Puigortunngorneq pillugu nunami namminermi ataatsimeersuarneq 2021

Ulluni 23.-24. novembarimi Puigortunngorneq pillugu nunami namminermi ataatsimeersuarneq 2021-mut Ilulissani pissaaq

Kalaallit Nunaanni nunarsuullu sinnerani puigortunngornermik nappaateqarnerit amerliartorput. Innuttaasut ukioqqortusiartorneri malillugit puigortunngorluni nappaateqartut amerlanerit aamma takussaalerput. Tamanna kommuninit, peqqinnissaqarfimmit ilaqutaasunillu suliassaqarfimmik annermik sianiginneqqusilerpoq, taamaalillutik inuit puigortunngortut sapinngisamik pitsaanerpaamik isumassorneqarlutillu katsorsarneqarsinnaassammata.

 

Puigortunngornermik sammisaqartitsinissaq pillugu ilisimatusarnikkut ineriartortitsinermillu suliniut Issittumi Utoqqalineq Isumaginninnermut Naalakkersuisoqarfimmik, aamma Peqqinnissamut Naalakkersuisoqarfimmik suleqateqalersimavoq. Ilulissani ulluni 23.-24. novembarimi nunamit tamarmit pisortani oqartussaasoqarfinnit, sullissisarfinnit inunnillu sullissisunit sinniisut 30-t missaat peqataassasut naatsorsuutigineqarpoq. Ataatsimeersuarnermut siunertaq tassaavoq coronamik sianiginnittumik avatangiisut atorlugit misilittakkanik paarlaasseqatigiinnissaq, aamma puigortunngornermik suliassaqarfiup iluani iliuuserisanik periutsinillu oqaluuserisaqarnissaq.

 

”Ataatsimeersuarnermut matumunnga neriuutiga tassaavoq puigortunngornermik eqqugaasunik, taakkulu ilaqutaannik suliaqarnerminni inuit sullissisut suliassanut ajugaaffiginiakkanut tamakkununnga piginnaanerulersutut misigisimalernissaat,” Isumaginninnermut Sulisoqarnermullu Naalakkersuisoq Mimi Karlsen oqarpoq.

 

Ataatsimeersuarneq ulluni marlunni ingerlanneqassaaq. Ulloq 23. novembarimi puigortunngornermik suliassaqarfimmik ilisimatusarnermik paasisaqartitsisunik tunngavissiissutinik assigiinngitsunik saqqummiussinernik ulloq ataatsimeersuarfik pisoqarfiussaaq, aqaguani piviusutigut inunnik puigortunngortunik isumaginnillunilu suliaqartitsinermik immikkut sammisaqarfigisatut ulloq ilinniarfiussalluni.

 

”Kalaallit Nunaanni puigortunngornermik nappaatip atugaanera annertusiartormat taamatut ataatsimeersuarneq pingaarluinnartuuvoq. Nunamit tamarmit inunnit sullissisunit assut soqutiginnittoqarnera nuannaarutigaara,” Peqqinnissamut Naalakkersuisoq Kirsten Fencker oqarpoq.

 

Ilinniartitsisut oqalugiartussallu Kalaallit Nunaannit aamma Danmarkimit aggertuupput. Maani sammisat, soorlu misileraanerit nappaammillu suussusernerit, puigortunngornerit suussusaat assigiinngitsut, misigissutsit atorlugit eqqaamasat puigornaveersaartinnerinik sulinerit, nipilersuutinik peqqissartitsinerit, aamma Kalaallit Nunaanni puigornermik nappaatilinnik suliaqarnermik aaqqissuussillunilu ataqatigiissaarinerit qulaajaavigissavaat.

 

Attaveqarfissaq

Erseqqinnerusumik paasissutissarsioruit naalakkersuisup allattaa Naja Lynge Petersen attavigiuk, e-mailikkut: nlyp@nanoq.gl imaluunniit oq. + 299 34 56 11