Aningaasarsiorneq inuussutissarsiutitigullu ineriartortitsineq

Aningaasarsiorneq inuussutissarsiutitigullu ineriartortitsineq pillugu suleqatigiissitaliamut suliassiissut

Suliassiissummi ilaatigut paasineqarsinnaavoq Isumalioqatigiissitap suliamini tunngavigalugu aallaavigissagaa pisinnaatitaaffiit pisussaaffiillu naapertuutsinneqarnissaat, isumalioqatigiissitallu eqqarsaatigisariaqaraa siunnersuusiorlugulu Kalaallit Nunaata Danmarkillu akornanni aningaasatigut aaqqiageeqatigiinnerup nutaamik aaqqissuunnissaa.

Tamanna tunngavigalugu suleqatigiissitap eqqarsaatigissavaa siunnersuutigalugulu nutaamik aaqqissuusineq kalaallit oqartussaasuisa naallagaaffiullu akornanni aningaasaqarnikkut atukkat samminerullugit aamma tamatumani siunissami ataatsimoortumik tapiissutit tunngaviinut allaasunik iluseqartitanik piviusunik saqqummiilluni.

Pisuussutit uumaatsut pillugit suleqatigiissitap inernerititaanik ilanngussinermi suleqatigiissitaq makkua saniatigut, pisuussutinit uumaatsunit tassanngaaniillu isertitaasinnaasussat siunissami qanoq ataatsimoortumik tapiissutit tunngaviinut ilanngunneqarsinnaanersut suli allamik siunnersuusiussaaq.

Namminersorneq pillugu kalaallit Isumalioqatigiissitat Isumaliutissiissutaat (marsi 2003) aamma Kalaallit Nunaanni Inuussutissarsiornermik Ineriartortitsinermut Ataatsimut Ataatsimiititaliap nalunaarutaat tunngavigalugit (oktobari 2003) suleqatigiissitap nalilersussavaattaa qanoq naalagaaffiup Kalaallit Nunaannut tapiissutai nalunaarutiginnittut taakkua marluk innersuussutaat sunniivigeqatigiitsillugit inuiaqatigiit kalaallit aningaasaqarnikkut imminnut napatinnerusunngortissinnaaneraat tamatumuunakkullu naalagaaffiup tapiissutaanik pinngitsuuisinnaaneq minnerulersillugu.

Suleqatigiissitap sulinerminut atugassaminik Isumalioqatigiissitaq qinnuigisinnaavaa naalagaaffiup aningaasaqarnikkut ingerlatitaaneranut immikkut ilinniagaqarsimasunik akuerisaasunit apeqqutigiumasanik akissuteqarfiginneqqullugu, assersuutigalugu universitetini handelshøjskoliniluunniit professorit apeqqutinik naalagaaffiup aningaasaqarnikkut ingerlatitaaneranut aalajangersimalluinnartunut tunngassuteqartunik paasissutissiitillugit.

Isumalioqatigiissitap suleqatigiissitap siulittaasussaa kiisalu isumalioqatigiissitami ilaasortat allat suleqatigiissitami ilaasortassat toqqassavai. Siulittaasoqarfik allatseqarfiup siunnersuuteqarneratigut immikkut paasisimasaqartunik sisamat angullugit toqqaassaaq.

Suleqatigiissitaq isumalioqatigiissitamut nalunaaruteqassaaq kingusinnerpaamik 30. septembari 2005.