Frederik Hinnarillu ilagalugit meeqqanut Coronap nalaani tusarnaartitsineq suli alla – Facebookkikkut toqqaannartumik aallakaatinneqartoq

Sisamanngornermi ulloq 9. decembari nalunaaqutaq 13.00-imiit 14.00-imut Frederik Hinnarillu corona pillugu meeqqanut toqqaannaq tusarnaartitseqqinniarput. Tusarnaartitsinermi ilaatigut meeqqat cononarnikuusimasut napparsimasimanertik pillugu oqaluttuartut naapissinnaavatit.

Corona pillugu meeqqat oqaluunneqarnissaat ajornakusoorsinnaavoq, aamma massakkoqqissaaq nunatsinni coronamik tunillaassuunnerup annertuumik siaruaannerata meerarpassuit annilaangalersippaat toqqissisimajunnaarsillugillu.  Corona pillugu oqaluttuarpassuit tusaasarpaat, sorliilli upperissavaat?  Coronamik tunillatsikkuma susoqassava?  Navianarpa?  Anaanaga ataatagalu tunillatsippata taavami?  Apeqqutimik akinneqarnissaannut meeqqat ikiorniarlugit toqqissisimalerseqqinniarlugillu corona pillugu meeqqanut toqaannartumik tusarnaartitseqqittoqassaaq.

 

Ulloq 25. novembari Corona pillugu meeqqanut Facebookkikkut toqqaannartumik tusarnaartitsineq Frederiup Hinnariullu Naalakkersuisut suleqatigalugit ingerlappaat.  Tassani corona pillugu meeqqat apeqqutaat akivaat nuannersorpassuarnillu nipilersorlutik.  Tusarnaartitsineq nuannarineqartorujussuusimavoq, massakullu suli allamik sisamanngornermi ulloq 9. decembari nalunaaqutaq 13.00-imiit 14.00-imut tusarnaartitsisoqaqqissaaq.  Tassani meeqqat marluk coronarnikuusimasut apersorneqassapput.  Taakku coronarsimanertik qanoq misigisimanerlugu oqaluttuarissavaat.  Tamatuma saniatigut oqarasuaammit siunnersuisarfiusumit Tusaanngamit siunnersuisartoq meeqqanik inersimasunillu assersuutigalugu corona pillugu annilaangasunik, oqaloqateqartarnermik sungiussilluarsimasumik tusarnaartitsinermi naapitsisoqarsinnaavoq.  Naggataasigullu nipilersukkat nuannersorpassuit meeqqat erinarsoqataaffigisinnaasaat nipilersuutigineqassapput.

 

Taamaammat Hinnariup Facebookkimi quppersagaatigut sisamanngornermi nalunaaqutaq 13.00 nammineq meeqqavit, atuartitavit meeqqallu allat toqqaannartumik tusarnaartitsinissami isiginnaarnissaannut ikiukkit.  Toqqaannartumik isiginnaaqataasinnaanngikkussi, taava tusarnaartitsisoqareerpat tusarnaartitsineq, soorlu tusarnaartitsineq siulleq assigalugu, Hinnariup Facebookkikkut quppersagaani takuneqarsinnaalerumaarpoq.

 

 

Attaveqarfissaq

Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut +299 25 78 54-ikkut attavigiuk.