Naalakkersuisut Siulittaasuata inatsisit nutaat arfineq-marluk atsiorpai


Tallimanngornermi novembarip 19-ni Naalakkersuisut Siulittaasuata Múte B. Egedep Inatsisartut ukiaanerani ataatsimiinnerminni inatsisissatut akuersissutigisimasaat nutaat arfineq-marluusut atsiorpai.

Inatsisissatut allannguutit nutaat taakku ilaatigut innarluutillit ikiorneqartarnissaannut, meeqqat atuarfiinut, soraarnerussutisianut, siusinaartumillu soraarnerussutisiaqalersarnermut tunngasuupput.

”Nuannaarutigaara naalakkersuisooqatigiinnissamik isumaqatigiissummi upernaaq atsiorsimasatsinni anguniakkatta ilaat piviusunngorsinnaalereermata. Utoqqartatta utoqqalinerminni toqqissisimaneq misigisussaavaat, taamaattumillu ukiut soraarninngorfissat sioqqullugit utoqqaat soraarninngorsinnaanerat inatsisip nutaap periarfissaalersissavaa”, Múte B. Egede oqarpoq.

Maanna 67-inik ukiullit soraarninngorsinnaalersarput, inatsisillu nutaap sivikinnerpaanik ukiuni 35-ni timikkut tarnikkullu assoroornartumik sulisimasut sulilu sulisartuusut 65-inik ukioqarlutik soraarninngorsinnaanissaannik periarfissippai.
Naalakkersuisut Siulittaasuata inatsisissat akuerereerunigit saqqummiunneqassapput, innuttaasunut allanullu atuutinneqalerniassammata.

Inatsisinik taakkuninnga arfineq-marlunnik aalajangersaanernut Naalakkersuisut Siulittaasuata, Múte B. Egedep, atsiugai ukunani atuarneqarsinnaapput:

Saqqummiussat

Inatsisit