Shell Greenland A/S-ip 2013-imi misissuilluni ingerlataminik annertusititsineranut atatillugu ”avatangiisinut sunniutaasussanik nalilersuineq” (VVM) nutaaq pillugu tusarniaaneq

Tusarniaanermi akissutit uuma ataani nassaarineqarsinnaapput.

Naalakkersuisut 6. september 2013-imi Shell Greenland A/S-ip (Shell) avatangiisinut sunniutissanik naliliineq pillugu nassuiaasiaa (VVM-imut nassuiaat) akueraat. VVM-imut nassuiaat ujarlernermi suliassanut, Shell-ip Baffin Bugt-imi Anu-mi, Pitu-mi aamma Napu-mi 2013-imi ingerlanneqartussatut pilersaarutigisaanut tunngasuuvoq. Suliassatut pilersaarutigineqartut site survey-imut, tassalu misissuinernut, akuersissuteqarfiusuni taaneqartuni kingusinnerusukkut ujarlerluni qillerisinnaanerup piareersarneqarneranut ilaatinneqartumut nassuiarneqarsinnaapput. Misissuinerit, VVM-imut nassuiaammut atatillugu suliarineqartut tassaapput:

• Marlunniit isigalugu erseqqilluinnartumik sajuppillatsitsilluni misissuineq (2D) sumiiffinni misissuiffissani arlalinni

• Avatangiisinik aallaaviusunik misissuineq (EBS) sumiiffinni misissuiffissani arlalinni.

• Puttaqutit silap immallu pissusaanik misissuiviit 2011-mi misissuinermi ikkunneqartut 2012-imilu misissorneqartut misissussallugit.

• Puttaqutit nammineerlutik nipimik immiussisinnaasut ikkussuunneri (AMAR) katersoqqinnerilu.

VVM-imut nassuiaat missingersuutinngorlugu Naalakkersuisut aammalu nittartagaat aqqutigalugu tamanut ammasumik tusarniaassutigineqarpoq, piffissallu tusarniaaffiusup qaangiunnerani Shell-ip tusarniaanermi akissuteqaatit tiguneqartut oqaaseqaateqarfigai.

VVM-imut nassuiaat inaarutaasoq, tusarniaanermi akissuteqaatit allattorsimaffiannik ilaqartinneqartoq, Naalakkersuisut tusarniaanernut iserfissiaanni takuneqarsinnaapput.

Naalakkersuisut akuersissuteqarneranut tunngaviusunut ilaatigut VVM-imut nassuiaatip maleruagassat, malittarisassat inassuteqaatillu naapertorlugit suliarineqarsimanera pillugu nalunaarut ilaatinneqarpoq. Nassuiaammi avatangiisit, avatangiisinut sunniutissatut naatsorsuutigineqartut kiisalu pinaveersaartitsissutissat naammaginartumik tamakkiisumillu nassuiarneqarsimasutut naliliiffigineqarput, taamaattumillu sunniutissat naliliiffigineqarnerinut tunngavigineqarluni.

VVM-imut nassuiaat apeqqutinut, nassuiaatissatut missingersuutip saqqumiunneqartup tamanut ammasumik tusarniaassutigineqarnerani saqqummiunneqartunut naammaginartumik sammisaqarfiusutut, aammalu akissutit qanoq iliorluni suliarineqarsimanerinut nassuiaateqarfiusutut naliliiffigineqarpoq. Apeqqutit assigiinngitsut naammaginartumik nassuiarneqarsimasutut naliliiffigineqarpoq, ataatsimullu isigalugu sajuppillatsitsisarluni misissuinerit killilimmik annertussusilerneqarnerini avatangiisinut sunniutissat, pingaartumillu qilalukkat qernertat allatut pissusilersornissaat annikitsuararsuusussatut naliliiffigineqarpoq.

Tamatuma kingunerisaanik VVM-imut nassuiaat akuerisaq akuersissutini pineqartuni suliassanut pilersaaruterpianik akuersinissamut tunngavigineqarsinnaavoq. Ingerlatanut akuersissutit akuerineqartut tamaasa quppernermi matumani nassaarisinnaavatit.

Allaatigiuk:

Shell Greenland A/S-ip 2013-imi Baffinbugten-imi misissueqqaarnermik suliaqarnermik ingerlatsinissaq pilersaarutigaa. Pilersaarutaaqqaaraluarpoq misissueqqaarnermik suliaqarneq taanna suliaqarfinni 10-it angullugit amerlassusilinni ingerlanneqassasoq aammalu todimensionel-imik (2-D) annertuumik ersarissuseqartumik sajuppillatsitsisarluni misissuinermik ilaqassasoq.

Maannamut VVM-iugallartoq BMP-imut ulloq 1. marts tamanut ammasumik tusarniaassutigineqarnissaa siunertaralugu nassiunneqarpoq. Tusarniaaneq ingerlanneqarpoq ulloq 10. maj 2013 tusarniaanermut killiliunneqarluni.
Tamatuma kingorna paasissutissanik ingerlaavartumik naliliinermi inerniliissutigineqarpoq, 2013-imi sumiiffinni qillerummit qaqitassanik qillerinissamut periarfissaasinnaasuni suli allanik misissueqqissaarnernik ingerlatsinissaq pisariaqalersinnaasoq.

Allannguutaasut nassuiarniarlugit 2013-imi juunimi VVM-iugallartoq nutaaq suliaqarnerup annertussusaata annertusinissaanik siunnersuutaasoq tapiliullugu nassiunneqarpoq. VVM-iugallartoq taanna nutaaq maannakkut tusarniaassutigineqarpoq. Nutaami tassani teknikkikkut paasissutissat, VVM-iugallartup taassuma 1. marts-imik ullulerneqartup kingorna pissarsiarineqarsinnaalersut kiisalu oqaaseqaatit tamanut ammasumik tusarniaanermut siullermut atatillugu tiguneqartut naapertorlugit iluarsiissutaasut allannguutaasullu, ilaapput.

Sammisaq:

Aatsitassat

Tusarniaanerup suunera:

Avatangiisinik nalilersuinerit

Siunertaq:

VVM-iugallartup tusarniaassutigineqarnissaa – suliaqarnerup annertussusaanik annertusititsineq

Tusarniaanermi piffissaliussaq:

19 aggusti 12:00:00

Tusarniaanermi akissutit uunga nassiuteqquneqarput:

bmp@nanoq.gl