Meeqqat aarlerinartorsiortut isumagineqarnissaannut isumassuisut maanna pitsaanerusumik isumassuisinnaanngorput

Isumassuisunit pitsaanerusumik isumaginnissinnaasunik qanittukkut meeqqat inuusuttullu naapitsisinnaalissapput. Tamanna meeqqanut- inuusuttunullu suliassaqarfimmut patajaallisaataasussanik pikkorissaanikkut ilinniartitsinikkullu pissaaq – ingammik meeqqat inuusuttullu aarlerinartorsiortut pillugit. Meeqqat, naak sakkortuumik inuunerminnik aallartitsisimagaluarlutik, pitsaasumik siunissaqarnissaat pikkorissaanerit ilinniartitsinerillu qulakkeerinneqataaffigissavaat. Meeqqanut inuusuttunullu aarlerinartorsiortunut suliniutit patajaallisaavigineqarnissaannut Kalaallit- qallunaallu oqartussaasoqarfiisa assigiinngitsunik suliallit akornanni suleqatigiinnermi tamakku tamarmik ilaapput.

Meeqqat inuusuttullu ajornartorsiornerpaasut pitsaanerusumik massakkut ikiorneqassapput.  Taamaammat isumassuisui paaqqutarinnilluartussaapput taakkununngalu pitsaanerusumik  isumassuisussaallutik.  Tassami meeraq aarlerinartorsiortoq ullut tamaasa inersimasumik, naak angajoqqaarinngisaraluaminnik attaveqarnerusarpoq.  Inunnut meeqqanik inuusuttunillu aarlerinartorsiortunik sullissisunut Isumaginninnermut Aqutsisoqarfik maanna pikkorissaanernik neqerooruteqarpoq.  Meeqqat inuusuttullu ajornartorsiornerpaat isumassorneqarnissaannut piginnaasaasa patajaallisaavigineqarnissaat pillugit neqeroorut sulianik ilinniagaqarsimanngitsunut atuutissaaq.

Inunnik pikkorissunik meeqqat inuusuttullu avatangiiseqartinneqarnissaat Meeqqanut, Inuusuttunut Ilaqutariinnullu Naalakkersuisumut Paneeraq Olsenimut pingaaruteqarpoq.  Paneeraq oqarpoq:

- Meeqqat inuusuttullu inuunermik aallartinnerani sakkortuunik atugassaqartinneqarsimasut sumiginnarneqarsimasullu pineqartillugit, isumassuisut nutaat meeqqat inuunerannut pingaarutilittut ilaapput.  Taamaammat suliassaminnut ilisimasaasa qaffassaavigineqarnerisigut piareersarluarneqassapput, taamaalillutik meeqqat inuusuttullu aarlerinartorsiortut pitsaanerusumik ikiornissaannut sakkussaminnik tunineqassallutik.

Perorsaanermik ilinniarfik (PI/SPS) suleqatigalugu pikkorissaanerit neqeroorutigineqassapput.

Pikkorissaanerit akeqassanngillat 

Isumaginninnermi meeqqanut inuusuttunullu suliassaqarfimmi sulisunut pikkorissaanerit akeqanngillat.  Qanoq ilillutik meeqqat inuusullu aarlerinartorsiortut isumagissanerlugit ilisimasanik ilinniakkanillu peqataasut pikkorissaanerni tunineqassapput.

Peqataasut misilittagaat aamma ilinniagaqarsinnaanermut periarfissanut tulluarsarneqassapput.  Tamanna assersuutigalugu meeqqanut inuusuttunullu ulloq unnuarlu paaqqinnittarfinni, ilaqutariinnut sullissivinni, qimarnguinni aamma inunnut innarluutilinnut sullissivinni sulinissamut pitsaanerusumik tunngaviliissaaq.

Pikkorissarneqarnerni angusimasanik nuussissinnaanermut pikkorissarnerit periarfissiisinnaaratarsinnaaneri,  pikkorissaanernut pitsaaqutit ilagaattaaq.  Assersuutigalugu peqataasoq tamatuma kingorna isumaginninnermi ikiortitut ilinniagaqalerpat, taava ilinniarneq sivikillineqarsinnaassagunarpoq.  Taamaalilluni sukkanerusumik ilinniakkamik naammassinnittoqarsinnaavoq aamma suliffimmi nutaami suliffigeriikkamiluunniit aallartittoqarsinnaanngorluni – taamaalineranili pitsaanerusunik piginnaasaqarluni.

Pikkorissaanerit siullit 2021-mi ukiuunerani ingerlanneqassapput aamma Piginnaasaqarfigineqartut pillugit naliliinermik ingerlatsineq (PpN-mik ingerlatsineq) aamma pikkorissaanernik immikkoortukkuutaanik marlunnik pikkorissaanerit imaqartussaapput.   PpN-nik ingerlatsinerit Nuummi sapaatip akunnerini 48-mi 49-milu ingerlanneqassapput.

Meeqqanut inuusuttunullu aarlerinartorsiortunut suliniutit patajaallisaavigineqarnissaannut Kalaallit- qallunaallu oqartussaasoqarfiisa assigiinngitsunik suliallit akornanni suleqatigiinnerup ilaa

Meeqqanut- inuusuttunullu suliassaqarfimmi inunnut sulisunut ilisimasanik qaffassaaneq piginnaasanillu ineriartortitsineq Kalaallit- qallunnaallu oqartussaasoqarfiisa assigiinngitsunik suliallit akornanni suliaqarnermi ilaavoq.  Ilisimasat qaffassaaffigineqarnissaannut neqeroorutit ulloq unnuarlu paaqqinnittarfiit kommunillu pisariaqartitaannik annerusumik naammassinninnissaq tassani siunertarineqarpoq.  Meeqqat inuusuttullu – ulloq unnuarlu paaqqinnittarfimmiikkaluarunik imaluunniit ornittakkamiikkaluarunik – pitsaanerpaamik ikiorneqarnissaat tamatuma qulakkiissavaa.

Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut 34 64 95-ikkut attavigiuk.