2022-mi Namminersorlutik Oqartussat inissiaataanni ineqarnermut akiliutinut qaffaatissat tunuartinneqarput

27. septembarimi nalunaarutigineqarpoq, Namminersorlutik Oqartussat najugaqarfiutaanni arfineq marluusuni ineqarnermut akiliutit iluarsiiffigineqassasut. Iluarsiinissaq katillugit 4,9 mio. koruuninik isertitaqarnerunissamik pisariaqartitsilernerup kinguneraa, taakkulu pingaartumik iluarsaassassanut nukingiuttarialinnut aningaasartuutinut matussutissaapput. Tamatuma pisariaqalerneranut ukiuni arlalinni aserfallatsaaliuinissamut aningaasassaaleqisimaneq peqqutaavoq.

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen tamatumunnga atatillugu oqarpoq: “Najugaqarfiit missingersuutaat oqimaaqatigiissasut, taamaalillunilu aningaasartuutit isertitallu assigiissasut inatsisini ersarissorujussuarmik allassimavoq.”

Ineqarnermut akiliutit iluarsiissutaasa nammaqatigiiffiunerusumik iluarsineqarnissaat politikkikkut kissaatigineqarpoq. Tamatuma anguneqarnissaanut atatillugu aningaasartuutissat Nunap Karsianit akilerneqassasut 2022-mut aningaasanut inatsit pillugu isumaqatigiissummi isumaqatigiissutigineqarpoq. 2022-mut Aningaasanut Inatsimmi aningaasaliissutissat 4,9 mio. koruuniusut immikkoortinneqassapput, taamaalillunilu aningaasaliinissamut tunngavissat pisariaqartut qulakkeerneqassallutik.

Tamatumarpiaap kingunerisaanik attartortunut eqqugaasussanut ineqarnermut akiliutinut iluarsiissutissatut nalunaarutigineqartut tunuartinneqarput. Attartortut tamanna pillugu nalunaarummik INI A/S-imit pissarsissapput.

Naalakkersuisoq Mariane Paviasen tamatumunnga atatillugu oqarpoq:
”Ukiuni tulliuttuni naalakkersuinikkut akisussaasuusutut siunissami ineqarnermut akiliutinut qaffaatissat nammaqatigiiffiunerunissaannik, taamaalillunilu aningaasartuutissat inissianut aserfallannerusimasuinnarnut tunnginnissaannik siunnersuusiussaanga.

Suliassap taassuma suliarinissaanut qilanaarpunga.

Tamatuma saniatigut 2022-mi Aningaasanut Inatsimmi aserfallatsaaliunngitsuukkat akuersaarneqarsinnaanngitsut, nunatsinni attartortorpassuit ulluinnarni inuunerinut sunniuteqartut aallunneqarnerulernissaat siunnerfigineqarmat nuannaarutigisorujussuuara iluarisimaartorujussuullugulu. Suliat aallartereersut siunissami aserfallatsaaliuinerup ingerlaannarnissaanut qulakkeereqataassapput.

Maannarpiaq aserfallatsaaliunngitsuukkat angumeriniarlugit suliniuteqavinnissaq,
taamaalillunilu Namminersorlutik Oqartussat inissiaataannik attartortut pitsaasunik
peqqinnartunillu ineqarnissaasa anguniarneqarnissaa najugaqartunut
pingaaruteqarluinnarpoq.”

Suliamut tassunga ilagitillugu politikkikkut partiit kommunalbestyrelsillu ineqarnikkut
isumaqatigiissuteqarnermik inerneqartussamik oqalliseqatigineqassapput. Ineqarnermi
nutarterinissaq siunissamullu qulakkeerinissaq siunertarineqassaaq.
Isumaqatiginninniarnerit 2022-mi upernaakkut aallartinneqassapput.

Annertunerusumik paasisaqarusunnermi Ineqarnermut Attaveqaasersuutinullu
Naalakkersuisoqarfik attaveqarfigineqassaaq, uunga box909@nanoq.gl