Nakkutilliisoqarfik Kommuneqarfik Sermersuup inissianik attartortitsinermik periusaa pillugu ulloq 9. november 2021 ataatsimiippoq

Nakkutilliisoqarfik ulloq 9. november 2021 ataatsimiippoq. Ullormut oqaluuserisassaq ataasiinnaavoq, tassaallunilu Kommuneqarfik Sermersuup inissianik attartortitsinermik periusia.

Ataatsimiinnermi imatut aalajangiussisoqarpoq:

Kommuneqarfik Sermersuup inissianik allanut attartortitsinissaq siunertaralugu inuussutissarsiornermi attartornermut isumaqatigiissutinik passussinera Nakkutilliisoqarfiup isornartorsiorpaa.

Nakkutilliisoqarfiup paasivaa, suleriaaseq atorneqartoq kommunit piginnaatitaanerannut maleruagassanik unioqqutitsinerusoq, tassami kommunip inuussutissarsiornermi attartornermut aningaasartuutai atuisut akiliuteqarnerini
isertitaannit aammalu inissianut allaffissornikkut aningaasartuutissanut sipaarutissaannit annertunerummata.

Nakkutilliisoqarfiup oqaatigissavaa, inissianik appasinnerusumik attartorneq, kommunip piginnittumut akiliutissatut pisussaaffigisaanit, akeqartillugu allanut attartortitsinermi innuttaasunik ataasiakkaanik iluaqusiineq, kommunip
piginnaatitaaneranik unioqqutitsinerusoq.

Nakkutilliisoqarfiup Kommuneqarfik Sermersooq peqquaa Atugassarititaasut assingusut tunngavigalugit inuussutissarsiornermi attartornermut isumaqatigiissuteqartarnerit unitseqqullugit.

Nakkutilliisoqarfiup sakkortuumik isornartorsiorpaa Aningaasaqarnermut Ataatsimiititaliap paasissutissanik naammattunik tunngavilimmik inuussutissarsiornermi attartornermut isumaqatigiissuteqarnermut akuersissuteqarsinnaanissaata qulakkeernissaanut, Kommuneqarfik Sermersuumi Aningaasaqarnermut Ataatsimiititaliamut suliassami paasissutissiineq naammassimanngitsoq.

Nakkutilliisoqarfiup sakkortuumik isornartorsiorpaa Aningaasaqarnermut Ataatsimiititaliamut suliami paasissutissiinerup naammattumik tamakkiisuunissaa, Kommuneqarfik Sermersuumi borgmesterip nakkutigisimanngikkaa,
takuuk kommunit aqunneqarnerat pillugu Inatsisartut inatsisaanni § 19.

Nakkutilliisoqarfiup sakkortuumik isornartorsiorpaa Aningaasaqarnermut Ataatsimiititaliami akuersissuteqarnissaq pisariaqartoq qulakkeeqqaarnagu, Kommuneqarfik Sermersuumi borgmesterip pisuni pingasuni
inuussutissarsiornermi attartornermut isumaqatigiissutit akuerisimagai.

Nakkutilliisoqarfiup sakkortuumik isornartorsiorluinnarpaa Kommunit aqunneqarnerannut maleruaqqusami § 6, imm. 10-mut naapertuuttumik Aningaasaqarnermut Ataatsimiititaliami sioqqutsisumik akuersissuteqartoqanngitsoq, Kommuneqarfik Sermersooq pisuni marlunni inuussutissarsiornermi attartornermut isumaqatigiissutinik akuersissuteqarsimasoq.

Nakkutilliisoqarfiup Sakkortuumik isornartorsiorpaa Kommunit aqunneqarnerat pillugu Inatsisartut inatsisaanni § 48, imm. 1-imut naapertuuttumik Nakkutilliisoqarfimmut suliami paasissutissanik pissarsinissamut Kommuneqarfik Sermersuup peqataasimannginnera.

Nakkutilliisoqarfiup inassutigaa, suliassani ilaatinneqartuni ineqarnermut tapersiinermut taarsigassarsiat akuerineqartut inatsisinut naapertuuttumik akuerineqarsimanersut Ineqarnermut, Attaveqaasersuutinut, Naligiissitaanermullu Naalakkersuisoqarfiup suliassaqarfimmut oqartussatut naliliissasoq.

Nakkutilliisoqarfiup inassutigaa, allanut attartortitsinermut isumaqatigiissutit innuttaasunut isumaqatigiissutigineqartut inatsisinut naapertuunnersut pillugu Ineqarneq pillugu Naammagittaalliuuteqartarfik nammineq aallartitaminik isummersinnaanersoq, Ineqarnermut, Attaveqaasersuutinut, Naligiissitaanermullu Naalakkersuisoqarfik Naliliissasoq.

Nakkutilliisoqarfiup paasivaa, innuttaasut attartornermut isumaqatigiissutinut aamma allanut attartortitsinermut isumaqatigiissutit pillugit iliuusissatut periarfissaat amigaatigineqartut.

Nakkutilliisoqarfiup inassutigaa, aningaasaqarnermik aqutsinermut atatillugu missingersuusiornermut naatsorsuutinullu inatsimmi aalajangersakkat, ilanngullugu akiitsorsimasinnaaneq, malinneqarsimanerannut tunngatillugu Aningaasaqarnermut Nunamullu Namminermut Naalakkersuisoqarfiup nakkutilliinermut suliassaq aallartissagaa.

Nakkutilliisoqarfiup Nakkutilliisunut inassutigaa Kommuneqarfik Sermersuup ineqarnermut ingerlatsinermut periusaa sukannernerusumik allaffissornikkut nakkutilliineq aallartissagaa.

Nakkutilliisoqarfiup ataatsimiinnerani uku peqataapput:

Sólja í Ólavsstovu, Nakkutilliisoqarfiup Siulittaasua
Doris J. Jensen, Ilaasortaq, Inatsisartunit toqqagaq
Marianne Jensen, Ilaasortaq, Inatsisartunit toqqagaq
Evelyn Frederiksen, Ilaasortaq, kommunit ataatsimoorlutik toqqagaat
Naja Lund, Juaaka Lyberth-imut taartaalluni ilaasortaq, kommunit ataatsimoorlutik toqqagaat (Juaaka Lyberth suliamut attuumavallaarluni peqataasinnaanngilaq, § 52 Imm. 3, Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq naapertorlugu).

Sukumiinerusunik paasissutissanik pissarsiniarluni saaffissaq tassaavoq Immikkoortortaqarfimmi Pisortaq Klaus Georg Hansen, email kgh1@nanoq.gl mobil 54 73 46.