Nunatsinniit umiarsuit silaannarmik mingutsitsineri killilersorniarneqarput

Nunarput MARPOL-imut isumaqatigiissummut Ilanngussaq VI-mut ilaalernermigut umiarsuarniit ikummarsaatinik akuutissanillu avatangiisinut ajoqusiisartunik allanik aniatitsinermik killilersueqataavoq.

Nunarput MARPOL-imut isumaqatigiissummut – FN-imi Imarsiornermut Suliniaqatigiiffiup IMO-p ataani nunani tamalaani isumaqatigiissummut, umiarsuarniit mingutsitsinermik pinaveersaartitsinissamik annikillisaanissamillu siunertaqartumut 1997-imi ilaalerpoq. Kalaallit Nunaat isumaqatigiissummi Ilanngussaq VI-mi, umiarsuarniit silaannarmik mingutsitsinermut tunngasumi maannamut tunuarsimaarfigineqarsimavoq. Ilanngussamut ilaalernermi ilaatigut umiarsuit ikummatissamik akoqassusianut killeqartitsinissaq taperserneqarpoq.

Umiarsuit silaannarmik mingutsitsisarnerat avatangiisitsinnut peqqissutsitsinnullu ajoqutaavoq. Ikummarsaammik silaannarmut aniatitsisarneq uummatikkut ajornartorsiortitsilersinnaavoq puallutsitsilersinnaallunilu, kiisalu naasunut uumasunullu ajoqutaasumik sialuk seernarsisinnaavoq.
- Avatangiisitta peqqissutsittalu illersornissaat Naalakkersuisunut pingaaruteqarpoq. Taamaattumik MARPOL-imut isumaqatigiissummi Ilanngussaq VI-mut, umiarsuarniit silaannarmik mingutsitsinermik killilersuiffiusumut ilaalernissaq Inatsisartuni ilaasortat akornanni tapersersorneqarmat nuannaarnarpoq. Taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Kalaallit umiarsuaataasa angisuut amerlanersaanni Ilanngussaq VI-mi piumasaqaatit annertuumik malinneqareerput. Maannarpiaq nunarsuarmi umiarsuit niuffagiutit 95%-iisa MARPOL-imut isumaqatigiissummi Ilanngussaq VI-mi maleruagassat malippaat. Tassalu umiarsuarnit silaannarmik mingutsitsinerup killilersorneqarnissaanut maleruagassat, nunanut tamalaanut atuuttut tapersersorluarneqareerput.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaq Mette Skarregaard Pedersen tlf.: 346476/529844-mut imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.