Namminersorneq Pillugu 2008

Suliassat 2008-imi pingaarnerpaartarinikuuvaat namminersorneq pillugu paasititsiniaanissamik pilersaarusiorneq ingerlatsinerlu 25. november 2008-imi taasisoqarnissaata tungaanut.Namminersorneq pillugu paasititsiniaaneq Kalaallit-Qallunaat Namminersorneq pillugu Isumalioqatigiisitap isumaliutissiissutaa innersuussutaat tunngavigalugit ingerlanneqarpoq, taakkualu isumaliutissiissummi nassaarineqarsinnaapput.

Innuttaasunik taasisitsinermi amerlanerussuteqarluartut namminersulernissamut akuersinerisa kingorna Namminersorneq pillugu allaffimmi 2009-imi suliassat ilagilerpaat namminersorneq junip 21-ani 2009-imi eqqunneqarnissaanut piareersarneq. Aammattaaq namminersorneq pillugu suliassat ilagaat innuttaasunut namminersorneq pillugu suliat sumut killinnerannik ataavartumik paasissutissiineq kiisalu namminersorneq pillugu apeqquteqaatit akinissaat.
Tamatuma saniatigut aamma Naalakkersuisut Siulittaasuannut namminersorneq pillugu siunnersuisarnissaq suliassat ilagaat.