Naalagaaffiup inuiaallu tamat akornanni inatsisinut apeqqutit

Inatsisit tunngaviusut inatsisillu inuiannut tamanut tunngasut pillugit suleqatigiissitamut suliassiissut

Isumalioqatigiissitanut suliassiissummi ilaatigut allassimavoq "Isumalioqatigiissitap Kalaallit Nunaata ullumikkut inatsisitigut tunngaviusutigut inissisimanera aallaavigalugu kiisalu inuiaat tamat inatsisaat naapertorlugu inuiaqatigiit kalaallit imminnut aqussinnaanerannut naapertuuttumik eqqarsaatigissavaa siunnersuutigalugulu kalaallit pisortaasa inatsisinut tunngaviusunut ajornanngitsumik qanoq iliorluni aalajangiisinnaassuseqarnerit annerusut tigusinnaassaneraat."  Isumalioqatigiissitat nutarterinermik siunnersuutaa inatsini tunngaviusuni § 19 naapertorlugu Kalaallit Nunaata naamminiilivissinnaalernissamut aalajangersakkatigut periarfissaqartitaassapput.

Suleqatigiissitaq isumalioqatigiissitamut ilaatigut nassuiaateqassaaq:

  • Inuiaat tamat inatsisaat naapertorlugu inuiaqatigiit kalaallit imminut aqussinnaanerat
  • Kalaallit Nunaata inatsisitigut tunngaviusutigut ullumikkut inissisimanera
  • Kalaallit oqartussaasuisa annerusumik aalajangiisinnaassuseqalernissaminnut inatsisitigut tunngaviusutigut periarfissaat.

Suleqatigiissitaq Kalaallit Nunaat namminersortoq pillugu inatsisissami aalajangersakkanik siunnersuutinik imaattunik saqqummiussaqassaaq:

  • Kalaallit Nunaata Kunngeqarfimmi Danmarkimi ineriartornermini killiffia
  • oqartussaaffinnik nutaanik tigusinissamik killilersuinerit aalajangiisinnatitaalernissallu ilutsit nutaat atorlugit killilersorlugit
  • Kalaallit Nunaata Danmarkillu politikikkut aqutsinikkullu periusissaasa
    • Kalaallit Nunaannut tunngassuteqartut attuumassuteqartinneqarsinnaasulluunniit Folketingimut saqqummiunneqannginnerminni / atortuulersinneqannginnerminni naalakkersuisut inatsisiliornissamut siunnersuutaasa saqqummiunneri (inatsisit ingerlatsinermilu aalajangersakkat),
    • isumaqatigiissutinik kalaallit oqartussaasuinut tunngassuteqartunik, naalagaaffiulluunniit isumagisassaanik Kalaallit Nunaannut pingaaruteqartunik, isumaqatigiittoqannginnerani saqqummiussinerni.

Taakkua saniatigut suleqatigiissitaq kalaallit namminiilivinnissamik kissaateqarnerisa ingerlanneqarnissaanut siunnersuummik saqqummiussaqassaaq - inuiaat tamat inatsisaat ataqqilluinnarlugu inatsisini tunngaviusuni § 19 naapertorlugu pisussatut.

Isumalioqatigiissitami erseqqinnerusumik aalajangertoqareerneratigut suleqatigiissitap inatsisit tunngaviusut inatsisillu tamanut tunngasut aalajangersimasut suliarissavaattaaq.

Isumalioqatigiissitap sulinermut atugassatut piniagai allakkiat naleqquttut tamarmik suleqatigiissitap suliaanut tapertatut ilaassapput.

Isumalioqatigiissitap siulittaasoqarfia allatseqarfiup siunnersuuteqarneratigut isumalioqatigiissitamilu oqallisiginnittoqareerneratigut suleqatigiissitap suliarinninneranut immikkut tatigisaallutik paasisimasaqartunit akissutinik allanik piniarsinnaavoq.

Isumalioqatigiissitap atuuffia tamakkerlugu suleqatigiissitaq attuuttussatut naatsorsuutigineqarpoq.

Isumalioqatigiissitaq siulittaasumik isumalioqatigiissitallu ilasortaanit allanik taallimanik suleqatigiissitamut toqqaassaaq. Siulittaasoqarfik allatseqarfiup siunnersuuteqarneratigut aalajangeeqataasinnaasussaatitaanngitsunik isumalioqatigiissitamut marlunnik kiisalu immikkut paasisimasaqartunik sisamat angullugit toqqaassaaq.