Nalunaarusiaq: Utoqqarnut suliassaqarfimmi inissiat maanna inissisimaffiat

Ukiuni aggersuni utoqqaat inuiaqatigiinni amerliartortussaapput.Nalunaarusiami nalilersuivigineqarput utoqqarnut inissiat, inuiaqatigiinni innuttaasut katitsigaanerisa allanngoriartornerisa kingunerisaanik, tamannalu Naalakkersuisut utoqqarnut tunngatillugu periusissialiaanni maanna suliarineqartumi pingaaruteqartutut inissisimavoq.

Utoqqarnut inissianik aamma utoqqaat ingerlatsivinni angerlarsimaffiinik siunissami pisariaqartitsilernissamut takorluukkat assigiinngitsut pingasut aallaavigalugit nalunaarusiami nalilersuivigineqarput aningaasalersuinissanik pisariaqartitsilernissat ukiut l0-nut siumoortumik isigisunik. Aningaasalersuinissanik pisariaqartitsinissat assigiinngisitaartut isiginiarneqarput takorluukkap qanoq ittuuneranik aallaaveqartunik 200 mio. kr.-iniit 1,9 mia. kr.-it tungaannut. Takorluukkatut periarfissanit pingasuusunit piviusorsiornerusutut isigineqartoq naatsorsuutigisaqarpoq inissanik 750-inik pisariaqartitsisoqarnissaanik, naatsorsuutigineqartunik 1,1 mia. kr.-inik akeqartussatut.

”Nuannaarutigaara kiisami maanna nalunaarusiaq saqqummiussinnaaleratsigu. Nalunaarusiap immikkuualuttortalersugaasunik naleqarluartunillu takussutissippaatigut inissaqartitsinikkut utoqqartatsinnut suliassaqarfimmi unammilligassatsinnik. Siunissami takusinnaalissavarput inuaqatigiinni ukioqqortussutsikkut agguataarnitta allannguutai. Amerlasuut ukiuni aggersuni suliffeqarneq qimarassavaat, piffissarlu aamma takkukkumaarpoq inuit taakkua tapersersorneqartariaqarfigisaat ikiortariaqalernissaallu, ulluinnarni inuunerup ingerlanneqarneranut. Nalunaarusiami ersarissunik takussutissinneqarpugut unammilligassagut aggersut pillugit, - taama oqaaseqarpoq Isumaginninnermut Suliffeqarnermullu Naalakkersuisoq Mimi Karlsen.

Nalunaarusiami aamma misissorneqarput utoqqaat illuisa, utoqqarnut ataatsimoortunik inissiat aamma utoqqarnut inissiat allat aserfallatsaaliinikkut qanoq pisariaqartitsiffiuneri. Tamatuma saniatigut nalunaarusiami misissorneqarput inissiat pineqartut utoqqarnut qanoq naleqqutsigineri. Nalunaarusiamissaaq misissorneqarput inissiat nunap immikkoortuini assigiinngitsuni qanoq assigiinngitsigineri, tassanilu ersilluni nunap immikkoortuini pissutsit assut assigiinngittartut, - siunissami pisariaqartitsinissat, aserfallassimassuseq inissiallu qanoq naleqqutsigineri eqqarsaatigalugit.

Nalunaarusiaq ilaavoq Naalakkersuisut ammanerisumik pissusiviusunillu tunngaveqartumik oqallittoqarnissaannik suliniuteqarnerannut. Tamannalu pillugu Isumaginninnermut Suliffeqarnermullu Naalakkersuisoq Mimi Karlsen ima oqaaseqarpoq: ”Inuiaqatigiinni unammilligassatta suliarinerini tamatigut pissusiviusunik tunngavilimmik unammilligassagut aalluttariaqarpagut. Taamaaliornikkut pitsaanerpaanik tunngavissaqalissaagut piviusunik aaqqiissutissarsiornitsinni aammalu periusissianik suliaqarnitsinni Inatsisartut aamma kommunit suleqatigalugit. Nalunaarusiami tikkuarneqarpoq naatsorsuutigisariaqassagipput minnerpaamik ilassutitut utoqqarnut inissiat ilassutissaat 750-it atorfissaqartinneqassasut. Ilimagineqarpoq taakkua 1,1 mia. kr.-inik akeqarumaartut. Taakkua aningaasarpassuupput, - tamatumalu aamma ersersippaa utoqqarnut tunngatillugu suliassaqarfik siunissatsinni qanoq inuiaqatigiinnut aningaasarsiornitsinnullu sunniuteqassanersoq.”

Nalunaarusiaq uani atuarneqarsinnaavoq. Nalunaarusiamut ilanngussat paasissutissat uani atuarneqarsinnaapput.

Annerusunik paasisaqarumagaanni attavigineqarsinnaavoq naalakkersuisup allattaa ministersekretær Naja Lynge Petersen uani e-mailimi: nlyp@nanoq.gl eller tlf. + 299 34 56 11