Eqqugaasut annertunerusumik illersorneqarnissaannut politiillu pillugit aaqqissuusseqqinnissamut alloriarneq

Kalaallit Nunaanni inatsisinut attuutsitsinermut suliassaqarfiup pitsanngorsaavigineqarnissaannut aalajangiiffigisassatut siunnersuutit arlallit Inatsisartut ukiakkut ataatsimiinnerminni akuersissutigisimavaat.

Eqqugaasut annertunerusumik illersugaanissaannut aamma pinerlunnernik eqqugaasunut pitsaanerusumik paasissutissiisarnissanut pitsannguutit tunngassuteqarput. Tamatuma peqatigisaanik politiit pillugit aaqqissuusseqqinneq naammassineqassaaq, tassanilu Kalaallit Nunaanni Politiit naalagaaffimmi politeeqarfinnut allanut naligiissinneqassapput nunallu immikkoortuini siunnersuisoqatigiinnik pilersitsinikkut najugaqarfinni innuttaasut ajunnginnerusumik peqataatinneqartarnissaat qulakkeerneqassalluni.

Taassuma saniatigut politiit pillugit naammagittaalliorsinnaanermik aaqqissuussineq eqqunneqassaaq, soorlu aamma Kalaallit Nunaanni pinerluttulerinermi inatsimmi aamma Kalaallit Nunaanni Eqqartuussisarnermik inatsimmi ullumikkut ilaanngitsunik aalajangersakkanik ikkussisoqassasoq, taakkulu Kalaallit Nunaanni naapertuilluartumik pineqarnermik misigineq inatsisitigullu isumannaatsuuneq qulakkeerinneqataaffigissavaat.

Meeqqanut kinguaassiutitigut atornerluisoqarsimatillugu pillaatisiat qaffanneqarnerat aamma tamatuma peqatigisaanik kannguttaatsuliortunut katsorsaanerup aallartinneqarnissaanik periarfissat tassunga ilaapput.

Aningaasaqarnermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq:

”Ilaatigut inatsisinik atuutsitsinermut suliassaqarfimmut uanga Naalakkersuisutut, Kalaallit Nunaanni inatsisinik atuutsitsinermut suliassaqarfimmut pitsannguutissat pillugit Inatsisartut ukiakkut ataatsimiinnerminni aalajangiiffigisassatut siunnersuutit arlallit akuersissutigisimagaat justitsministerimut nalunaarutigigakku, annertuumik naammagisimaarinnippunga tulluusimaarlungalu”.

Inatsisinik atuutsitsinermut suliassaqarfiup kivinneqarnissaa pillugu inatsisissatut siunnersuutit justitsministereqarfimmik qanimut suleqateqarnerup kingunerai, tassungali uninngillat.

Inatsisinik atuutsitsinermut suliassaqarfiup kivinneqarnissaanut inatsisissatut siunnersuutit justitsministereqarfimmik qanimut suleqateqarnerup kingunerai. Tassungali unissanngillat. Suliassaqarfimmut pitsannguutissanik pilersitsinissamik suliaqarneq Naalakkersuisut ingerlatiinnassavaat aamma massakkorpiaq “Anguniagassatut takorluukkat Pingaarnersiuinerillu” suliarileruttorlugit, tassanilu ineriartornissamut Naalakkersuisut kissaataat ersersinneqassapput. Pingaarnersiukkat uninngaannannginnissaat innuttaasullu kissaataannik ersersitsiuarnissaat tassunga atatillugu pingaaruteqarpoq. Taamaammat innuttaasut suliniaqatigiiffii kattuffiillu attuumassuteqartut ilanngunneqarnissaat Naalakkersuisut annertunerusumik sulissutigissavaat.

Inatsisissatut siunnersuutit inaarutaasumik akuersissutigineqarnissaminnut Folketingimi suliarineqassapput, suliarineqarnissaasalu ukiup nutaap aallartinnerani pinissaat naatsorsuutigineqarpoq.

Paasisaqarnerorusukkuit naalakkersuisup allattaa Zakaria Saleh ugguuna e-mailikkut: zasa@nanoq.gl-ikkut attavigiuk.