Kattulluta inuunerinneq ilusilersorparput



Siunissaq peqqinneruffiullunilu atugarissaarfiusoq, minnerunngitsumik meeqqat inuusuttullu peroriartortut eqqarsaatigalugit. Tassa KNI/Pilersuisoq, Pisiffik, Brugseni Paarisalu akornganni suleqatigiinnermi anguniagaq. Ilisarnaat ataatsimoorussaq ima allannilik: ’Kattulluta inuuneritta' atorlugu suleqatigiittussat inuunerinnerup peqqinnarnerusunillu toqqaanerup ajornannginnerulersinneratigut pissusissamisoortunngortinneratigullu tamanna anguniassavaat.

Nalunaaqutaq sisamanut sunik unnukkorsiutiliussanerluni nalullugu pisiniarnermi peqqinnartunik toqqaanissaq ajornannginnerulissaaq. Koorimik qorsummik uummataasartalimmik ilisarnaat pisiassallu pilerinartut maliinnartassavatit. Kattulluta inuunerinneq ilusilersussavarput, tamattalu iliuuseqarnissamut periarfissaqarpugut.

KNI/Pilersuisoq, Pisiffik, Brugseni Paarisallu akornganni suleqatigiinneq 2020-mi maj-imi suliffeqarfiit ataasiakkaat Paarisallu akornganni isumaqatigiissutigineqartoq 2030-p tungaanut atuuttussaavoq.

Taakku sisamat suleqatigineqartut ataatsimoorluni suleqatigiinnermut ilanngutissapput. Immikkoorluni anguneqarsinnaasunit ataatsimoorlutik angusaqarnerujussuusinnaagamik taama suleqatigiinniarlutik aalajangerput. Ajornartorsiutit aaqqikkuminaatsut, assersuutigalugu inuiaqatigiinnik peqqinnerulersitsiniarneq, ataasiinnarmit aaqqinneqarsinnaanatik akimut suleqatigiittunit amerlasuunit taamaallaat aaqqinneqarsinnaanerat aallaavigalugu suleqatigiittoqassaaq.
Niuertarfiit ulluinnarni unammilleqatigiittaraluartut suleqatigiinnermi inuunerinnerup siammarsarnissaanik ataatsimoorluni suleqatigiinnissaq siunissamillu peqqiffiunerusumik atugarissaarfiunerusumillu anguniagaqarnissaq isumaqatigiissutigineqarpoq.

Suleqatigiinneq ataatsimoorussamik nutaamik ilisarnaateqalissaaq, assitarissavaa pisiniarnermi koori peqqinnartunik imalik imalu allannilik: Kattulluta inuuneritta / Sammen om det gode liv.
Suleqatigiit taakku sisamat sinerissami tamaniipput, innuttaasut tamaasa taamaalillutik peqqinnartumik inooriaaseqarnermik pitsaalluinnartumillu inuuneqarnermik siuarsaasunik suliniutinik, neqeroorutinik, isumassarsiorfissanik siunnersuutinillu anngussivigineqarsinnaassapput.

Suleqatigiinnermi periarfissat ukkatarineqarlutillu apeqqutit uku aallaavigalugit sulisoqarpoq: Qanoq pisoqarnissaanik kissaateqarpugut? Suut aallartisarsinnaavagut? Suna aallartisassallugu pissusissamisuussava?


Tamatuma saniatigut aalajangersimasunik uuttorneqarsinnaasunillu anguniagaqartoqarnissaa assut pingaartinneqarpoq, aamma suliniutit aallartisarneqartut uuttorneqarsinnaasariaqarput.

2022-mi suleqatigiit isumaqatigiipput anguniagaq aalajangersimaqqissaartoq uuttorneqarsinnaasorlu ukkatarineqassasoq, tassa naatitat qerisut atorneqarnerunissaat sulissutigineqassasoq. Sulissutigineqarpoq inuunerinneq siammarsarumallugu anguniakkat annertusiartortassasut. Suliniutit aallartisarneqartut sunniutaat uppernarsarumallugu suleqatigiit ataatsimoorussamik ukiumut nalunaarusiortarnermikkut suleqatigiinnermi anguneqarsimasut saqqummersittassavaat.

Suleqatigiit ataatsimut isigalugu uku pillugit suleqatigiipput:
  • Peqqinnartunik pitsaasunillu ileqqoqalernissaq pillugu ilisimasanik isumassarsiorfissanillu siammarterineq
  • Peqqinnartunik toqqaanissap ajornannginnerutilernissaa pissusissamisoortunngortinnissaalu, aamma nerisaqarnermut innersuussutinik maleruaasut amerlisinnissaat
  • Peqqinnartunik nerisartagaqarnermik naleqquttumillu imigassartoriaaseqarnermik siammarsaaneq
FN-ip nunarsuarmi anguniagaa 3 peqqissuseq atugarissaarnerlu aamma nunarsuarmi anguniagaa 17 suleqatigiinnikkut anguniagaqarneq tunngavigalugit suleqatigiittoqarpoq. Inuuneritta III – Meeqqat inuunerinnissaat pillugu suleqatigiinnissamut Naalakkersuisut periusissiaat suliffeqarfiillu CSR pillugu suliaqarnerat suleqatigiinnermi taperserneqarput.

Paasisaqarnerujumallutit attavigikkit:

Paarisa: Immikkoortortaqarfimmi pisortaagallartoq Tina Evaldsen oqarasuaatikkut 34 23 94 mailikkulluunniit: tiev@nanoq.gl

Brugseni: Sulisoqarnermut, Attaveqaqatigiinnermut Nittarsaassinermullu pisortaq Benny Reffeldt Otte oqarasuaatikkut +299 52 63 39 mailikkulluunniit: benny.otte@knbmarketing.gl

KNI/Pilersuisoq: Nittarsaassinermut pisortaq Anders Steenbakken oqarasuaatikkut +299 55 15 77 mailikkulluunniit: atb@kni.gl

Pisiffik: Nittarsaassinermut pisortaq Tina Hansen oqarasuaatikkut +299 29 66 30 mailikkulluunniit: tih@pisiffik.gl