Namminersornermut angerneq pillugu pilluaqqussutit

Kalaallit Nunaanni innuttaasut namminersorneq pillugu ulloq 25. november 2008 taasitinneqarmata amerlanerussuteqarluartut namminersulernissamut akuersipput. Akuersinermut atatillugu inuiannit allanillu pilluaqqussutit Namminersornerullutik Oqartussanut nassiunneqartut tamaani atuarneqarsinnaapput.

Kalaallinut inuiaqatigiinnut ICC-mit pilluaqqussut

Novembarip 26-at, 2008

Asasara Naalakkersuisut siulittaasuat Enoksen

Ippassaq qinersinersi tunngavigalugu aqqutissaq oqaluttuarisaanermut malunniuteqartussaq immikkuullarissorlu maanna toqqarsimaligarsi pillugu ilinnut inuttut, Kalaallinullu tamanut, qamannga pisumik pilluaqqusingaarnera apuukkusuppara. Tamassi peqatigiillusi aqqutissaq Kalaallit namminneq inuunertik aqukkumallugu, siunissartillu qanoq issanersoq aalajangersorumallugu kissaatigisarsi tusarliupparsi.

Angernissigut Qallunaat Nunaannut, EU-mut nunarsuarmullu tamarmut suaarutigaarsi Kalaallit immikkut inuiaasut, Kalaallillu oqaatsisi pisortatigoortumik oqaaserilissagisi, naggueqatigiillu Inuit oqartussaanertik, soorlu qanittumi Kuujjuarmi naggueqatigiit siuttui naapimmata eqqartoripput, namminneq aquttussaagaat. Suliaq tamanna eqqissisimasumik inuillu tamat oqartussaanerat aqqutigalugu ingerlapparsi, tamannalu immini ilinnut pilluaqqussutissaavoq.

Uagut Canadamiittugut pisoq tamanna inuiaat issittormiuusut pisinnaatitaaffimminnik inuunerminnilu aqutsinerisa alloriarnerattut annertuutut isigaarput, Issittumilu inuiaat naggueqatigiillu Inuit neriunnermik peqalersippasi namminneq aamma siunissaminnik aqutsinerulernissamut periarfissaqarnermut tikkuussisuugassi. Ilungersuuteqarlusi sorsunnersi ammma uagut sorsunneraarput.

Naak inunnit qinigaallusi Naalakkersuisuugaluarlusi inuiannit Inunnit aallaaveqarlusi Inuit Nunaanni nuna inuinit aqunneqartoq najugaraarsi.

Naggueqatigiit Inuit tamaasa assut tulluusimaartippasi.

Ataqqinnittumik

Duane Smith
Præsidenti


--------------------------------------------------------------------------------

Sametingip inuiaat kalaallit ilassivai

(27. november 2008)
Sametingimiit Kalaallit Nunaata inuiaallu Kalaallit kiisami Qallunaat Nunaannut atanertik pillugu isumartik tusarliutissallugu periarfissaqarnerat tusaratsigu iluarisimaarpugut. Tamanna 1954-imili pereersimasussaagaluarpoq FN-ip nunat immikkoortortaqarfii imminnut aquttuunngitsut pillugit nalunaarsuisoqarmalli.

Taamani FN-ip Qallunaat Nunaat periarfissikkaluarpaat Kalaallit Nunaat nunanut kiffaanngissusermik demokratimillu atugaqarfiunngitsut naalagaaffiillu innuttanut pisussaaffiinik ataqqineqanngitsoqarfiit akornanni nalunaarsorsimasutut ilaassanngitsoq.

Nalunaarsorsimaffiup tamatuma tunngaviusumik siunertaraa inuiaat kikkulluunniit kiffaanngissuseqarnissamut avataaniillu naqisimaneqarnermit pituussaarnissamut periarfissinneqassasut.

Kalaallit Nunaanni Namminersornerullutik Oqartussat inatsisaat 1979-imeersoq annertuumik killilersugaavoq, soorlu pisuussutsit uumaatsut, assersuutigalugit aatsitassat, uulia gassilu oqaasissaqarfigineqanngillat.

Sametingip maluginiarpaa Namminersornerullutik Oqartussat eqqunneqarneranni siuttuusut ataqqineqarluartut ilaata Jonathan Motzfeldtip kisaatigigaa pisuussutit uumaatsut Kalaallit Nunaata namminersorneranut qulequttatut pingaarnertut sammineqarlutik inissisimassasut.

Kalaallit inooriaasiat Saamit inooriaasiattulli inuutissarsiutinut qangaaniilli aallutaasunut atasorujussuuvoq tassanilu pisuussutsit uumassusillit qitiupput. Sametingip maluginiarpaa pisuussutsit uumassusillit, ilaatigut aalisakkat piniakkallu, nunap iluani nunallu tamalaat akornanni annertuumik killiliiffigineqartalersimasut. Nalitsinnissaaq silaannaap allanngornerani inuutissarsiorneq taamaattoq tatineqariartorpoq.

Tamakku tunuliaqutaralugit pisuussutsit uumaatsut politikkikkut aningaasarsiornikkullu inuiaat Kalaallit Kalaallillu Nunaata sakkugilissavai pisariaqartut namminersornermut pisinnaatitaaffik piviusunngortinneqassappat.

Kalaallit inuiattut taasinerminni aalajangiussaat Qallunaat Nunaata tapersissagaa Sametingip annertuumik pingaartippaa.

Sametingimiit Kalaallit taasinissigut namminersornermut piumassuseqarlusi nalunaarnersi pillugu angusaqarluarnissassinnik kissaappatsigit.

Namminersorneq pillugu apeqqut inuiaat Kalaallit akornanni annertuumik eqeersimaarluni sammineqarsimavoq tamannalu pillugu annertuumik nuannaartorinninnerput tusarliukkusupparput. Taasiartorsimasut amerlassusiatigut amerlanerussuteqangaartullu namminersornissamut akuersisimanerisa tamanna takutippaa.

Sametingimiit inuiaat Kalaallit pitsaasumik suleqatiginissaat qilanaaraarput.

Til top Nutarterneqarpoq : 26.02.2013