Naalakkersuisut Danmarkimit suliassaqarfimmik tigusipput

(Paasissutissat kingulliit 29. 11. 2021 kl. 14.50)

Naalakkersuisut tamarmiullutik novembarip 19-ni isumaqatigiissutigivaat oqartussaavik tiguniarlugu.

Inuussutissarsiornermut Niuernermullu Naalakkersuisoq, Pele Broberg, maannakkut nunatsinnut oqartussaavimmik akisussaaffeqalernissaq suliarissavaa. Namminersornermut Inatsit aallaavigalugu (Allattuiffik II, immikkoortoq 14) Ingerlatseqatigiiffinnut-, Naatsorsuuserisarnermut- Kukkunersiuisarnermullu tunngasut suliassaqarfimmik Danmarkimit nunatsinnut oqartussaavigilernissaa isumaqatiginniarnerit aallartissavai, Naalakkersuisut Siulittaasuata Statsministerimut Mette Frederiksenimut ilisimatitsissutigisivaa. Tassunga atatillugu Inuussutissarsiornermut Niuernermullu Naalakkersuisoq inatsimmik tassunga attuumassutilimmik suliaqarnissamik suliassaqarfiullu tigunissaanut ulluliussassamik suliaqassaaq.

Suliassaqarfimmik kingullermik tigusaqarneq ukioq 2010 pivoq. Suliassaqarfiit tiguneqartut tassaallutik Aatsitassaqarnermut aammalu imartani Sulinermi avatangiisinut suliassaqarfik. Tassa ukiuni qulikkaani Naalakkersuisut suliassaqarfimmik siullermeerlutik tigusaqarput.

Suliassaqarfiup tiguneratigut inatsimmik Kalaallit Nunaannut naleqqussakkamik Naalakkersuisut suliaqarsinnaalissapput.

Suliassaqarfiup tiguneratigut suliassaqarfiup digitaliserernissaanut suliaqartoqassaaq. Digitaliseriinikkut Kalaallit Nunaanni ingerlatsinermi suliffeqarfiit inuussutissarsiornikkullu pitsaanerusumik ataatsimut isiginnissinnaalernissaq iluaquserneqassapput.

Suliassaqarfimmik tigusinissamut ikaarsaariarnissaq sivisussaaq, tassani partiinik allanik isumaqatigiinniarnissat Inatsisartunillu akuutitsinissaq qitiutinneqassallutik. Suliassaqarfiup tigunissaani suliassap ingerlanneqarnerani ataatsimiititaliat suliassaqarfimmut attuumassutillit Kalaallit Nunaannilu inuussutissarsiortut ammasumik oqaloqatigineqassapput.

Inuussutissarsiornermut Niuernermullu Naalakkersuisoq suliassaqarfimmik tigusinissaq pillugu suliaqarnissamut qilanaarpoq.

Tusagassiutinut nalunaarut pillugu attavigineqarsinnaavoq Juno Berthelsen, Inuussutissarsiornermut Niuernermullu Naalakkersuisumut allatsi: jube@nanoq.gl imaluunnut Inuussutissarsiornermut Niuernermullu Naalakkersuisoqarfiup pisortatigoortumik mailianut: isiin@nanoq.gl.