Immitsinnut ikioqatigiittarnerput kinaassutsitsinnut ilaavoq

- Arlagut nammineq kajumissutsiminnik suliaqareerput. Amerlasuusugut nammineq kajumissutsimik suliaqarnermi ikiuerusuttarpugut. Imminut ikioqatigiittarneq ataatsimoornermik misigissutitsinnut ilanngussisarpoq. Peqatigiiffimmi suliniaqatigiiffimmiluunniit nammineq kajumissutsimik suliaqarluni inunnik siuningaani ilisimasarereertariaqanngisanik isumassuisoqartarpoq. Aamma inuit imminnut ikioqatigiittarnerat nuannersuujuaannarpoq, soorlu uagut maani Kalaallit Nunatsinni taamaaliortuartartugut, - Meeqqanut, Inuusuttunut Ilaqutariinnullu Naalakkersuisoq Paneeraq Olsen oqarpoq.

Ilaquttatsinnik, ikinngutitsinnik, sanilitsinnik aamma inoqatitsinnik ikiuineq qangaaniilli ileqqoraarput.  Kikkuusut nalugaluarlugit aamma taamaaliortarpugut.  Imminut ikioqatigiinneq kulturitsinniippoq.  Inuiaqatigiinnerput ataatsimoorussaraarput.  Nammineq kajumissutsitsinnik sulinitsigut immitsinnut, sanilitsinnut, illoqarfitsinnut nunaqarfitsinnulluunniit ikiuussinnaavugut.  Suliassaqarfinni uummateqarfigisatsinni ikiuussinnaanerput periarfissaqartinneqassaaq. 

 

-Tallimanut anaanaavunga arfineq marlunnullu aanaajullunga.  Meeqqat ilaasa atugarliortuunerat eqqarsaatigissalluguluunniit sapingajappara.  Aamma inuit innarluutillit kiserliortut eqqarsaatigalugit taama misigisimavunga.  Imaluunniit angerlarsimaffeqanngitsut sumunnarfissaqanngitsut eqqarsaatigalugit.  Inuit tamarmik arlaasa meeraraat, qatanngutigaat angajoqqaaraalluunniit.  Innutaaqatigut paarissavagut, Meeqqanut, Inuusuttunut Ilaqutariinnullu Naalakkersuisoq Paneeraq Olsen oqarpoq nangillunilu:

 

Meeqqanut suliassaqarfimmi nammineq kajumissutsiminnik sulialinnut sinaakkusiunneqartut patajaallisaaffigineqarnerat meeqqanut inuusuttunullu atugarliortunut suliniutit pitsanngorsaavigineqarnissaannut Kalaallit- qallunaallu oqartussaasoqarfiisa assigiinngitsunik suliallit akornanni suleqatigiinnermi immikkut ittumik suliniutaavoq.  Nammineq kajumissutsimik sulinerup naleqarnera, kissaatigigaannilu ajornannginnerusumik nammineq kajumissutsimik sulilersinnaanissaq suliap erseqqissaaqataaffigissavaa.  Nammineq kajumissutsimik sulinermut sinaakkusiussat patajaallisaaffiginerisigut, suliniaqatigiiffiit nammineq kajumissutsiminnik sulerusuttunik amerlanernik pissarsisinnaanngussapput.  Aamma nammineq kajumissutsimik suliaqartup suliaa annertunerusumik pissarsiaqarfigisinnaanngussavaat. 

 

Tassunga aamma Paneeraq ima oqaaseqaateqarusuppoq:

 

- Kalaallit- qallunaallu suleqatigiinnerisa ataanni suliniutini meeqqat inuusuttullu atugarliortut ikiorniarlugit isiginniffiit assigiinngitsorpassuit isiginiarneqarput. Suliniutip massuma meeraannaanngitsut inuusuttuinnaanngitsullu qularnanngitsumik angussavai.  Nammineq kajumissutsimik suliniaqatigiiffiit tamaasa patajaallisaavigisinnaavai.  Nammineq kajumissutsimik suliaqarneq pillugu suliniut kalaallit imminnut ikioqatigiittarnerannit aallaaveqarnera nuannaarutigaara.

 

Suliap taassuma ilaatut tapersersortissarsiornermik suliaqarneq 2022-mi allartinneqassaaq.  Nammineq kajumissutsimik suliaqarneq ukkatarineqassaaq aamma uagut nammineq kajumissutsitsinnik sulisinnaanitsinnut periarfissagut takutinneqassallutik.

 

Ullumikkut ulloq tassaavoq Aningaasaqarnikkut Inooqatigiinnilu Ineriartornissamut Nammineq Kajumissutsimik Suliaqarneq pillugu Naalagaaffiit Peqatigiit Nunarsuaq tamakkerlugu ullorititaat, ullormilu tassani nunat tamat akornanni nammineq kajumissutsimik suliaqarnerup siuarsarneqarnissaa anguniarneqarpoq.  Kalaallit Nunaata ulloq taanna tapersersorpaa.

 

Attaveqarfissaq

Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut +299 25 78 54-ikkut attavigiuk.