Nuna tamakkerlugu ataatsimeersuarneq 16. aamma 17. september 2003

Ataatsimeersuarnissap ingerlanneqarnissaanut paasissutissat nalinginnaasut

1. Nuna tamakkerlugu ataatsimeersuarnerup siunertaa:

Nuna tamakkerlugu ataatsimeersuarnermi Namminersorneq pillugu isumalioqatigiiissitat isumaliutissiissutaat tunngaviussaaq. Ataatsimeersuarneq kattuffiit namminersulernissamut qanoq isumaqarnerannik naalakkersuisunut saqqummiissaapput. Ataatsimeersuarneq namminersulernissaq pillugu innuttaasut inatsisartullu oqallinnissaannut piareersaataassaaq.

Ataatsimeersuarnermi pingaarnerutillugu tunngaviusumik isummat aallaaviussapput oqallinnerlu siunissamut sammitinneqassalluni. Ataatsimeersuarneq inaarutaasumik isummersorfiusinnaanngilaq.

2. Piffissaq, sumiiffissaq aningaasallu:

Ataatsimeersuarneq 22. aamma 23. oktober Katuami ingerlanneqassaaq. Immikkut isumaqatigiissuteqareernikkut namminersorneq pillugu allattoqarfik angalanermut unnuinernullu matussusiisinnaavoq. Allattoqarfik ullormusiaqartitsissanngilaq.

3. Ataatsimeersuarnerup ingerlanissaa:

Ataatsimeersuarneq immikkoortunut arfinilinnut avinneqarsimavoq ukuusunut:

A. Ataatsimeersuarnermik ammaanersiorneq.

B. Inuit aalajangersimasut saqqummiussisoralugit siunissamut takorluukkersaarneq. (Isiginnaarutikkut immiunneqassaaq)

C. Aalajangersimasunik suliaqartussanik suleqatigiinni sulineq.

D. Suleqatigiit suliaminnik saqqummiussinerat oqallinnerlu. (Isiginnaarutikkut immiunneqassaaq)

E. Naalakkersuisunik apeqqarissaarneq. (Isiginnaarutikkut immiunneqassaaq)

F. Ataatsimeersuarnermik naggasiineq, naalakkersuisut siulittaasuat. (Isiginnaarutikkut immiunneqassaaq)

4. Ataatsimeersuarnermi peqataasussat:

Soqutigisaqaqatigiiffiit sinniisui ataatsimeersuarnermut aggersarneqassapput. Taakkua saniatigut politikimik suliniaqatigiiffiit sinniisui, inatsisartuni ilaasortat, naalakkersuisuni ilaasortat, kommuninilu qinikkat aggersarneqassapput. Kiisalu ataatsimeersuarnermi alaatsinaattutut peqataasoqarsinnaavoq, assersuutigalugu ilinniagaqartut.

Peqataasut tamarmik soqutigisaqaqatigiiffiit sinniisuuffigisami soqutigisaat aallaavigalugit isummersorsinnaassapput. Taamaalilluni peqataasut tamarmik tunuliaquttatik sinnerlugit oqaaseqarsinnaatitaapput.

5. Ataatsimeersuarnerup aqunneqarnera:

Ataatsimeersuarnermik aqutsisussamik toqqaasoqassaaq. Aqutsisussaq inuiaqatigiinnik ilisimasaqarluartuussaaq. Aqutsisoq ataatsimiinnermik oqallinnerullu ingerlaneranik aqutsisuussaaq.

Immikkut saqqummiussisussanik aggersaasoqassaaq, siunissamik takorluukkersaartussanik aammalu ataatsimeersuarnerup aallartilluarnissaanik uummarissaasussanik.

Peqataasut tamarmik aalajangersimasunik suliaqartussanik suleqatigiinnut peqataanissamut periarfissinneqassapput. Suleqatigiit immikkut suliaqartussat tamarmik immikkut siuttoqassapput, taakkualu oqallinnerup ataatsimeersuarnerup siunertarisaanut sammiveqartumik ingerlanneqarnissaata aqunnissaa akisussaaffigissavaat aammalu suleqatigiit suliaannik ataatsimeersuartut sinnerinut oqallisigineqartussanik saqqummiissisussaallutik.

6. Ataatsimeersuarnissamut piareersaateqarneq:

Ataatsimeersuarnissaq namminersorneq pillugu allattoqarfimmit pilersaarusiorneqarpoq. Aqutsisut, immikkut saqqummiussisussat aammalu suleqatigiinnik aalajangersimasunik sammisaqartussanik siuttussat piareersaqatigiissinneqassapput.

Kattuffiit aggersarneqartut tamarmik immikkut allakkatigut ataatsimeersuarnissaq sioqqullugu tunniunneqareertussanik namminersorneq pillugu isumalioqatigiissitat isumaliutissiissutaannik naliliissummik aammalu namminersulernissaq pillugu isumaannik imaqartunik tunniussaqaqqullugit kaammattorneqassapput.

Saqqummiunneqartut tamarmik kingusinnerpaamik allattoqarfimmut 18. august tunniunneqareersimassapput. Saqqummiunneqartut tamarmik piareersarneqassapput ataatsimeersuarnermi aqutsisussaq peqatigalugu. Ataatsimeersuarnermilu atortussat aallaaviusussat kingusinnerpaamik 22. august peqataasussanut nassiussuunneqassapput.

7. Tusagassiortut peqataanerat:

Tusagassiortut piareersaqatigiinnissamut augustip naajartornerani aggersarneqassapput.

KNR-TV-mik immikkut isumaqatigiissuteqarnissaq siunnerfigineqassaaq taamaaliornikkut immikkoortuni B,D, E aamma F-mi saqqummiunneqartut isiginnaarutikkut immiunneqarsinnaassammata.