Upernavimmi tuniluuttoqangaatsiarpoq

Tamakkiisumillu akiuussusersimasut amerlammata tamanna iluaqutaavoq

Ulluni kingullerni sisamani illoqarfimmi nunaqarfinnilu qulingiluani coronamik tunillatsissimasut paasineqarput. Taamaalilluni Upernavimmi eqqaanilu tunillatsissimasut 118-inngorput. Taakku illoqarfimmi eqqaanilu innuttaasut 5 procentingajannik amerlassuseqarput.

"Upernavimmi inuit amerlasuut annilaanganerat paasisinnaalluarpara. Eqqaamassavarpulli Upernavimmi tamakkiisumik akiuussuserneqarsimasut amerlammata, taamaattumillu illoqarfik pisumut piareersimalluarpoq, Peqqinnissaqarfillu innuttaasut ajornartoorfimmiit aniguilluarnissaat anguniarlugu sapinngisartik tamaat ikiuutissaaq" taama oqarpoq Peqqinnissamut Naalakkersuisoq Kirsten Fencker.

Upernavimmi tuniluunneq ima annertutigaaq innuttaasut tamarmik imminnut tunillatsissimasumut qanillisimasutut isigineqarsinnaallutik. Taamaattumik Upernavimmi nunaqarfiinilu Naalakkersuisut Nunatta Nakorsaaneqarfia isumasioqatigereerlugu periusissiamik nutaamik atuilerniarlutik aalajangerput. Tunillatsissimasumut qanillisimagaanni imalunniit tunillatsissimagaanni akiuussutissamik kapitinnissaq Peqqinnissaqarfinni akisussaasunit innersuussutigineqanngilaq, taamaattumillu maannakkorpiaq Upernavimmi akiuussusersuinissaq periarfissaanngilaq, soorluttaaq tuniluunneq annertuallaarnera pissutigalugu innuttaasut misissorneqarsinnaanngillat.

Peqqinnissaqarfimmi sulisut, nukiit misissuinermut atornagit, napparsimasunut aamma tunillatsissimallutik napparsimasunut nukiit suli annerungaartumik isumagissavai.

"Piffissaq sivikitsoq Upernavimmi nukiit allatut iliulaarluta pissutsinut naleqqussarluta atussavarput. Tunillatsissimasut amerlasuut ilisimavagut, taamaattumillu tunillatsissimasinnaasut amerlasuut misissornissaannut taarsiullugu, nukivut napparsimaruluttoqalernissaanut pinaveersaartitsinissamut atussavavut," Kirsten Fencker oqarpoq.

Corona pillugu Allattoqarfiup Peqqinnissaqarfiullu suleqatigiillutik nunaqarfinni tamani pissutsinik alapernaarsuisussanik attaveqatigiinnik pilersitsipput, inuttaasullu napparsimasut eqqortumik katsorsarneqarnissaat qulakkiissavaat. Tamatuma saniatigut Peqqinnissaqarfik Upernavimmi peqqinnissakkut sullisineq qanoq pitsaanerpaamik iliuuseqarfigisinnaanerlugu misissorpaat.

Corona pillugu Allattoqarfik Avannaata Kommunia peqatigalugu nammineq kajumissutsimik sulisinnaanermik periarfissat pillugit oqaloqatigiipput. Tassani pineqarput:

  • Upernavimmi nunaqarfiinilu katersuunnissamut killilersuinerit
  • Ulluunerani paaqqinnittarfiit matugallarneqarneri
  • Atuarfinni tunillaassuinissamik pinaveersaartitsiniarluni suliniuteqarnerit

Corona pillugu suleqatigiit ullumi ataatsimiipput, Naalakkersuisunullu innersuussuteqarput, Upernavimmi Upernaviullu nunaqarfiini tamani oqartussaasunik timmissartuussinermik atuutsitsisoqalissasoq (ilaasussat tamarmik oqartussaasunit akuerineqaqqaarlutik), taamaalilluni illoqarfimmi eqqaanilu imaluunniit nunap sinneranut tuniluunneq siaruarnissaa pinaveersaartinneqarluni.

"Misilittakkatta takutippaa nunaqarfinni illoqarfinnilu minnerni tuniluunneq sukkanerusumik unittartoq. Upernavimmi innuttaasut errortorluartarnissamut, qanillinaveersaarnissamut katersuuttunullu ornigunnaveersaarnissamut innersuussutit malikkunikkit, juullilernerani angallanneq eqqugaavallaarnavianngilaq", taama oqarpoq Kirsten Fencker.