Pilersaarusiortarnermut inatsisip allanngortinneqarnissaa pillugu tusarniaaneq, UPA 2014

Sanaartorfissat pilerinartut sanaartugassanut suliniutinullu angisuunut pingaarutilinnulluunniit inniminnerneqarsinnaanissaannut kommunit kissaateqarnerat siunnersuummi tunngavigineqarpoq.

Siunnersuummi suliniutit, avatangiisinik naliliinissamut imaluunniit pilersaarusiornermut tunngavissanik nutaanik pisariaqartitsiviusunut tunngasuuvoq. Qinnuteqartup avatangiisinik naliliineq imaluunniit pilersaarusiornermut tunngavissanik nutaanik suliaqarneq aningaasalersorsinnaappagu, nunaminertamut pineqartumut qinnuteqartup salliutinneqarnissaanut kommunalbestyrelsi periarfissaqalissaaq. Nunaminertamik suliniummut inniminnigassaq sapaatit akunnerini marlunni tamanut ammasumik tusarniaassutigineqareerpat, kommunalbestyrelsi aalajangiisinnaasassaaq. Pilersaarusiortarnermut inatsit atuuttoq malillugu kommunalbestyrelsi taamaallaat piumasaqaatinik tigussaasunik, qinnuteqartup naammassisassaanik tunngavilersuisinnaavoq, taamaalillunilu assersuutigalugu qinnuteqartut, suliniutip naammassinissaanut aningaasaqarnikkut periarfissaqanngitsutut naliliiffigineqartut peqataatinngitsoorsinnaallugit. Qinnuteqartut arlallit tunngavissanik naammassinnissimappata, nunaminertamik atugassiinissaq soorlu makitsinikkut akuersissutigineqarsinnaavoq.

Allannguutissatut siunnersuut aamma minnerusunik allannguiffiuvoq, tassanilu kommunit pigisanik aalaakkaasunik, nunaminertamik atugassiiffiunngitsuni inissinneqarsimasunik piaanissamut tunngavissinneqarput.

Ullumikkut kommunit taamaallaat pinngitsaaliissummik akiliisitaasussanngortitsinissamut imaluunniit eqqartuussivitsigut suliassanngortitsinissamut periarfissaqarput. Taakkunani marluusuni pigisat aalaakkaasut piginnittuata ilisimaneqarnissaat piumasarineqarpoq, tamatigulli piginnittoq nassaarineqarsinnaaneq ajorpoq. Pisortanut akiitsut amerlareerpata, pinngitsaaliissummik akiliisitaasussanngortitsisarneq sunniuteqarsinnaanngilaq. Inuinnarnut eqqartuussivitsigut suliassanngortitsisarnermut aningaasartuutit amerlanertigut inatsisinik unioqqutitsilluni inissitanut naleqqiullutik amerlavallaartarput.

Sammisaq:

Ineqarneq

Tusarniaanerup suunera:

Inatsisartut inatsisaat

Naalakkersuisoqarfik:

Ineqarnermut Attaveqaqatigiinnermullu Naalakkersuisoqarfik

Saqqummiunneqarfia:

19 decembari 10:48:00

Tusarniaanermi piffissaliussaq:

31 januari 12:00:00

Tusarniaanermi akissutit uunga nassiuteqquneqarput:

in@nanoq.gl