Puigortunngortut pillugit Ilulissani ataatsimeersuarput

Puigortunngortut pillugit ataatsimersuarnerup ullua siulleq isumannanngitsumik, qanermut assiaquteqarluni assaallu spritertarlugit ingerlanneqarpoq.

Nunatsinni tunillaassuuttoqalernerunera paatsisaalluni qanermut assiaqutaqartoqarmat, imminut qanillinaveersaartoqarmat assaallu spritsikulaneqarmata puigortunngortut pillugit ataatsimeersuarneq allaanerulaartunik avatangiiseqarluni aallartippoq.

 

Taamaakkaluartoq ullormi siullermi puigortunngornermi pissutsit atugarineqartut assigiinngitsut, eqqaamasat itisuumiittut atorlugit suliaqartarneq, tassa eqqaamasat atorlugit utoqqarni puiguttunngortunilu kinaassutsimik imminullu naleqartinnermik misiginermik eqqaasitsineq sakkortusisitsinerluunniit, ukkatarineqarput. Ullup naalernerani sunnerneqartarneq qanigisanillu qanimut suleqateqarneq sammineqassaaq.

 

Isumaginninnermut Sulisoqarnermullu Naalakkersuisoq Mimi Karlsen tikilluaqqusinermini imatut oqarpoq:
”Peqataanissassinnik tikilluaqquassi sulilluarnissassinnillu kissaallusi. Kissaatiginerpaavara suliaqarfiit assigiinngitsut akornganni sulineq tapersersorneqarumaartoq nukittorsarneqarlunilu. Puigortunngortunik toqqissisimasunngortitsissagutta tamanna pisariaqarpoq”.

 


 

 

 

 

Attavissaq
Paasisaqarnerujumallutit attavigiuk Naalakkersuisup allattaa Naja Lynge Petersen e-mailikkut:
nlyp@nanoq.gl oqarasuaatikkulluunnit +299 34 56 11.