Meeqqanik Inuusuttuaqqanillu ikiorsiisarneq pillugu Inatsisartut inatsissaattut siunnersuutip tusarniaassutigineqarnera

Matumuuna ilanngullugu nassiunneqarpoq Ilaqutariinnermut Inatsisinillu Atuutitsinermut Naalakkersuisoqarfiup meeqqanik inuusuttuaqqanillu ikiorsiisarneq pillugu inatsisissatut siunnersuusiaa nr. xx, ulloq xx. 2014-meersoq.

Tusarniaanermit akissutigineqartut Ilaqutariinnermut Inatsisinillu Atuutitsinermut Naalakkersuisoqarfimmut nassiutereerneqarsimassapput kingusinnerpaamik 24. januar 2014 qaangiutsinnagu.
Tusarniaanermi akissutigineqartut uunga nassiunneqassapput: Ilaqutariinnermut Inatsisinillu Atuutitsinermut Naalakkersuisoqarfik, Postbox 260,  3900  Nuuk, imaluunniit pisortaqarfiup email-ianut: iian@nanoq.gl 

Inatsisissatut siunnersuummi siunertarineqarpoq Meeqqanik Inuusuttuaqqanillu Ikiorsiisarneq pillugu Inatsisartut Peqqussutaata nr. 1, 15. april 2003-meersup malunnaatilimmik nutarsarneqarnissaa.

Inatsisissap suliarineqarnerani tunuliaqutarineqarpoq meeqqat inuusuttuaqqallu piginnaatitaaffiisa annertusarneqarnissaa. Tamatumanilu pingaartinneqarluni nunatsinni meeqqat inuusuttuaqqallu pitsaasumik toqqissisimanartumillu peroriartornerminni atugassaqartinneqartarnissaat. Piginnaasatik aallaavigalugit sapinngisaq naapertorlugu inuunerminnik aqqutissiuisinnaanissaat anguniarneqarpoq. Tamatumani ilaatigut pineqarlutik ilinniartitaaneq aqqutigalugu inersimasunngornermi imminut napatissinnaanissamut periarfissagissaartinneqarnissaat.

Nunatsinni meeqqanik inuusuttuaqqanillu sullissinermi FN-p Meeqqat Pisinnaatitaaffii pillugit aalajangersagaq siunnersuusiornermi toqqammavigineqarsimavoq. Aalajangersakkap taassumap naqissusiivigivaa, meeqqat immikkut pisinnaatitaaffeqartut aammalu inersimasutulli tatigineqarlutik naligiissutut pissuseqarfigineqartassasut aamma inatsisitigut illersorneqarneq eqqarsaatigalugu.

Naalakkersuisut kissaatigisimavaat inatsisissamik siunnersuusiornerminni anguniassallugu meeqqat inuusuttuaqqallu inatsisitigut annertunersumik illersorneqarlutik pissuseqarfigineqartarnissaat, tamatumani meeqqanik sullissisartut kissaatigisaat inassuteqaataallu inatsissamik piareersaasiornermi tusaaniarneqarsimallutik. Pingaartinneqarsimavoq kommunini meeqqanik inuusuttuaqqanillu sullissisarnermi maleruagassat ulluinnarni atorneqarsinnaalluartut pilersinneqarnissaat, taamassillunilu sullissisartut inatsisinik ersarissunik tunuliaqutagissaarlutik kiffartuussisarsinnaasarnissaat aqqutissiuuneqaqqullugu.

Inatsisissatut siunnersuut siusinnerusukkut 11. december 2012-p aammalu 11. januar 2013-p akornanni tusarniaassutigineqarnikuusimavoq. Piffissami pineqartumi akissuteqaatigineqarsimasut inatsisissatut siunnersuutip piareerniarlugu suliniuteqarnermi, tusarniaaffigineqarsimasut nutaamik matumani tusarniaatitsinermi nassiusseqqissimassanngippata,  ilanngullugit suliniuteqarnermi tapitartuuneqareersimanngikkunik tapitartuuneqarumaarput.

Inatsisissatut siunnersuutip taamanikkut suliarineqarneranut sanilliullugu, ilaatigut taamanikkut tusarniaasimanermi oqariartuutigineqarsimasut toqqammavigalugit allannguutissanik ilanngussisoqartarsimavoq. Tamatuma saniatigut siunnersuut aamma ugguunatigut allannguuteqartinneqarsimavoq, maleruagassiornermi maannamut atuutitinneqarsimasutut Qitiusumik Meeqqat Atugarisaat Pillugit Immikkut Ataatsimiititaliap attatiinnarneqarnissaa ilanngunneqarsimalluni. Tamatumuuna taarsiunneqarpoq siunnersuutigineqaraluartutut Qitiusumik Meeqqat Pillugit Siunnersuisoqatigiinnik pilersitsisoqarnissaanik siunnersuuteqarsimanermut. 

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

20 decembari 16:40:00

Tusarniaanermi piffissaliussaq:

24 januari 23:30:00

Tusarniaanermi akissutit uunga nassiuteqquneqarput:

iian@nanoq.gl