Ilanngussaq 3: Inatsisit tunngaviusut inatsisillu inuiannut tamanut tunngasut pillugit suleqatigiissitamut suliassiissut

Namminersorneq pillugu Isumalioqatigiissititanut suliassarititani 2000-mi januaarip ulluisa arfineq-aappaanneersuni allassimavoq:
"Isumalioqatigiissitat Namminersornerulluni Oqartussaanerup inatsisit tunngaviusut aallaavigalugit qanoq inissisimanera misissussavaat - tamatumunnga Naalagaaffiup Namminersornerullutillu Oqartussat akornanni oqartussaanikkut pisussaaffitsigullu agguaassisimaneq ilanngullugu - aamma naalagaaffeqatigiinnerup iluani nammineerusunnerup allatut aaqqissuussinikkut pitsaanerusumik naammassineqarsinnaanera misissuiffigineqarlunilu allaaserineqassaaq.
Isumalioqatigiissitat oqartussaffiit sorliit ullumikkut Namminersornerulluni Oqartussanut nunneqareersimasut, sorliit naalagaaffimmit suli oqartussaaffigineqarnersut sorliillu Namminersornerullutik Oqartussat naalagaaffiullu akornanni ataatsimoorluni oqartussaaffigineqarnersut allaaserissavaat.
Isumalioqatigiissitat Namminersornerulluni Oqartussaaneq pillugu inatsimmut, inatsisinut pisinnaatitsissutinut atuuttunut kiisalu naalagaaffiup Namminersornerullutillu Oqartussat akornanni ingerlatsineq pillugu taaneqartunullu sinaakkusiussanik isumaqatigiissutinut allannguutissanik siunnersuuteqarsinnaatitaapput."
Suliassaqarfiit sinnerisa allat aamma tungaasigut Isumalioqatigiissitat inassutaat tunngavigalugit suleqatigiissitap misissussavai inatsisitigut tunngaviusut, inatsisitigut isumaqatigiissutitigullu allannguutissatut pisariaqartinneqartut kissaatigineqartulluunniit suunersut.
Suleqatigiissitaq suliassaqarfimmi iluani periarfissanik nalunaarsuissaaq Isumalioqatigiissitani suliassatut nalunaarsukkani anguniagassat pingaarnerit angusinnaaqqullugit. Periarfissat ajunngequtaat sanngeequtaallu ilanngullugit nalilersorneqassapput.
Naggataatigut suleqatigiissitaq periarfissatut nalunaarsukkat tunngavigalugit inassuteqassaaq Isumalioqatigiissitat inaarutaasumik isumaliutissiissutissaanni nalunaarsukkanit suut salliutinniarneqassanersut.
Namminersorneq pillugu Isumalioqatigiissitat ataanni suleqatigiissitat tamarmik immikkut suliassaqarfimmik iluanni suleqatigiissitat allat suliaannut attuumassuteqartut aamma taputartuunneqarsinnaasut sianigissavaat.
Aammattaaq suleqatigiissitap tamakkua saniatigut pisortaqarfiit sulinerminnut attuumassuteqartut suliaminnik pissusissamisoortumik ilisimatittassavaat.
Isumalioqatigiissitanut nalunaarusiortarneq
Suleqatigiissitaq Isumalioqatigiissitat ataatsimiinnissaannut tamanut suliaminut killiffiit pillugit nalunaarusiortassaaq, apeqqutinillu Isumalioqatigiissitat tamarmiusut isumaliutigisassaannik isummerfigisassaannillu saqqummiussisassalluni.
Suleqatigiissitaq Isumalioqatigiissitat ataatsimiinnissaannut tamanut sivikinnerpaamik sapaatit akunnerinik marlunnik sioqqutsilluni Allattoqarfik aqqutigalugu Isumalioqatigiissitat ataatsimiinnissaannut soqutiginaatilittut isigisaminik nassiussisassaaq.