Misissuutinik (Antigentest-inik) illoqarfinnut nunaqarfinnullu nassiussuisoqassaaq

Naalakkersuisut kommunillu qanittumi ataatsimiipput tassanilu eqqartorpaat misissuutit (antigentesterutit) qanoq agguaanneqassanersut misissuutissanillu pisinissamut periarfissaqanngitsut qanoq iliuuseqarfigineqassanersut.

”Borgmesterit ataatsimeeqatigineqareerput ataatsimoorlutalu isumaqatigiippugut innuttaasunit sanngiinerpaat salliutinneqassasut. Borgmesterit aamma namminneq kissaatigivaat aalajangissallugu misissuutit qanoq suliffiuteqarfimminni agguataarneqassanersut”, Isumaginninnermut, Suliffeqarnermut Nunamullu Namminermut Naalakkersuisoq Mimi Karlsen oqarpoq. Taassuma Kirsten L. Fencker napparsimalluni sulinngiffeqarnerani taarserpaa.

Tamatumunnga atatillugu kommunit nalunaarutigivaat misissuutinik pisinissamut akissaqannginnerusunut agguaasseqataarusunnatik. Taamaattumik Naalakkersuisut allatut iliuuseqarniarlutik periarfissanik ujartuipput. Anguniagarli tassaavoqq innuttaasut tamarmik nammineq misissorsinnaanissaat, akissakilliornerlu aniffiussanngitsoq.

”Misissuutit (Antigentesterutit) inuiaqatigiinni illersortariaqakkatsinnut agguaanneqassapput, aammalu soorlu utoqqaat angerlarsimaffiini angerlarsimaffinnilu ikiortit akornanni nakkutigineqarsinnaanngitsumik tuniluuttoqalissagaluarpat misissuisarnermi sakkussatut atorneqassallutik. Pingaaruteqarpoq tuniluutitsinaveersaartitsinissaq eqqussinissaq pinaveersaarneqassammat, sulisummi tunillatsissimasut innuttaasunik isumaginnittarnerat ajornakusoortussaammat. Misissuutissanik amerlangaatsiartunik inniminniivugut, amerlasuullu nassiunneqareerput, taamaalillunilu sapaatit akunnerini tulliuttuni inuiaqatigiinni immikkoortut misissuutinik taamaattunik tigusisussat amerlinissaannut periarfissaqalissaagut”, Mimi Karlsen oqarpoq.

Illoqarfiit nunaqarfiillu tuniluuffiungaatsiartut aallaqqaammut salliutinneqassapput, kisiannili Kalaallit Nunaanni inoqarfiit tamarmik periarfissaqalernerani erngertumik sukkasuumik misissuutinik nassiussuivigineqarnissaat pilersaarutaavoq, tamatumanili angallannikkut pissutsit silallu unammillernartoqarnera apeqqutaassapput.

Paasissutissanik sukumiinerusunik pissarsiniaraanni attavigineqassaaq Isumaginninnermut Sulisoqarnermut Nunanullu Namminermut Naalakkersuisup Mimi Karlsenip allattaa Naja Lynge Petersen mail: nlyp@nanoq.gl oqarasuaat 34 56 11