Isumalioqatigiissitaq

Kalaallit-Qallunaallu Namminersorneq pillugu Isumalioqatigiissitaanut suliassiissut

Danmarkimi aamma Kalaallit Nunaanni naalakkersuisut kissaatigimmassuk Kalaallit Nunaat Danmarkilu annertunerpaamik naligiittariaqartut aammalu naalagaaffeqatigiinnermi atuuttup tunngaviisa iluanni kalaallit inuiaat annertunerpaamik imminnut oqartussaaffiginerulertariaqartut Danmarkimi aammalu Kalaallit Nunaanni naalakkersuisut isumaqatigiipput isumalioqatigiissitaliorniarlutik illuatungeriinneersunik amerlaqatigiinnik ilaasortalinnik. Namminersorneq pillugu Isumalioqatigiissitat inaarutaasumik isumaliutissiissutaat isumalioqatigiissitat suliaannut pingaaruteqartumik ilaassaaq.

Kalaallit Nunaata inatsisitigut tunngaviusutigut inissisimanera atuuttoq aallaavigalugu aammalu inatsisit inuiat akornanni atuuttut tunngavigalugit inuiaat kalaallit imminnut oqartussaaffigisinnaanerat naapertorlugu inatsisit tunngaviusut periarfiissiinerat naapertorlugu Kalaallit Nunaanni oqartussaasut oqartussaaffinnik allanik qanoq ilillutik tigusisinnaanerannik isumalioqatigiissitat isumaliutiginnissapput siunnersuuteqassallutillu. Isumalioqatigiissitat tamanna pillugu inatsisissiussapput, aamma suliassaqarfiit Kalaallit Nunaanni Namminersornerullutik Oqartussat pillugit inatsit naapertorlugu Kalaallit Nunaanni oqartussaasunit tiguneqareersut eqqarsaatigalugit.

Isumalioqatigiissitat tamatuma saniatigut suliassaqarfiit naalagaaffimmiit Namminersornerullutik Oqartussanut nuunneqareersut sammissanngilaat.

Isumalioqatigiissitat sulinerminni tunngavigissavaat piginnaatitaanerit pisussaaffiillu imminnut naapertuuttuunissaat. Kalaallit Nunaata Danmarkillu akornanni aningaasanut tun-ngasut pillugit nutaamik aaqqissuussisoqarnissaanut isumalioqatigiissitat isummersuuteqarlutillu siunnersuusiussapput.

Isumalioqatigiissitat sulinertik namminneerlutik aaqqissuutissavaat, tamatumunnga ilanngullugu suleqatigiissitanik pilersitsisinnaaneq. Isumalioqatigiissitat sulinermi atugassaminnik paasissutissanik Danmarkimi aammalu Kalaallit Nunaanni qitiusumik allaffeqarfinnit pissarsiniarsinnaatitaapput.

Danmarkimi Kalaallit Nunaannilu naalakkersuisut isumaqatigiipput Kalaallit Nunaat namminersulivikkusunnersoq kalaallit inuiaqatigiit aalajangigassarigaat nutaamillu aaqqissuussinerup tamanna allanngortissanngikkaa. Taamaattoqassappat inatsisini tunngaviusuni § 19-imi malittarisassat malillugit isumaqatigiissuteqartoqarnikkut namminiilivittoqarsinnaassaaq. Isumalioqatigiissitat nutaamik aaqqissuussinissamik siunnersuutaat Kalaallit Nunaata namminersulivissinnaanera pillugu aalajangersakkamut naapertuuttumik imaqassaaq.

Isumalioqatigiissitat nutaamik aaqqissuussinissap aallartinneqarnissaa pillugu Danmarkimi Kalaallit Nunaannilu naalakkersuisut akornanni isumaqatigiissutissamik siunnersuusiussapput.

Danmarkimi naalakkersuisut isumalioqatigiissitani ilaasortat arfineq marluk Folketingip inassuteqarnera malillugu toqqassavaat ilaasortallu allat arfineq marluk partiit ataatsimooqatigiilluunniit Kalaallit Nunaanni Inatsisartuni ilaasortaatitallit inassuteqarnerat malillugu Kalaallit Nunaanni naalakkersuisut toqqassallutigik.

Tamatuma saniatigut Danmarkimi Kalaallit Nunaannilu naalakkersuisut ataatsimoorlutik isumalioqatigiissitat siulittaasussaat siulittaasuatalu tullissaa toqqassavaat.

Kalaallit Nunaanni Danmarkimilu naalakkersuisut immikkut peqataatitassat tamarmik immikkut marluk toqqassavaat.

Naatsorsuutigineqarpoq isumalioqatigiissitat pilersinneqarnerminniit ukiut marluk qaangiutsinnagit suliartik naammassiniassagaat isumaliussiissummillu saqqummiussillutik. Isumalioqatigiissitat isumaliutissiissutissamik ilassaannik saqqummiussisinnaapput.

Danmarkimi Kalaallit Nunaannilu naalakkersuisut isumalioqatigiissitat isumaliutissiissutaat tamarmiusoq saqqummerpat isumalioqatigiissitat siunnersuutaasa oqallisigineqarnissaat isumaqatigiissutigaat.

- 0 -

Isumalioqatigiissitat allattoqarfiannik pilersitsineq kiisalu isumalioqatigiissitat sulinerata aningaasalersorneqarnera, tassunga ilanngullugit allatseqarnikkut ikiorneqarnerat angalasarnerillu, pillugit Danmarkimi Kalaallit Nunaannilu naalakkersuisut akornanni erseqqinnerusumik isumaqatigiissutigineqassapput.