Kalaallit Nunaat maanna Kinami pisortatigoortumik sinniisoqarfeqalerpoq

Kalaallit Nunaata Beijingimi sinniisoqarfia maanna ammarpoq. Sinniisoqarfiup pisortaa Jacob Isbosethsen, ukioq manna siusinnerusukkut toqqarneqartoq, maanna allaffimminut inissilluni nunami allami allaffimmik pilersitsinermi suliassat tamaasa suliarileruttorpai.

 

”Naalakkersuisut Inatsisartullu isumaqatigiittut Beijingimi sinniisoqarfitsinnik ammaanissaq siusinnerusukkut aalajangerpaat. Maanna Beijingimiilernerput, tappavanilu allaffimmik ammaalernerput nuannaarutigeqalugu nalunaarutigissavara. Naalakkersuisut ukiuni kingullerni Asiami inuussutissarsiutinik nittarsaassinernik ingerlatsisarput. Maanna Asiami sinniisoqarfimmik pilersitsinerput pingaaruteqartorujussuuvoq, ingammillu Kinami avammut tunisaqartarnitsinni pingaarutilerujussuarmik inissisimasumi, niuernikkut attaveqaatigut iliuuseqarfigiuarlugillu ineriartortittuartariaqarpavut,” Naalakkersuisut Siulittaasuat Múte Bourup Egede taamak oqaaseqarpoq, nangillunilu:

 

“Suleqativut inuussutissarsiortortavullu ataatsimoorluta Kalaallit Nunaata Beijingimi aalajangersimasumik sinniisoqarfeqalerneratigut, nunat tamat akornanni Asiami nunanik attaveqaatitsinnik ineriartortitsinissamut periarfissarpassuaqartoq isumaqarpugut.”  

 

Beijingimi sinniisoqarfik Kalaallit Nunaata Asiami – ingammik Kinami - aningaasaqarnikkut, niuernikkut kulturikkullu attaveqaataanik siuarsaanermik suliaqassaaq, Kinallu saniatigut aamma Japanimi Koreamilu Kujallermi. Sinniisoqarfik oqartussanik, namminersorlutik ingerlatsisunik allanillu toqqaannartumik attaveqarlunilu oqaloqateqarnermik ingerlatsissaaq.

Suleqatigiinnermik annertusaanissamut periarfissat arlalippassuupput – tassani mingutsitsinngitsumik nukissiuutit, ilisimatusarneq, ilinniartitaaneq, takornariaqarneq kulturilu ilanngullugit. Taakku saniatigut niuerfinnut anngussinnaanermut periarfissat pitsaanerulersinneqarnissaat, kalaallillu aalisakkanik tunisassiaannik avammut tunisinerup annertusarnissaanut peqataanissaq qulakkeerniarlugu, niueqatigiinnermut isumaqatigiissuteqarfigineqarsinnaasunik periarfissat annertusarneqassapput.

Kalaallit Sinniisoqarfiat sapaatip akunnerani kingullermi ammarpoq, Erfalasorput maanna Beijingimi Savalimmiormiut erfalasuat Dannebrogilu sanileriillutik qallunaat aallartitaqarfianni aalajangersimasumik amuneqartalerput. Allaffimmi aaqqitassat arlallit suli aaqqinneqartussaapput sulilu allaffimmik allanngortiterinissap inaarsarnissaa amigaataavoq, tamannalu piffissami aggersumi ingerlattuarneqassaaq.

 

Covid-19-p siaruaannera pissutsillu pisinnaalersippassuk sinniisoqarfiup pisortatigoortumik ammarneqarnera Naalakkersuisut Siulittaasuata tikeraarluni pisortatigoortumik sinniisoqarfimmik ammaaneratigut malunnartinneqassaaq.

 

Sinniisoqarfik pillugu uani annertunerusumik paasisaqarsinnaavutit

 

 

Paasissutissat erseqqinnerusut pillugit uunga attaveqarit: Sinniisoqarfiup pisortaa Jacob Isbosethsen jsis@nanoq.gl