Avatangiisinut Aningaasaateqarfimmut qinnuteqarnissat ammaanneqarput

Isumassarsiatsialammik, avatangiisinut iluaqutaasumik aammalu Kalaallit Nunaanni mingutsitsinermik annikillisaataasinnaasumik peqarpit? Naalakkersuisut 2022-mut Avatangiisinut Aningaasaateqarfimmut qinnuteqarnissamut ammaassipput.

Avatangiisinut Aningaasaateqarfiup suliassanut, suliniutinik piujuartitsiviusussanik nutaanik misileraanermut sulianut pingaarutilinnut aningaasanik agguaassisarnermigut nuna tamakkerlugu avatangiisini pissutsinut pitsanngorsaataasussanut tapersiisarpoq.

 

2022-mi sunut tapiissuteqartoqarnissaanik qinnuteqartoqarsinnaava?

Ukiut tamaasa avatangiisini suliassanut, suliassaqarfiit aalajangersimasut iluanni mingutsitsinngitsunut allannguiffiusussanut aningaasanik immikkoortitsisoqartarpoq.  

 

2022-mi suliassanut, immikkoortut tallimaasut uku iluanni ingerlanneqartussanut aningaasanik qinnuteqartoqarsinnaavoq:

 

  • Anartarfilerinermi imermullu errortuutikumut aaqqiissutissanut misiligutitut suliat. Suliassanut taakkununnga katillugit 2 mio. koruunit immikkoortinneqarput.
  • Aalisarnermi atortunik annaasanik piniariartarfinnillu saliineq. Suliassanut taakkununnga katillugit 2 mio. koruunit immikkoortinneqarput.
  • Suliassat eqqakkanik immikkoortiterinermut, atueqqinnermut issunngortitsinermulluunniit siuarsaataasussat, kiisalu suliassat plastikkit sequnnerinik aniatitsinermik annikillititsisussat. Suliassanut taakkununnga katillugit 1,7 mio. koruunit immikkoortinneqarput.
  • Eqqagassalerinermik piorsaanermut tunngatillugu kommunini suliat. Suliassanut taakkununnga katillugit 2 mio. koruunit immikkoortinneqarput.
  • Suliat, innuttaasut suliffeqarfiilluunniit avatangiisinik eqqumaffiginninnerulernerinik kinguneqartussat. Suliassanut taakkununnga katillugit 500.000 koruunit immikkoortinneqarput.

 

Suliassanut 10.000 koruunit sinnerlugit nalilinnut tapiiffigineqarnissamik qinnuteqartoqarpat, qinnuteqartup 25%-inik aningaasaleeqataanissaa piumasarineqarpoq. Suliassanut 10.000 koruuninik inorlugilluunniit nalilinnut aningaasaleeqataanissamut piumasaqaat atuutsinneqanngilaq.

 

Ilaatigut kommunit, inuussutissarsiutinik ingerlataqartut, atuaqatigiit, inuit namminneq aamma NGO-t aningaasanik qinnuteqarsinnaapput.

 

Qinnuteqarnissaq 1. februaari 2020 nal. 16.00-imut killeqartinneqarpoq.

 

Avatangiisinut Aningaasaateqarfik pillugu uani atuagaqarit, tassanilu qinnuteqarnissamut immersugassaq nassaaralugu: www.naalakkersuisut.gl/miljoefonden

 

Attaveqarfissaq

Sukumiisumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik attaveqarfigineqassaaq, e-mail: pan@nanoq.gl.