Naalakkersuisut: Ataatsimoorluta ajornartorsiutit aaqqitsigit

Justus Hansen, Kommuneqarfik Sermersuumi Demokraatit sinnerlugit kommunalbestyrelsimi ilaasortap, Tunumi sapaatip akunnerani alianartumik marlunnik toqutsisoqareernerata kingorna, iliuuseqartoqarnissaa ujartorpaa. Taassuma ineqarnermut pissutsit isornartorsiorpai, tassami inuppassuit inissakillioqalutik najugaqatigiittarnerat takuneqakkajummat.
”Alianartuaannarpoq toqutsisoqaraangat.
Inissaaleqinermut atatillugu unamminartoqarnera ilisimaaraarput,arlariinnillu suliniuteqarpugut”, Naalakkersuisunut ilaasortaasut pingasut, Mimi Karlsen, Marianne Paviasen, Paneeraq Olsen oqarput.

Naalakkersuisut ukuninnga suliniuteqarput:

  • Meeqqanut inuusuttunullu suliniutit
  • Ilinniagaqalernissamut piareersimaneq ilinniagaqarnermillu naammassinnittarneq
  • Suliffissaqartitsinermi unammilligassat
  • Inuussutissarsiutinik ineriartortitsineq
Inuusuttunut inissialiortitsisoqarpoq
Ineqarnermi pissutsit inoqutigiinni ataasiakkaani inuuniarnermut atugassarisanut annertuumik sunniuteqartarnerat Naalakkersuisut akuersaarpaat. Naalakkersuisut qinersinerup kingorna naalakkersuisunngoramik aningaasanut inatsisip siulliup akuerineqarneratigut Tasiilami Ittoqqortoormiinilu inuusuttunut inissianik sanaartornissamik pilersaarut aallartipaat. Tamanna pivoq illoqarfinni taakkunani marlunni inuusuttunut najukkani kissaatigineqartunik inissianik amigaateqartoqarnera paasillugu. Ittoqqortoomiini inuusuttunut inissiat marlunniit sisamanut Tasiilamilu inuusuttunut inissiat sisamaniit arfineq pingasunut pilersaarusiorneqarput. Inissiat sanaartugassat inaarutaasumik amerlassusissaannut nunaminertat atugassanngortinneqartussat inissiallu inuusuttut sullinniakkat ujartugaat qanoq angitigissanersut apeqqutaassapput. Tamakku pilersaarusiunnginnermi paasinarsisinneqassapput.

Ilisimavarput nunami tamarmi inissianik iluarsartuussinissaq kinguaattoorfiusorujussuusoq, Naalakkersuisut inissiat pillugit kommuninik suleqateqarusupput, pilersaaruteqartoqarporlu kommuninit akineqarnissaat utaqqimaarneqartunik.

Kommuneqarfik Sermersooq qanimut suleqatigineqarpoq
Sumiginnaasarnerup akiorniarnerani suliniutit arlariiupput – taakkulu Kommuneqarfik Sermersooq qanimut suleqatigalugu aaqqinniarneqarput. Nuna tamakkerlugu suliniuterpassuaqarpoq, assersuutigalugit meeqqat ornittagaat, Isumaginninnermut Aqutsisoqarfiup angalatittagai, MANU-mi pikkorisaasarneq, Siusissukkut iliuuseqartarneq, ulluunerani neqeroorutini sulisunik piginnaanngorsaqqiisarneq il.il., taakkunani Tasiilaq ilaavoq. Suliniuterpassuit meeqqanut inuusuttunut navianartumiittunut, angajoqqaanut sulianik ingerlatsisunut tunngatinneqarput. Suliniutit taakku tamarmik inuttut atukkatigut unammilligassanik aaqqiinissamut ikiuiniarnermut Tasiilami inuttaasut pitsaanerusumik inuunerissaalernissaannut tapersiissapput.

Kommunalbestyrelse suleqatigiissutissamik kissaateqarpat Naalakkersuisut suleqataarusuppugut, tamatta akisussaaffitsigut kivitassaqaratta.

Annertunerusumik paasisaqarusukkuit Isumaginninnermut Sulisoqarnermut Nunamullu Namminermut Naalakkersuisumut allatsi Naja Lynge Petersen attaveqarfigiuk: nlyp@nanoq.gl Oqarasuaat: 345611.