Meeqqanut Coronap nalaani tusarnaartitsineq – Facebookkikkut toqqaannartumik aallakaatinneqartumik

Sisamanngorneq 25. november 2021 nalunaaqutaq 13:00 illit meeqqavillu meeqqat erinarsuutaat nuannernerpaat tusarnaarsinnaavani aliikkusersorneqarlusilu. Corona-virus pillugu apeqquterpassuit tusarnaartitsinermi sammineqassapput.

Susinnaavunga? Sooq allat taamaaliorsinnaappat? Taavami sussaanga? Uannut corona-virus qanoq navianartigiva? Oqaluttuarineqartartut tamarmik ilumoorpat? Apeqqutit tamakku meeqqat ilinnut apeqqutigereersimassajunnarsivaat. Massakkummi coronamik tunillaassuinerup annertusiartuinnarnera tusagassiutini sammineqartorujussuuvoq apeqquterpassuarnillu pilersitsilluni – ingammik meeqqatsinnut.

Apeqquterpassuit taakku akineqarnissaannut Frederiup Hinnariullu meeqqatit ikiussavaat. Taakku Facebookkikkut toqqaannartumik tusarnaartitsissapput, corona-virusillu nalaani qanoq immitsinnut pitsaanerpaamik paarisinnaanersugut ukkatarissallugu.

Tusarnaartitsinerup nalaani corona-virus pillugu meeqqat apeqquteqartarsinnaapput, peqqissutsimullu paasisimasaqarluartumit apeqqutit akineqartassapput.

Erinarsuutinik, illit meeqqavillu erinarsoqataaffigisinnaasaannik, aliikkusersorneqassaasi.

Hinnariuup Facebookkikkut quppersagaani tusarnaartitsineq nalunaaqutaq 13:00 takusinnaavarsi, tassani toqqaannartumik tusarnaartitsineq aallakaatinneqassaaq. Tusarnaartitsineq tusarnaartitsinerni marluusussani siulliussaaq, tassanilu meeqqanit apeqqarissunit apeqquterpassuit akissuteqarfigineqassapput, meeqqanullu inersimasunullumi toqqissisimanermik pilersitsissalluni. Meeqqatit nuannersumik illartinneqartassapput nipilersuutinillu nuannersorsuarnik tusarnaartinneqassallutik.

Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut +299 25 78 54-ikkut attavigiuk.