Ataatsimeersuarneq Greenland Forum Nuuummi Ingerlanneqassaaq

Greenland Forum, Naalakkersuisut aamma Arctic Circle Asseblyp akornanni suleqatigiinnikkut pilersinneqartoq, ulluni 27. – 29. august 2022 Nuummi ingerlanneqassaaq, qulequtarineqassaarlu: Kalaallit Nunaat nunarsuarmi issittumi: silap pissusia aamma atugarissaarneq – geopolitikki aamma ineriartorneq.

 

Nunat tamalaat akornanni ataatsimeersuarneq annertooq, Arctic Circle Greenland Forum ukiut aappassaanni COVID-nappaalanersuanik peqquteqartumik taamaatitinneqartarsimasoq, maannakkut aalajangiunneqarpoq aggustip naanerani ingerlanneqassasoq.

Arctic Circle Assembly, nunat tamalaat akornanni attaveqaataasut annerpaat ilaattut, Issittoq pillugu oqalliffiullunilu suleqatigiiffiiusup immikkoortuattut Greenland Forum ingerlanneqassaaq. Arctic Circle Assembly ornigarneqarluarluni naalakkersuinikkut sulialinniit, kattuffinniit, suliffissuarniit, ilisimatusarfinniit, isummersoqatigiiffinniit, avatagiisit pillugit suliniuteqarfinniit, nunap inoqqaaviniit aammalu Issittoq pillugu ineriartornermut soqutigisaqartuniit peqataaffigineqartarpoq.

”Nunarsuarmioqataanitsinni annertuumik sulissutigivarput ikinngutitta, suleqatigisssattalu annertusarlugit nukitsorsarnissaat, pingaartumik nunat sanilerisatta qaninnerit akornanni.
Naalakkersuisut kissaatigivaat Issittoq pillugu suleqatigiinnermi oqallinnermilu ersarissumik Kalaallit Nunaat pillugu aamma inuiaqatigiinni eqqissisimasumik piujuartitsinermillu ineriartortitsinitsinnik inissisimanitsinnik ukkatarinninnissaq. Taamaammat nuannaarutigivara kissaatit taakkorpiaat ataatsimeersuarnermi qulequttani ersersinneqarmata”

” Inuiattut issittormiuusutut, qitiulluinnartumik Issittoq pillugu qulequttanik oqallinnerni aammalu aalajangiisarnerni inuiaqatigiitsinnut tunngasuni inissisimavugut. Taamaammat nuannaarutingaara Arctic Circle peqatigalugu ataatsimeersuarneq Nuummi ingerlanneqassasoq isumaqatigiissutigingatsigu. Ataatsimeersuarnermut nunat tamalaaneersut, ungasissumiit qanittumiillu tikittussat tikilluaqqunissaat qilanaarivara. Neriuppungalu ataatsimeersuarneq Kalaallit Nunaanniit peqataaffigilluarneqarumaartoq, taamaasilluta amerlasuujulluta tikeraagut kikkuunitsinnik sunillu tunniussaqarsinnaanitsinnik takutitsivigisinnaangatsigit” taamak oqarpoq Naalakkersuisut Siulittaasuat Muté Bourup Egede.

 

Naatsorsuutigineqarpoq Greenland Forum 300-500 akornanni peqataaffigineqassasoq.

Katuaq kultuurikkut illorsuaq Nuummiittoq aaqqissuussamut ingerlatsiviussaaq.

 

Annertunerusunik paasissutissanik piniarnermi attavigineqassaaq Reykjavikimi Sinniisoqarfimmi pisortaq Tove Søvndahl Gant, tovs@nanoq.gl  / +354 6655610

 

Paasissutissat annertunerit Greenland Forum pillugu nanineqarsinnaapput Arctic Circlep quppersangaani

 

Arctic Circle Allattoqarfia 1. juni 2022-p tungaanut ataatsimeersuarnermi qulequttani attuumassutilinni ataatsimeeqataanissamut qinnuteqarnernik tigusisinnaavoq. Uani atuarneqarsinnaavoq.