Namminersornerup ataani suliassaqarfiit tiguneqarsinnaasut

Namminersornerullutik Oqartussat inatsisaanni ullumi atuuttumi suliassaqarfiit Kalaallit Nunaata naalagaaffimmit tigusinnaasai nalunaarsorneqarsimapput. Suliassaqarfiit taakku ukiut ingerlanerini tigujartuaarneqarnikuupput, ullumikkullu taamaallaat suliassaqarfiit ataasiakkaat iluanni immikkoortuaraaluit amigaataapput.

Taamaattumik pisariaqartinneqalersimavoq nutaamik suliassaqarfinnik Kalaallit Nunaata tigusinnaasaannik nalunaarsuinissaq.

Kalaallit-Qallunaat Namminersorneq pillugu Isumalioqatigiissitaata isumaliutissiissutaanni namminersorneq pillugu inatsisissamut missingiut atuarneqarsinnaavoq. Inatsisissamut missingiummi takuneqarsinnaapput suliassaqarfiit namminersornerup ataani akisussaafigilersinnaasagut.

Inatsimmut missingiussamut ilanngussami ”Nalunaarsukkat I”-mi allaqqasut tassaapput suliassaqarfiit Kalaallit Nunaata namminersortup nammineerluni aaliangikkaminik tigusinnaasai.

Ilanngussami ”Nalunaarsukkat II”-mi allaqqasut tassaapput suliassaqarfiit Kalaallit Nunaata namminersortup Danmarkillu isumaqatigiinniutigeriarlugit Kalaallit Nunaanniit namminersortumiit tiguneqarsinnaasut. Isumaqatigiinniartoqareerpat Kalaallit Nunaata namminersortup nammineq aaliangissavaa suliassaqarfiit ataasiakkaat qaqugu tigussanerlugit.

Suliassaqarfiit Kalaallit Nunaanni Namminersorlutik Oqartussaniit tiguneqartut tiguneraniit Kalaallit Nunaanni Namminersorlutik Oqartussaniit aningaasalersorneqartassapput (maannakkut Namminersornerullutik Oqartussat ataani suliassaqarfiit nutaat tiguneqartut ataatsimoortumik tapiissutit qaffariarneratigut aningaasalersorneqartarput. Namminersornerup ataani ataatsimoortumik tapiissutit suliassaqarfiit nutaat tigunerisigut tapiissutit qaffariartassanngillat).

Isumalioqatigiissatami aaqqissuussineq una nutaaq innersuussutigineqarpoq: Kalaallit Nunaat ukiut ingerlanerini suliassaqarfinnik nutaanik tigusisarnera ilutigalugu nammineernerulernissaa aningaasatigullu imminut napatikkiartuaarnerulernissaa anguniarlugu.

Suliassaqarfiit nalunaarsukkani allaqqasut ataatsikkut tiguneqassanngillat. Ukiulli ingerlanerini tiguneqartarnissaat naatsorsuutigineqassaaq. Aaliangerneqarnikuunngilaq suliassaqarfiit tiguneqartussat sorliit siulliunneqassanersut sorliillu kingulliunneqassanersut. Kalaallit Nunaata namminersortup piareeqqassusia malillugu tigusisarnerit piumaarput.

Naalagaaffiup Finansministeriaata naalilersuinera malillugu suliassaqarfiit nalunaarsukkani allaqqasut massakkullu naalagaaffimmiit tigummineqartut katillugit naalagaaffimmut 2006-mi 305 mio.koruuninik aningaasartuutaasimapput.

Suliassaqarfinnik tigusisoqarsinnaavoq nalunaarsukkani allaqqanngittunik - soorlu aalisarnermut nakkutilliineq. Suliassaqarfik taanna immikkut qanoq aningaasartuutaatiginera ilisimaneqaqqissaanngilaq. Aalisarnermut nakkutilliineq Nunatta illersornissaanut tunngassuteqaqqissaanngikkaluartoq ullumikkut illersornissamut sulianut uiggiunneqarami.

Siunissami namminersornerup ataani aalisarnermut nakkutilliineq tiguneqarsinnaavoq. Kisianni aamma periarfissaavoq aatsaat Kalaallit Nunaat namminiilivinnialerpat naalagaaffinngornialerpallu aalisarnermut nakkutilliineq Kalaallit Nunaanniit tiguneqarsinnaanissaa.

Kalaallit Nunaat namminersortuutillugu sulilu naalagaaffinngorsimatinnagu suliassaqarfeqassaaq Nunatsinnit tiguneqarsinnaanngitsunik. Suliassaqarfiit taakku aatsaat tiguneqarsinnaassapput Kalaallit Nunaat namminiilivinnissamik aaliangerpat naalagaaffinngornialerpallu. Suliassaqarfiit taakku uani nittartakkami isumaliutissiissummilu takusinnaavatit.

Suliassaqarfiit pillugit ilisimasaqarnerulerusukkuit isumaliutissiissummi misissuisinnaavutit.