Naalakkersuisut: Qimagaasut misiginneqatigaagut

Arfininngornermi ualikkut paasitinneqarpugut covid 19-qarluni toqusoq siulleq nalaanneqarsimasoq, pisorlu alianaqisoq assut attorteqqassutigaara. Qimagaasut eqqarsaatinniitsippakka misiginneqatigalugillu”, Naalakkersuisut siulittaasuat Múte Bourup Egede oqarpoq.

Peqqinnissamut Naalakkersuisoq, Kirsten L. Fencker aamma pisumut assut attorteqqavoq.

Ilaqutaasut qimagaasullu misiginneqatigingaarpakka”.

Inuiaqatigiinni tuniluunneq sukkasoorujussuarmik ingerlavoq, taamaattumillu ataatsimoorluta covid 19 akiorniartariaqarparput. Nappaatip tuniluunnera minnerpaaffianiitsinniarlugu malittarisassat innersuussutigineqartut malittariaqarpagut. Aamma suli akiuussuserneqarsimanngitsut kaammattorusuppakka akiuussuserteqqullugit; imminuinnaq pinnata kisiannili inuiaqatigiinni sanngiinnerusortagut aamma pillugit”.

Nuummi sineriammilu peqqinnissaqarfimmi sulisut tuniluunnermik paasiniaanermik, misissuinermik kiisalu akiuussusersuinermik ulapputeqaleruttorput.

Misissuinermi suliniutigut annertusassavagut akiuussusertinnissamullu periarfissat aamma annertusassallugit. Pisoq qanimut malinnaaffigaarput qisuariarnissatsinnullu piareersimalluta", Kirsten L. Fencker oqarpoq.