartitsisarnernit nipiliornerup pingaartumik arfernut sunniutissaat isumaqatigiissutigineqarpoq.

Naalakkersuisut akuersinerannut ilaatigut maleruagassat, malittarisassat inassuteqaatillu atuuttut malillugit VVM-imut nassuiaatip suliarineqarsimanera tunngavigineqarpoq. Nassuiaat avatangiisinut, avatangiisinut sunniutissatut naatsorsuutigineqartunut kiisalu pinaveersaartitsissutaasussanut naammaginartumik tamakkiisumillu saqqummiussiviusutut, taamaattumillu sunniutissat nalilerneqarnerannut tunngavigineqarsinnaasutut naliliiffigineqarpoq.

VVM-imut nassuiaat apeqqutinut, nassuiaammut missingiuutip saqqummiunneqartup tamanut ammasumik tusarniaassutigineqarnerani saqqummiunneqartunut nassuiaatinik, aammalu apeqqutit qanoq suliarineqarsimanerinut nassuiaatinik naammaginartunik imaqartutut naliliiffigineqarpoq. Apeqqutit assigiinngitsut naammaginartumik nassuiarneqarsimasutut naliliiffigineqarput.

Ilisarititsissut takuniarukku una tooruk

VVM-imut nassuiaat akuerisaq akuersissutini taaneqartuni suliassanut pilersaaruterpianik akuersinissamut tunngaviliivoq. Suliassat akuerisat tamaasa quppernermi uani nassaarisinnaavatit: http://www.govmin.gl/petroleum/approved-activities.

Allaatigiuk:

TGS-NOPEC Geophysical Company ASA, misissueqqaarnissamut akuersissummut nr. 2014/13-imut pisinnaatitaaffimmik pigisaqartutut, sumiiffimmi pineqartumi 2D atorlugu sajuppillatsitsisarluni paasissutissanik katersuinissamut akuersissummik qinnuteqarpoq. Paasissutissanik katersuinissami qinnuteqarfiusumi sineriak 7.000 km-it missaannik isorartussuseqarpoq. Qinnuteqartup naliliinera malillugu paasissutissanik katersuinissaq qaammatit marluk affallu missaannik sivisussuseqarnissaa naatsorsuutigineqarpoq.

2D atorlugu sajuppillatsitsisarluni paasissutissanik katersuinissamut qinnuteqaatigineqartumut VVM-imut nassuiaammut missingiuummut nassiunneqartumut oqaaseqaatit Aatsitassaqarnermut Aqutsisoqarfimmut (mlsa@nanoq.gl) nassiuteqquneqarput, kingusinnerpaamik ataasinngornermi ulloq 18. august 2014, kalaallit nalunaaqutaat malillugu nal. 12.00.

Tusarniaanermi allagaatit kalaallisuut allagaatinut kalaallisuunut iserfissiami nassaarineqarsinnaapput.

Tusarniaanermi najoqqutassat tassaapput:
• Imaqarniliaq teknikkimut tunngasuunngitsoq (Tuluttut)
• Imaqarniliaq teknikkimut tunngasuunngitsoq (Kalaallisut)
• Imaqarniliaq teknikkimut tunngasuunngitsoq (Danskisut)
• 2D atorlugu sajuppillatsitsisarluni paasissutissanik katersineq, Tunup avannaarsua (Tuluttut)

Tunuliaqutassatut allagaatit teknikkimut tunngasut ilaat tuluttut suliaapput, TGS-NOPEC-ip 2014-imi sajuppillatsitsisarluni paasissutissanik katersineranut immikkut attuumassuteqartuullutik, taakku webadresseni ukunani takuneqarsinnaapput:

NEG 2013 Noise modelling: http://www.tgs.com/media/investor-webcast/External-links/NIRAS%202013%20(NE%20Greenland%20noise%20modelling).pdf

NEG 2014 Noise Modelling (‘appendix to NEG 2013 report): http://www.tgs.com/media/investor-webcast/External-links/NIRAS%202014%20(appendix%20to%20NE%20Greenland%202013%20noise%20modelling).pdf

Kalaallit Nunaata avataani imartami kulbrintinik ujarlerneq taamaallaat misissueqqaarnissamut akuersissut, kulbrintinik ujarlernissamut atuinissamullu kisermaassisinnaatitaanissamut akuersissut imaluunniit ilisimatusarnikkut misissuinissamut akuersissut naapertorlugit ingerlanneqarsinnaavoq.

Pisinnaatitaaffimmik pigisaqartoq akuersissummik pigisaqarnermi saniatigut nunap avataata imartaani ujarlernissamut akuersissummik aalajangersimasumik pissarsiniartussaavoq. Nunap avataata imartaani ujarlernissamut akuersissuteqarnissamut pisinnaatitaaffimmik pigisaqartup aatsitassanut inatsimmi inatsisinilu allani aalajangersakkanik, akuersissummi piumasaqaatinik, maleruagassani Namminersorlutik Oqartussanit suliarineqartuni aalajangersakkanik aamma piumasaqaatinik, akuersissutitut allakkiamut ilaatinneqartunik naammassinnissimanissaa piumasaqaataavoq.

Suliassamik ingerlatsinissamut akuersissummik qinnuteqaatip tunniunneqarnissaa sioqqullugu qinnuteqartoq suliassamut nassuiaammik, suliassat avatangiisinut tunngassuteqartut aamma pinngortitamut avatangiisinullu sunniutissat killilersornissaat qanoq eqqarsaatigineqarnersut pillugit saqqummiussiviusumik nassiussissaaq. Suliassamut nassuiaat tunngavigalugu, suliassatut qinnuteqaatigineqartoq immikkut imaluunniit suliassat inunnit isumagineqartussatut pilersaarutigineqartut ingerlasulluunniit allat peqatigalugit avatangiisinut annertuumik sunniuteqassanersoq Pinngortitaleriffik (GN) aamma Avatangiisinut Nukissiuuteqarnermullu Ilisimatusarfik (DCE) naliliissapput.

Suliassaq aatsitassanut inatsimmut ilaasoq avatangiisinut annertuumik sunniuteqartussatut isumaqarfigineqarpat, suliassamut pilersaarut aatsaat akuerineqarsinnaavoq, avatangiisinut sunniutissanut naliliineq (VVM), tuluttut Environmental Impact Assessment - ”EIA”-mik taaneqartoq naammassereerpat, aammalu VVM-imut nassuiaat tamanut ammasumik tusarniaassutigineqareerluni Naalakkersuisunit akuersissutigineqareerpat. Akuersissutinik tunisisoqarsinnaanngilaq aammalu akuersisoqarsinnaanngilaq suliniutit ingerlannissaannut Naalakkersuisup VVM-nalunaarusiaq akueritinnagu.

Suliassap VVM-imik suliaqarnissamut pisussaaffiliisup suliarineqarnerani, sapaatit akunnerini arfineq pingasuni tamanut ammasumik tusarniaanissaq siunertaralugu qinnuteqartup uku Aatsitassanut Aqutsisoqarfimmut nassiutissavai:

• VVM ilivitsoq (tuluttut kalaallisullu), suliniuteqarnermi avatangiisinik naliliinernik attuumassutilinnik tunngaveqartoq, sajuppillatsitsisarluni misissuinissatut eqqarsaatigineqartumi nipip siaruartarnissaanut najoqqutassamik ilaqartinneqartoq

• VVM-imut nassuiaammut tuluttut, danskisut kalaallisullu imaqarniliaq teknikkimut tunngassuteqanngitsoq

Piffissaq tusarniaaffiusoq naappat suliap aalajangiiffigisassatut Naalakkersuisunut saqqummiunneqarnissaa sioqqullugu, GN-ip aamma DCE-p VVM-imut nassuiaat, aammalu qinnuteqarnermut najoqqutassiat allat, ilaatigut tusarniaanermi akissuteqaatit tiguneqartut tunngavigalugit inaarutaasumik naliliiffigissavaat. Avatangiisinut iliuusissani, qinnuteqarnermut najoqqutassani saqqummiunneqartuni, avatangiisinut ataatsimut ulorianartorsiortitsisinnaasut annertunerpaamik annikillisarneqarnissaat anguniarneqartariaqarpoq.

Sammisaq:

Aatsitassat

Tusarniaanerup suunera:

Avatangiisinik nalilersuinerit

Siunertaq:

2D atorlugu sajuppillatsitsisarluni paasissutissanik katersinissap 2014-13-ip akuerineqarnissaa

Saqqummiunneqarfia:

23 maaji 09:30:00

Tusarniaanermi piffissaliussaq:

18 aggusti 12:00:00

Tusarniaanermi akissutit uunga nassiuteqquneqarput:

mlsa@nanoq.gl