Qimminik ilaqutariinnilu uumasuutinik eqqussineq piumasaqaateqarpoq

Qimminik ilaqutariinnilu uumasuutinik eqqussineq piumasaqaateqarpoq
Akuersissuteqarani uumasunik Kalaallit Nunaannut eqqussineq pillarneqarnermik kinguneqarsinnaavoq. Uumasut unioqqutitsilluni eqqunneqartut taarsiiffiginertaqanngitsumik piginnittumit arsaarinnissutaasinnaapput, uumasunillu nakorsaqarnermut atatillugu tamanna nalilerneqarpat toqunneqarsinnaallutik.

Unioqqutitsilluni qimminik eqqussisarnermut qanittukkut suliat nutaat tunngavigalugit Kalaallit Nunaanni Uumasunut Nakorsaqarfimmit Inuussutissalerinermullu Oqartussaaffimmit qimminik ilaqutariinnilu uumasuutinik allanik nunanit allanit eqqussinermi malittarisassat eqqaamaqquneqarput:

Danmarkimi Kalaallit Nunaata Sinniisoqarfianit eqqussinissamut akuersissummik pissarsereernikkut Kalaallit Nunaannut uumasunik eqqussinissaq taamaallaat akuerineqarsinnaavoq. Piumasaqaatit peqqissutsimut nalunaarsuinermullu tunngassuteqartut arlallit naammassineqarsimappata eqqussinissamut akuersissut taamaallaat suliarineqarsinnaavoq. Qimminut tunngatillugu piumasaqaatit uku pineqarput:
- Qimmit nappaataannut, parvovirusimut perlerornermullu akiuussutissiineq atuuttoq
- Kalaallit Nunaanni kommunimit najugaqarfiusumit qimmeqarnissamut akuersissut.
- Peqqissutsimut uppernarsaat uumasut nakorsaanit suliarineqartoq (aallarnermiit sivisunerpaamik ullunik 14-inik pisoqaassusilik)
- Qimmit arnavissat naartusinnaajunnaarsinneqarnerat pillugu uppernarsaat

Eqqussinissamut akuersissut Kalaallit Nunannut aallalernermi Kastrupimi pisattanik tunniussinermi takutinneqassaaq. Akuersissut uumasumut pineqartumut atuunnersoq tassani nakkutigineqassaaq.

Uumasunik eqqussinermut malittarisassat eqqortinneqarnissaat pingaaruteqarluinnartuuvoq, taamaallaallu uumasut peqqissut eqqunneqartarnissaat taamaaliornikkut isumannaarneqassaaq. Uumasut nunamut eqqunneqartut naalagaaffimmi uumasut pillugit nalunaarsuiffimmi nalunaarsornissaat akuersissutikkut aamma isumannaarneqassaaq, taamaalillutik piginnittumut tungasut akiuussusiinissamullu inatsisitigut pisussaaffiit nakkutigineqarsinnaassallutik. Malittarisassat atuupput ilaatigut nappaatinik tunillaassuuttunik eqqussinissamut nunagisami uumasut illersorniarlugit. Malittarisassat eqqortinneqanngippata tamanna ilungersunaqisumik kinguneqarsinnaavoq.

Paasisaqarnerorusukkuit Aalisarnermut Piniarnermullu Naalakkersuisoqarfik attavigiuk , apn@nanoq.gl