Betoncentralen

Pujoralannik nipiliornermillu annikillisitsisussanik suliniuteqarneq pillugu Nuummi Betoncentralimit qinnuteqaammut atatillugu tamanut ammasumik tusarniaaneq

Aallaqqaasiut

Betoncentralen A/S 1984-imili Siaqqinneq 1-imi inissisimavoq. Inissisimaffimmi tassani ujaqqat Betoncentralimit aserorterneqartarput.

Pujoralatserineq Betoncentralimit pisoq pillugu naammagittaalliuutinik Kommuneqarfik Sermersooq ukiorpassuarni tigusaqartarsimavoq. Naammagittaalliuutit ilaatigut ineqarfimmit Nuussuarmi Betoncentralip kujataaniittumit najugaqartuneersuupput aammalu sisorarnermi aqqutaasartuni pujoralaat pillugit naammagittaalliuutaallutik. 

Taamaattumik oqartussaasut piumasaqaateqarnerat malillugu, pujoralatserinermit nipiliornermillu akornusersuinerup annikillisinneqarnissaa siunertaralugu Betoncentrali atortulersuutinik ikkussuinissamik qinnuteqarpoq. Atortulersuutit ikkussorneqartut tamarmik maannakkut nunaminertami sumiiffimmi Betoncentralimut atugassiissutigineqarsimasumi inissinneqassapput. Tamanna tusarniaanermut najoqqutassani takuneqarsinnaavoq.

Betoncentralip ingerlataannut nunaminertamik naleqqunnerusumik kommuni innersuussisinnaasimanngilaq. 

Betoncentralimit qinnuteqaammi piffissami qanittumi aamma siunissami ungasissumi pujoralannik nipiliornermillu annikillisitsinissamut aaqqiissutissat qinnuteqaataasut nassuiarneqarput.

Suliniutinut avatangiisinut tunngatillugu akuersissummik tunniussisoqarsinnaasoq naliliisoqassappat, suliniutaasut eqqarsaataasutut sunniuteqarnersut kiisalu avatangiisinut tunngatillugu akuersissummi piumasaqaataasut naammassineqarnersut ingerlaavartumik nalilersuisoqassaaq. Uuttuinerit taakkua pujoralatserinermit imaluunnniit nipiliornermit akornusersuinerit annikillisinneqarnissaat siunertaralugu aaqqiisoqarnissaanik immaqalu aamma annertunerusunik atortulersuutinik ikkussuisoqarnissaanik kinguneqarsinnaapput. 

Qinnuteqaammut tunngatillugu tusarniaanermut akissuteqaatit Aatsitassanut Ikummatissanullu Pisortaqarfimmut (bmp@nanoq.gl) kingusinnerpaamik ulloq 18. juni 2012 Kalaallit Nunaanni nalunaaqutaq malillugu nal. 12 nassiuteqquneqarput.

 

Inatsisitigut tunngaviusoq

Aatsitassanut Ikummatissanullu Pisortaqarfiup aatsitassat pillugit ingerlatallu tamatumunnga pingaarutillit pillugit Inatsisartut inatsisaat nr. 7, 7. december 2009-imeersoq (aatsitassanut ikummatissanullu inatsit) tunngavigalugu, isumannaallisaanermut, peqqinnissamut avatangiisinullu tunngatillugu suliffeqarfiit ujaqqanik piiaanermik/katersinermik suliaqartut inatsisitigut maleruagassaqartinneqarnerat tiguaa. Inatsisitigut maleruagassaqartitsinermi § 47 malinneqarpoq.

§ 47.  Naalakkersuisut akuerisinnaavaat suliffeqarfiit beton-imik, beton-imit sulianik kiisalu ujaraaqqanik, ujaqqanik assigisaannillu Kalaallit Nunaanni aqqusinniornernut sanaartornernullu atugassanik assigisaannillu tunisassiortartut pilersuisartullu taama atugassanik aatsitassanik katersisinnaasut piiaasinnaallutillu, takukkilli imm. 2 aamma 4. Taama piiaanissaq pillugu pissutsit tamaasa pillugit Naalakkersuisut akuersissuteqarnerminni piumasaqaatinik aalajangersaasinnaapput. Piiaanissaq akuerineqarpat, piiaanissamut akuersissuteqarnani ingerlatsineqarsinnaavoq, akuersinermi piumasaqaatit allassimasut malillugit. Piiaaneq isumannaallisaaneq, peqqissuseq avatangiisillu eqqarsaatigalugit isumannaatsumik ingerlanneqassaaq.
Imm. 2.  Imm. 1 malillugu sumiiffinni §§ 16 imaluunniit 33 malillugit akuersissuteqarfiusuni piiaaneq ingerlanneqassanngilaq, kiisalu § 39 malillugu nunap iluani ingerlatsinissamut akuersissutit ataqqillugit taamaallaat ingerlanneqarsinnaallutik.
Imm. 3. Suliffeqarfiit inatsisartut inatsisaata matuma atuutilernera sivikinnerpaamik ukiut marluk sioqqullugit imm. 1-imi piumasaqaatinik eqquutsitsisimasut ingerlatanillu taaneqartunik ingerlatsisimasut, imm. 1 malillugu akuersissummik tunineqarsinnaapput.
Imm. 4.  Imm. 1-imi sammisassani taaneqartuni illoqarfinni nunaqarfinnilu nunaminertanik tunniussineq nunaminertanik atuisarneq pillugu inatsimmi malittarisassat malillugit kommunalbestyrelsimit nalunaarutigineqassaaq.

Aatsitassanut Ikummatissanullu Pisortaqarfimmit avatangiisinut tunngatillugu akuersissuteqarnermi qinnuteqartoq oqartussaasunit allanit akuersissuteqarnernik attuumassuteqartunik pissarsinianngitsoornissamik akuerineqanngilaq

Inussiarnersumik inuulluaqqusillunga

Aatsitassanut Ikummatissanullu Pisortaqarfik

Allaatigiuk:

Pujoralannik nipiliornermillu annikillisitsisussanik suliniuteqarneq pillugu Nuummi Betoncentralimit qinnuteqaammut atatillugu tamanut ammasumik tusarniaaneq

Sammisaq:

Aatsitassat

Tusarniaanerup suunera:

Avatangiisinik nalilersuinerit

Siunertaq:

Betoncentrali atortulersuutinik ikkussuinissamik qinnuteqarpoq. Atortulersuutit ikkussorneqartut tamarmik maannakkut nunaminertami sumiiffimmi Betoncentralimut atugassiissutigineqarsimasumi inissinneqassapput. Tamanna tusarniaanermut najoqqutassani takuneqarsinnaavoq.

Tusarniaanermi piffissaliussaq:

18 juni 00:00:00

Tusarniaanermi akissutit uunga nassiuteqquneqarput:

bmp@nanoq.gl