Kalaallit Nunaat nunat aamma nunap immikkoortuisa uuliasiorneq gassisiornerlu tunullugit nunani tamalaani suleqatigiinni suleqataalerpoq

Kalaallit Nunaat The Beyond Oil & Gas Alliance-mut (BOGA) pilersitseqataasutut ilaasortanngorpoq. Nunat Paris-imi isumaqatigiissummi anguniagaq malillugu uuliamik atorunnaarsitsiartuaarnissamik kissaateqartut politikkikkut suleqatigiiffiat.

2021-mi juulip qaammataani uuliasiornissamut pisinnaatitsissutinik nutaanik tunniussisarnerup unitsinneqarnissaa pillugu aalajangiinermi Kalaallit Nunaata nunani tamalaani suleqatigiilersuni anguniakkat naammassisimavai. Suleqatigiinneq taagorneqarpoq “The Beyound Oil & Gas Alliance” (BOGA). Suleqatigiilerneq ulloq  11. november COP26 nalaani atuutilersinneqassaaq.

 

BOGA-mi ilaasortaaneq Kalaallit Nunaannut periarfissanik pitsaasunik amerlanerusunik ammaassissaaq. Ilaasortaaneq misilittakkanik avitseqatigiinnermut, mingutsitsinngitsumut allanngoriartortitsinerup nittarsaannissaanut atorneqarsinnaavoq, peqatigisaanillu ilaasortaaneq nunani tamalaani suleqatigiinni, silap pissusaanut suliassaqarfimmi aqutsisuulersinnaasumik, toqqaannartumik politikkikkut sunniuteqalersitsissaaq.

 

BOGA-mi sulissutigineqarput:

 

  • Nunarsuarmi silap pissusaanut anguniagaqarnerit annertunerulersinnissaat, aammalu uuliamik gassimillu tunisassiornerup  2°C inorlugit kiannerulernerata annertussuseqarnissaa pillugu Paris-imi isumaqatigiissummut naleqqussarnissaa aammalu kiannerulernerata 1,5°C inorlugu annertussuseqaannartinnissaa;
  • Uuliamik gassimillu atorunnaarsitsiartuaarnerup nukissiornermut silallu pissusaanut nunani tamalaani pingaartinneqartuniiginnarnissaanik qulakkeerinissaq, aammalu uuliamik gassimillu tunisassiornerup nunarsuarmi naapertuilluartumik aqunneqartumik, Paris-imi isumaqatigiissummi siunnerfinnik kiisalu silap pissusaanut sunniinnginnissamik pisussaaffinnut naammassinnittumik  atorunnaarsikkiartorneqarnissaata sulissutiginissaa; 
  • Nunanit aamma nunap immikkoortuinit uuliasiornissamut pisinnaatitsissutinik nutaanik unitsitsinissaq pillugu BOGA-mi anguniakkanik naammassinnittumik siumut ingerlasoqarnerata, allat iliuuseqarnissaannut aammalu pisussaaffiulersunut taakkununnga sullissivimmik pilersitsinissaannik kajumissaarinermut, atorluarnissaa;
  • Uuliamik gassimillu tunisassiornerup naapertuilluartumik naleqquttumillu atorunnaarsikkiartuaarnissaannik tapersiinissamut aqutsinissamullu tunngatillugu nunani tamalaani suleriaasissamik ataatsimoorussamik pilersitsinissaq.

 

BOGA pillugu annertunerusut atuakkit https://beyondoilandgasalliance.com/

Nutaarsiassamut matumunnga ilanngunneqarpoq misissueqqissaarnermut nalunaarusiaq (Oil and Gas exploration in Greenland), uuliasiornissamut pisinnaatitsissutinik nutaanik tunniussisarnerup unitsinneqarnissaa pillugu aalajangiinermut atatillugu Naalakkersuisut suliarititaat.

 

 

Uuliasiornissamut pisinnaatitsissutinut nutaanut Kalaallit Nunaata unitsitsinera aamma BOGA pillugu paasissutissanik annertunerusunik piniarnermi attaveqarfigineqassaaq Naalakkersuisoqarfimmi pisortaaneq Jørgen Hammeken-Holm Oqarasuaat 346846.

 

Mingutsitsinngitsumut allanngoriartortitsineq pillugu paasissutissanik annertunerusunik piniarnermi attaveqarfigineqassaaq Naalakkersuisoqarfimmi pisortaaneq Mette Skarregaard Pedersen, E-mail: pan@nanoq.gl. Tlf. 529844.