Namminersorneq pillugu paasisitsiniaaneq

Namminersorneq pillugu paasisitsiniaanermi Kalaallit-Qallunaat Namminersorneq pillugu isumaliutissiissusiaat tunngavigalugu ingerlanneqarpoq isumaliutissiissutip imaa taasissutigineqartussaammat.

Paasissutissat allat namminersornermut tunngassuteqarsinnaasut ilanngunneqartarputtaaq.

Paasisitsiniaanerup ilagaa inoqutigiinnut naqitanik agguaassinerit aammalu nunatsinni aviisinut atuagassianullu paasissutissanik quppernernut ilanngussisarnerit.

Namminersorneq pillugu isumaliutissiissut Namminersornerullutik Oqartussat nittartagaani www.nanoq.gl aaneqarsinnaanikuuvoq sulilumi aaneqarsinnaalluni imaluunniit atuakkanik atorniartarfimmi atorniarnerqarsinnaalluni. Namminersorneq pillugu paasissutissat nittartakkami takuneqarsinnaanikuupput sulilu takuneqarsinnaallutik.

Nunatsinni innuttaasunik ataatsimiisitsinerit 30-it sinnerlugit amerlassusilinni innuttaasut Isumaliutissiisummik naqitannillu allanik perusuttut pisinnaanissaannut periarfissinneqarnikuupput.

Innuttaasunik ataatsimiisitsinerit ilaat KNR Tv-atigut radioatigullu toqqaannartumik aallakaatinneqartarnikuupput. Innuttaasunik ataatsimiisitsinerni namminersornerup imarisai saqqummiunneqartarput innuttaasullu apeqquteqarusuttut politikerinut atorfilittalinnulluunniit apeqquteqarsinnaatitaasarlutik.

Tamatuma saniatigut paasissutissiinerit oqallinnertalinnillu ataatsimiisitsisarnerit 15-it missaaniittut nunatsinni ilinniarfeqarfinni assigiinngitsuni ingerlanneqartarsimapput.

Aammattaaq namminersorneq pillugu tv-kut allakaatitassiat sisamat suliarineqarput aallakaatinneqarnerisalu kingorna oqallititsisoqartarluni.

Namminersorneq pillugu radiokkut aallakaatitassiat arfineq-pingasut Namminersornerullutik Oqartussat Tusagassiiviat peqatigalugu suliarineqarput aallakaatinneqarlutillu. Namminersorneq pillugu TV-kut paasisitsiniutit naatsut pingasut innuttaasut taasinissaat 25. november sioqqullugu suliarineqarput KNR-Tv-kullu takutinneqarlutik.